‘Road Safety Month 2026’ hawnna neih a ni; Nikum chhungin lirthei chetsualna ah mi 56 an thi

February thla chhunga kalpui tur ‘Road Safety Month 2026’ chu nimin February 2, 2026 khan hman tan a ni leh ta a, chhinchhiahna atanga a lan danin nikum (2025) chhung khan Mizoram-ah lirthei chetsualna tum 73 thleng ah mi 56 thiin hliam tuar mi 45 an awm bawk. 

Road Safety Month 2026 hawnna hi Aizawl-ah chuan Mizoram State Road Safety Council (MSRSC) buatsaihin Transport Department Directorate Conference Hall-ah neih niin Transport Minister Vanlalhlana chuan a hawng a, Road Safety Month chu mipuite himna tur ngaih pawimawhna hun a nih thu leh Road Safety chuan kawngpui hmangtu zawng zawng – lirthei khalhtu atanga lirthei chuangte leh kawngsira ke-a kalte thlenga a huam thu sawiin, Sawrkar chuan infrastructure tha leh Dan tharte siamin a kengkawh a, mahse a hlawhtlin nan chuan mipuite thlawpna a ngai tih a sawi a. Lirthei chu mihring tan pawimawh mah se a khalhtute fimkhur loh avangin chhungkaw tam tak a nghawng thei a, nunna channa, chhungkaw tlakranna, ramtuileilohna thlengin a thlen theih thu a sawi a ni.

Transport Minister chuan nikum chhung khan Mizoram-a lirthei chetsualna tum 73 thleng ah mi 56 thiin hliam tuar mi 45 an awm thu a sawi a, “India ramah kumtin accident leh accident avanga thi leh hliam an pung a, a chhan bulpui ber, 70% vel chu lirthei khalh chak vang a ni,” a ti a, kawng a that tawh avang leh lirthei a tlan chak tawh avangin fimkhur a pawimawh thu sawiin, “Kum 2019-a Motor Vehicles Act siamthat a nih khan dan bawhchhiate hremna tihnat lehzual a ni a, hei hi khua leh tuite’n dan an zawm that theih nan a ni,” a ti bawk.

He hunah hian Transport Department Director Er. R. Lalrammawia chuan India rama accident a pun nasatzia sawiin, khawvel pumpuia lirthei awm za zela pakhat (1%) chu India rama mi a nih thu leh khawvel pumpuia lirthei chetsualna thleng za zela 11 (11%) chu India rama thleng a nih thu a sawi a, e-DAR atanga kum 5 kalta chhunga India rama accident thlen dan average-a lakin kum khat chhungin accident 4,42,843 thleng ang a nih thu pawh sawiin, kum khat chhunga accident kaihhnawiha thi chu mi 1,62,183 niin na taka hliam 4,21,769 zet an nih thu a sawi bawk a. India ram chuan Road Safety a ngai pawimawh deuh deuhin, kum 2020-a Stockholm Declaration kha pawmin, kum 2030 hmaa accident rate 50%-a tihtlak a intiam thu leh Supreme Court Committee on Road Safety pawh din niin State-te tih tur hrang hrang a tuksak thin a nih thu a sawi bawk.

Transport Department Director chuan kumtin India ramah lirthei accident avangin mi 1,60,000 chuang zet an thih thin thu leh an zinga 83% chu thalai hnathawk rual an nih thu pawh sawiin, “Hei vang hian India-in a GDP 2.5%-3% hloh ziah ang a ni,” a ti a. Ministry of Road Transport & Highways (MoRTH) hnuaia Scheme hrang hrang tarlangin, Good Samaritan Law hnuaia accident tawk bawihsawmtute pawisa dawn theih te, Accident tawkte Cashless Treatment hmanga Empanelled Hospital-a an inenkawl theihna tur te, a sutu hriat loh (hit and run victim)-te inenkawlna tur te a sawi a. State sawrkawr pawhin nasa takin tan a lak thu te pawh a sawi bawk.

Kumin hi Mizoram-a ‘Road Safety Month’ hman a nih vawi 4-na niin Thupui atan ‘Sadak Suraksha – Jeevan Raksha’ (Road Safety – Life Safety/Fimkhur la, i nun humhim rawh) tih hman a ni a, nimin-a a hawnna hun hman hi Transport Department Secretary C. Lalruaia chuan kaihruaiin Road Safety Month puala thutiam chhamrual a ni.

Road Safety Month hman mek pual hian kawng hrang hranga mipuite zirtirna kalpui dan tur ruahman niin lirthei chetsual avanga thi awm loh thla, ‘Zero Fatality Month’ atan puan a ni bawk a, District hrang hrangah pawh hun hman a ni bawk ang.