Industrial Growth Centre (IGC) leh Export Promotion Industrial Park (EPIP)-a ram sawiho a ni

Industrial Growth Centre (IGC), Luangmual leh Export Promotion Industrial park (EPIP), Lengte chhunga harsatna hrang hrang awm te chinfel dan tur ngaihtuahin niminpiah tlai khan Commerce & Industries Department leh Land Revenue & Settlement Department hotute chuan Joint Meeting an nei a, he hun hi an Department-a Minister ve ve te pawhin an telpui a ni.

He Meeting-ah hian C&I Minister F. Rodingliana chuan Sawrkarin thalai, Industry din duh tak tak tute an ngaih pawimawh thu leh Industrial Area-a ram atana puan chhunga dan lova awm mekte chungah khauh zawka dan anga hmalak a tul thu a sawi a. Industry din nana Sawrkarin Plot allotment a pek, sawrkarin a pek anga hmang lo te pawh thangthar Industry din duhte hmakhua ngaia an Plot cancel sak thlenga hmalak a tul tur thu a sawi a.Revenue Minister B. Lalchhanzova pawhin Department pahnihte inkarah thawhhona tha leh tanrualna a awm a pawimawh thu sawiin, Inter-Departmental Collaboration tha leh Convergence Network tha tak hnuaia thawhho zel a tul thu a sawi bawk.

He Meeting-ah hian Village Council-te chu huan atan ram pe theitu an nih loh avangin VC Pass-in tumah ram neitu nihna a pek theihloh thu leh hemi chungchanga High Court ruling leh sawrkarin Office Memorandum a lo chhuah tawhte pawh thlirho a ni a. Luangmual Village Council area hi kum 1971 khan Protected Area-a puan a nih tawh avangin VC in ram pek theihna an neih loh thu leh dan lova ram lo pek tawhte pawh kum 1972 khan cancel vek a nih tawh thute leh hemi chungchanga District Council-in Executive Order a lo chhuah tawhte pawh thlirho a ni bawk a. Industrial area chhunga VC Pass awmte chu dan dinglai anga chingfel thuai tura hmalak ni se tia rel a ni.

C&I Department-in Industry din nana plot a pek zingah a nihna tur anga hmang lo leh hma la tha lo an awm thu leh chung zinga engemaw zat chu an Plot cancel a nih tawh thu sawilan a ni bawk a. Plot pek tawh, pek an nih anga hmang lo leh hma la lo te chungah pawh Industrial area (Management, Regulation and Control) Act 2008 zulzuia hmalak a nih zel tur thu pawh sawilan a ni bawk.

Chak zawka hmalak a nih theih nan Commerce & Industries Department leh Land Revenue & Settlement Department Officers-te telna Joint Task Force din turin he Meeting-ah hian rel a ni a. He Task Force hian IGC, Luangmual leh EPIP, Lengte-a ram chhunga harsatna awmte enfiahin heng ram chhunga Pass nei nia inchhalte pawh an pass dinhmun uluk takin an enfiah ang a, dan anga hmalakna tur pawh a duang ang. Task Force hmalakna leh rawtnate hi Department pahnihte hian thlirzui zel tur niin a tul angin hma an la chhunzawm zel dawn bawk a ni.