Khelo India-a Medal la te chawimawina neih a ni

Sports & Youth Services Minister, Robert Romawia Royte chuan nimin khan Khelo India Youth Games, 2020-a Mizoram tana Medal dawngte lawmpuina leh chawimawina a pisa-ah neiin, thingpui inhona a neihpui.

Khelo India Youth Games, 2020 hi India rama a vawi thumna atan Guwahati-ah January ni 10 atanga ni 22 chhung khan neih a ni a, Mizoram atangin Players 77 leh anmahni tawiawmtu leh buaipuitu Coach leh Officials dangte nen mi 100 bawr vel an kal a ni. Sports discipline hrang hrang 20-a intihsiakna neih ah Mizoram chu discipline 7- Judo, Table Tennis, Weightlifting, Wrestling, Football, Boxing, Hockey-ah te an qualify a. Gold 3, Silver 2, Bronze 5 la in, a pumpuiah Mizoram chu 24th na a ni.

Mizoram tan hian Boxing-ah Franky H. Lalruatpuia (Under-17 Kg. 46)-ah Silver, Laldinsanga (Under-17 Kg. 50)-ah Bronze, Lalhruaitluanga (Under-17 Kg. 70)-ah Bronze an la a ni. Judo-ah Chinlunmawii’n (Under-21 below 52 Kgs) Gold a la a, Table Tennis-ah  Jeho Himnakulhpuingheta leh Alberto LR. Ruata ten Gold an la a, Single-ah Jeho Himnakulhpuingheta’n Bronze a la bawk a ni. Weightlifting-ah Jacob Vanlaltluanga leh Silvana Beihrothatlo ten Bronze an la ve ve bawk a ni. Wrestling-ah Elizabeth Rohlupuii’n Broze a la a, Under-17 Football-ah Mizoram team te hian Gold an la bawk a ni.