AAY leh PHH beneficiaries te tan Ration buhfai a thlawnin semchhuah mek a ni

Sawrkar laipui ruahmanna anga AAY leh PHH beneficiaries te tan kumin chhung Ration buhfai a thlawna sem tur chu Retailer-ah semchhuah tan mek niin Retailer thenkhat te chuan mipuite hnenah an sem tawh a. Mizoram FCI Kudam-a buhfai rawn thleng te chu kum 2022-2023 Crop Year-a thar a nih thu FCI hotute chuan an sawi.

Food Corporation of India (FCI) Foundation Day vawi 59-na lawmna Inrinni kaltaa FCI kudam tual zawl, Tanhril-a buatsaih ah FCI, Divisional Office Aizawl mawhphurhna la mektu Zodinpuii Ralte chuan FCI hmalakna te tarlangin, National Food Security Act (NFSA), 2013 hnuaia AAY leh PHH beneficiaries te tan sawrkar laipuiin kumin chhung buhfai a thlawnin a sem dawn tih sawiin, tunah hian Retailer ten an sem tan mek tawh tih a sawi a. He ruahmanna hi a tul anga pawhsei tura tih a nih thu pawh sawiin, tuna buhfai sem mek Grade A chu Fortified Rice-a thlak vek tura ruahmanna kalpui mek a nih thu a sawi bawk a, Fortified Rice chu mihring ei atan a hlauhawm loh tih sawiinm mithiamten uluk taka an buatsaih a nih bakah Iron, Folic Acid leh Vitamin B-12 a tel avangin mihring tan a tha hle zawk niin a sawi a. Mizoram a buhfai kan dawn, FCI Kudam-a rawn thleng tharte chu kum 2022-2023 Crop Year a tharchhuahte an nih thu sawiin, kan vannei takzet a ni, a ti bawk.

He hun hmanpuitu Land Revenue & Settlement Minister Lalruatkima chuan Khaw-zawl-a FCI kudam MT 3000 leh Sairang-a FCI kudam MT 1000 lenna sakna turah pawh Revenue Department lam chuan an tih tur an kut-a tla chu an tihfel sak vek tawh tih sawiin, tluang taka kudam tha leh changtlung tak an sak zawh thuai theihnan duhsakna a hlan a, Fur laia buhfai khamkhawp kan hmuh reng theih nan heng kudam te hi an tangkai lehzual dawn a ni, a ti bawk.

He huna tarlan a nih danin FCI hian Mizoram pumah Food Storage Depot (FSD) 6 nei mekin a dang 2, Sairang leh Khawzawl Kudam te pawh reilote ah sak zawh beisei a ni a. Tun dinhmunah FCI Kudam, Tanhri-lah hian buhfai quintal 20,310 a awm a ni.