MZP hruaitute ZPM Office-ah lengin hmalak an tumna hrang hrang an sawipui

Mizo Zirlai Pawl (MZP) chuan Mizoram Assembly inthlanpui neih tur pualin Mizoram chhunga Political Party hrang hrangte kawmkual an tum a. Nimin khan Aizawl-a Zoram Peoples’ Movement (ZPM) Office-ah lengin ZPM hruaitute nen inkawmna neiin ZPM hmalak tum dan hrang hrang an sawiho.

Nimin a MZP General Hqrs. hruaitu rual ZPM Office-a leng te hi ZPM Steering Committee Vice Chairman, Dr. Kenneth Chawngliana leh hruaitu dang ten lo dawngsawngin ramri chungchang, Education chungchang, Mizoram-a Lok Ayukta din chungchang leh Mizoram chhunga dan lova awm Foreigner ( Chakma) chungchanga ZPM hmalak tum dan an sawiho a. He hunah hian MZP President, L. Ramdinliana Renthlei chuan MZP in Mizoram Assam ramri chungchang a hma an lo lak tawh dan hrang hrang te sawiin, Ramri hrul ah Sipai tam zawk dah a \ul zia te a sawi a, kan ramri te a lo him zawk nan Boundary Development Department siam a pawimawh zia te leh ZPM a lo Sawrkar chuan Zofate Chawlhbuk sak a nih theih nan hmalak an tum leh tumloh te a zawt bawk.
He hunah hian ZPM Steering Committee Vice Chairman, Dr. Kenneth Chawngliana chuan ZPM chuan Policy tam tak an nei tih sawiin, “Kan policy leh Manifesto te hi kan ziak satliah a ni lova, a tak in kan Sawrkar chuan hma kan la dawn a ni tih hi min hriatpui turin ka duh cheu a ni,” a ti a. ZPM an sawrkar chuan Boundary Commission an din dawn tih sawiin, “Ramri enkawl tur bik department kan siam anga, ramri enkawltu tur bik Minister pawh kan dah dawn a ni. Ramri hrul ah Police Force dah hi kan Chief Ministerial Candidate in a ngai pawimawh hle a, a rang thei ang berin hma kan la anga, ramri hrul ah Police Force \hahnem zawk kan dah dawn a ni,” a ti a. Hei bakah hian an lo Sawrkar a nih chuan Bairabi Zophai-a MZP ten Zofate Chawlhbuk sak an tum chu chak taka hma lain a sa tu nih ngei an tum dawn tih a sawi bawk.
Dr. Kenneth Chawngliana chuan Zirtirtu indaihlo chungchang chu an vei thu pawh sawiin, zirchianna an neih tawh thu leh hmalak an tum thu a sawi a. “Education Department khawihtu tur Education Service siam hi kan ngai pawimawh hle a, Mizoram Education Service siam a nih theih nan hma kan la dawn a ni. Education a hmasawn tur chuan Budget tam zawk dah kan tum bawk a, tunlai Mizoram kan mamawh em em All Indian Central Service leh All Indian Civil Service tam zawk kan neih theih nan nasa taka hmalak kan tum bawk,” tiin heng te hi Manifesto-ah an dah thu leh an tih hlawhtlin tur thu a sawi bawk.
Chakma foreigner chungchanga hmalak an tum dan zawhna chhangin Dr. Kenneth Chawng-liana chuan ruahmanna fel tak an neih tawh thu leh an lo sawrkar a nih chuan Foreigner te hian a rang thei ang bera Mizoram an chhuahsan theih na turin hmalak an tum thu a sawi a. CADC-a Zohnahthlak te tan bik hmalak an tum thu pawh sawiin, development pawh nasa taka pek an tum thu a sawi.
Mizoram-a eirukna dona tur Lok Ayukta din chungchang pawh he hunah hian sawiho a ni a, ZPM Steering Committee Vice Chairman chuan eiruk dona chungchangah hian nasa taka hma lak an tum thu leh an Manifesto-ah pawh an ziah thu a sawi a. “Lok Ayukta hi rang taka a function theihna turin hma kan la dawn a ni. Tin, he dan hian Chief Minister pawh a chhui theih dawn avangin Chief Minister chu Party ah pawh nihna pawimawh kan chelh tir dawn lo a ni. Tun sawrkar kan hrawn mek ah hian eirukna a hluar em avangin Lok Ayukta pawh hi an function ngam lo ah kan ngai a, ZPM kan sawrkar a nih chuan nasa tak in eiruk na kan do dawn a, Mi-zoram-ah Lok Ayukta hi kan din nghal dawn a ni,” a ti bawk. He inkawmna hunah hian thil pawimawh hrang hrang sawiho a ni bawk.

Popular posts from this blog

PAN CARD an tih teh fo hi - Laldinpuia