COVID-19 Lockdown avanga kuthnathawktute harsatna sukiang tura hmalak dan thlirlet a ni

COVID-19 hrileng avanga Mizoram-a kuthnatawktute harsatna an tawh sukiang tura Agriculture Department hmalakna leh hmalak zuiz el dan tur sawihona chu nimin khan Chief Minister, Zoramthanga hovin neih a ni a. Agriculture Minister leh he Department-a Officer pawimawh dangte an tel bawk.

Chief Minister Office Cabinet Room-a he Meeting-ah hian Chief Minister, Zoramthanga chuan buh leh bala intodelh chu tuna Mizoram mamawh leh sawrkarin a ngaihpawimawh ber a nih thu a sawi a. Ei tura intodelh leh mipui hriselna chu hmasawnna atana pawimawh hmasa ber, SEDP hmalakna pawhin a thiltum pawimawh a nih thu sawiin, ram hmasawnna hna dang nen pawh a kalkawp zel tur thu a sawi a. Chutihrual chuan tuna COVID-19 hrileng ang, hun khirhkhan tak dang pawh lo tawng leh mah ila, mipui ten harsatna lian lutuk tawk lova kan hmachhawn theih nan kan intodelh a tul a ni, a ti a. Hemi atan hian Agriculture leh a kaihhnawih Department hrang hrangte chu an pawimawh thu Chief Minister chuan a sawi a. Lockdown chhunga Department in kuthnatawktute tana hma an lo lakna chu lawmawm a tih thu sawiin, COVID-19 hrileng avanga harsatna kan tawh mek atang hian hmalam hun thlir zel chungin kan damkhawchhuahna tur leh, dinhmun tha zawka kan inhlanchhoh theihna turin thahnemngai taka thawhho a pawimawh thu a sawi bawk.
He Meeting-ah hian kuthnathawktute tana thlai chi phai lama chah reng ngai lova kan intodelh theih nana Research and Extension in buh chi thenkhat te, Kawlbahra leh thlai danga an hmalakna chungchang te sawi tel niin, loneitute tana Fur ruahtui khawl leh tui kawng tha taka siam te a pawimawh thu te leh Mechanization atana hmalakna te an sawi a. COVID-19 avanga project kalpui mek engemawzat a thuanawp thu tarlan a ni bawk.
He huna tarlan a nih danin Union Finance Minister-in a puan tawh angin COVID-l9 avanga loneituten harsatna an tawh palh theih tur laka inven nan PM-KISAN hnuaia Loneitu 80,888 te account-ah April ni 22, 2020 thleng khan Rs. 16,17,76,000 thun sak an ni tawh a. Lockdown kalpui anih chhung hian Mizoram loneituten harsatna an tawh lohna tura hmalakna hrang hrang zingah phone hmanga an harsatna an thlen theihna tura hmalkna hrang hrangte pawh tarlan a ni bawk.
Lockdown puan lai hi Mizoram loneitute tan thlai chi thlak hun tha ber a nih avangin Lo-neituten thlai chi an mamawh te dawr atanga an lei theihna turin State Level Task Force hotute nena ruahmanna a siam thu leh loneitu thlai chi mamawhte tan a theih ang angin DAO ten thlai chi ngaihtuahsakin a thlawnin an sem thu leh, Leilet Buh Chi a mamawhte tan ngaihtuahsak mek an nih thu te tarlan a ni.
SEDP hnuaiah kumin hian Agriculture Department chuan Acre 2500 laia zau-ah Vaimim Quintal 174 chin tum a ni a, hemi atana Vaimin chi mamawh te, thlai venhimna hmanrua Sprayer te chah thlen niin DAO te hnenah sem chhuah a ni a. SEDP hnuaia Vaimim chi chah thlen bakah hian Loneituten an mamawh belh Quintal 201.47 chah belh niin sem chhuah nghal a ni bawk.
Sub Mission on Agricultural Mechanization (SMAM) hnuaiah Custom Hiring Center 50, Power Tiller 75, Mini Power Tiller 75 leh Paddy Transplanter te subsidy-a pek tura ruahman a ni a, Power Tiller hi sem chhuah tan a ni tawh a. District tinah Chul rih uar tura infuih a ni a. COVID-19 leh Lockdown avangin Kolasib leh Mamit District-a Leilet-a hnam dang chhawrte an haw avang leh hemi avang hian harsatna a awm thei dawna hriata nih avangin Survey neih a ni a, heng leilet atangte hian Buh thar a tlakhniam phah lohna turin Mechanization Scheme (Custom Hiring Center) emaw FOCUS atangin emaw lei lehsak tura ruahmanna siam mek a ni bawk.

Comments

Chhiar Hlawhte