Serchhip-a hnamdang mi 4 suamtute Motor rukbo rawn thlenpui.

Tun thla Nov. 3, 2014 zana Serchhip AOC Veng-a hnamdang mi 4 te hrai ruia rawktu chu hriat ni tawhin man tuma beih mek a ni a, hemi zana an rukbo Car chu hmuh let ni tawhin nimin khan Serchhip rawn thlenpui a ni.

Tarlan tawh angin tun thla ni 3 zan khan Serchhip leh hmun hrang hranga chawhmeh leh thildang supply \hin leh tuna Serchip AOC Veng-a Pu Lalfakzuala In luaha khawsa mek, Zakir Hussein Lasker (34), Hawaithang, Cachar District bakah a Driver, Majibur Haqh Lasker (34), Handyman-a an hman Rakman Ali (24) leh an Manager Faiz Uddin Lasker (25) te chu an In-ah misual lutin an chaw ei turah damdawi engemaw pawlhin an hrai rui a, heng mite nikhaw hreloa an awm hlan hian an pawisa Rs. 65,000/- bakah Car Mz-06/4852 (i10) leh Mobile Handset ruin an tlanbo zui a ni.
    He thil thleng hi Nov. 4, 2014 khan Serchhip Police te hriattir niin Police te chuan heng mite thil ei hi lakhawmin Forensic Science Laboratory-ah an thawn nghal a, heng mite hi biak theiha an awm veleh Police te chuan chhui zuiin Nov. 7, 2014 zan khan pawikhawihtute hian an Motor ruk hi Tripura lamah hralh an tum tih hriain Binodini, Nilam Bazar Police Station huamchhung ah Motor hi an man a, Motor rutute erawh chu an tlanbo hman thung a, Motor an hmuhlet hi nimin khan Serchhip Police Station-a 2nd OC, Pu Robert L. Hnamte leh a thawhpui te chuan Serchhip an rawn thlenpui a ni.
    Hemi chungchangah hian Zakir-a chuan pawikhawihtu nia rinhlelh te hian Nov. 3 tlai ah amah hmuh tuma an biak thu leh a In-ah kal chilhin Brick (Leirawhchan) 40,000 an duh thu an sawi tih a sawi a, an chawhmeh chhuanlai chu a chawk tih sawiin, hetah hian damdawi an hman hi an pawlh nia a rin thu a sawi a, tlai dar 6:30 velah chaw eiin hemi hnu darkar chanve vel a\angin nikhaw hreloa an awm thu leh zing dar 9:00 velah an harh chauh thu a sawi bawk. Pawikhawihtu te hian an Motor ruka High Security Number Plate chu paihin A/F tih aiah F/A tiin an lo ziak a, a bak tih danglam leh hmelhem erawh hmuh tur a awmlo thung a ni.