‘RTO E-Challan’ apps dilo hmanga sum lak sak nia hriat nuai 10 chuang hmuh let a ni
.jfif)
Hemi chungchanga Serchhip Police hotute sawi danin kumin May thla tirlam khan Serchhip Police te hian Whatsapp katlanga ‘RTO E-Challan’ tih application click avanga buaina tawk te atangin complaint engemaw zat an dawng a, heng zingah hian R. Lalchhandama chuan a Account (Slice Small Finance Bank Serchhip) atangin Rs. 13,92,000 leh Robert Zoremmawia chuan a account (MRB) atangin Rs. 2,09,000 lak sak an nih thu an dawng a ni. Hetih hunlai hian ICJS account re-activate dilna an process mek lai anih avangin NCRP Portal access theih a ni lo a, Cyber Criminal-te chu pawisa tihchet lamah an tuan a ran avangin hetih hunlaia Serchhip Police Station-a OC, Inspr. R. Lalbiakhlua chuan a rang thei ang bera buaipuiin phone call leh a theih ang angin chak takin hma a lakpui nghal a ni.
Serchhip Police te chuan R. Lalchhandama pawisa hi Ram Jeevan Shah nia hriat Bank account (Bank of Maharastra, Mumbai) leh account dang rinhlelh pahnih ah a lut nia hriat a nih thu sawiin, Robert Zoremmawia pawisa luhna hi Punjab National Bank, Jhanjharpur (Bihar) a ni tih hriat a ni bawk a. Heng account rinhlelh te hi freeze nghal niin heng account freeze atanga pawisa lalet leh tur hian Court Order a ngaih avangin Serchhip District Court lamah requisition vawi thum lai dil a ni a, requisition te hi Bank of Maharastra leh Punjab National Bank lamah soft copy leh hard copy a thawnin, Bank lam Ukil ten an pawm hnuah account freeze te atang hian tun thla August, 2026 chhung hian R. Lalchhandama pawisa bo Rs. 13,92,000 atangin Rs. 9,12,707 chu Ram Jeevan Shah-a account ni a hriat atang hian laklet leh a ni a, account dang pahnih rinhleh te pawh hi enzui a vil zui mek an ni a. Hemi rual hian Robert Zoremmawia pawisa bo Rs. 2,09,000 atang hian Rs. 1,59,627 chu laklet a ni bawk a ni.
Serchhip Police Station hian ‘RTO E-Chalan Scam’ chungchangah hian mipui zirtirna video clip te siamin Social Media-ah te an thehdarh a, hetihlai hian RTO E-Challan Scam avang hian case engemaw zat neiin he thil avang hian Phone engemawzat set thatsak te pawh an lo nei tawh bawk a, Scammer-te hian sum tam tham deuh bitum bik an neih thin avangin sum bothlau erawh an tam vak lo niin a lang. Hetiang ang Scammer hi an la pung tulh tulh thei tih Police te chuan sawiin, Link hriatchian loh hmeh mai mai te, sum peipunna sang lutuk te leh online hmanga sum hmuh awlsamna lutuk lakah hian mipuite pawh a fimkhur a tul thu an sawi a ni.