Chief Secretary in hmanpui

Mizoram Chief Secretary Dr. Renu Sharma chuan nimin khan Govt. Mamit College-ah Mizo-ram Political Science Association Conference, 2022 leh 'Mizoram Since Independence : Change and Development in Polity and Society' tih thupui hmanga National Seminar neih chu a hmanpui a, India hmarchhak-ah Mizoram-in Peace Accord hlawhtling tak kan nei thei chu lawmawm a tih thu sawiin, State ralmuang ber kan nih angin mipuite kan zalen a, tunah hian kan State per capita income pawh kan national average aiin a tam phah a ni, a ti a. Heibakah hian Mizoram State GDP kumtin 8%-a a punna chu mipui hian kan chhawr mek tih pawh sawiin, chutihrual chuan inrenchemna uar a, kan leilung hausakna te tha tak leh fing taka haichhuak a, tangkai thei ang bera a hmanna tur dik taka hmang turin he huna kalkhawmte a chah bawk.