Journalist-te thla hualna leh thlavang hauhna nei

Information and Public Relations Department chuan chanchin-bumite tana Nodal Department an nih angin tunhnaia Assam Police-te laka kut tuar journalist-te thla hualna leh thlavang hauhna hun nimin khan I&PR Auditorium-ah an buatsaih a, he hun hi I&PR Minister, Lal Thanzara leh Agriculture Minister, KS. Thanga bawkah MLA, Chalrosanga ten an hmanpui.

Nimin a he hunah hmanna ah hian I&PR Minister, Lal Thanzara chuan journalist-te chu mipui hriattur thil pawimawh puangzartu an ni tih sawiin, mipui rawngbawl hna an thawhna ti\huanawp tur zawnga Assam Police-ten Mizo journalist kut an thlak ta mai chu pawi a tih takzet thu leh an lungawilohna pawh Assam sawrkar hnenah ziaka a thlen thu a sawi a. Mahni nunna thapa, silai mu kara mipui rawngbawltu press mite chhuanawm a tih thu sawiin, hliam tuarte a tawrhpui takzet thu he hunah hian a sawi a. March ni 20 ah Mizoram leh Assam ramri chungchang sawihona New Delhi-a neih turah pawh Mizoram Chief Secretary in he thil thleng chungchang hi a thlen dawn niin a sawi bawk.

Journalist-te thlavang hauhna programme hi I&PR Director, David L. Thangliana’n a kaihruai a, he hunah hian Agriculture Minister, KS. Thanga chuan journalist-te laka Assam Police chet dan chu India democracy ropui tak bawh-chhiatna leh ram timualphotu nia a hriat thu a sawi a. Indona hmunah te pawh chhinchhiahna kengin Press mite an kal fo a, vanduaina avanga hliam tuar leh thi te pawh an awm \hin a, tihpalh thil thu ni lova tum reng vanga Police ten chanchinbumite kut an thlak erawh hi chu Press mite zalenna rahbehna nasa tak a nih thu a sawi bawk.

Mizoram Journalist Association (MJA) President, Vanlalrema Vantawl leh Vice President, Zonunsanga Khiangte te pawhin thu sawiin Minister of DoNER, Ministry of Information and Broadcasting, Press Council of India, National Human Rights Commission bakah Prime Minister hnen thlenga an lungawilohna an thlen thu an sawi bawk.

Tun \uma Assam Police te kut tuar Journalists te hi Zohming-mawia, The Aizawl Post; Joseph Lalnuntluanga, Zonet; C. Lalthansangi, AIR; Emy Lawbei, News 18; Malsawmdawngzela Hrahsel, Vanglaini; H. Vanlalnghaka, DDK Kolasib; Zomuanpuia, Zing\ian Kolasib leh R .Lalnunmawia, Duhlai Kolasib te an ni.

Nimin vek khan I&PR Minister Pu Lal Thanzara chuan Assam Chief Minister, I&PR Department changtu ni bawk, Sarbananda Sonowal chu lehkha thawnin Mizo journalist-ten March ni 10-a Zophai buaina ah Assam Police te kut an tuar pawi a tih thu te, Journalist-te thil phut ngaih pawimawh sak tur leh he thil thleng avanga chan emaw, hloh emaw an neih apiang phuhruk sak tura a beisei thu a thlen a ni.