Tuikum lui tui pump kawngah harsatna thleng

PHE Department in Serchhip khawpui chawmna atana Tuikum lui tui an pump-na Electric khawl chu a chhiat avangin mipuite hnena Tui semchhuah kawngah harsatna a thleng mek.

Thudawn danin PHE Department hian Serchhip mipui chawmna atana Tuikum lui an lak hi mipuite hnena sem turin Tuikum atangin Electric khawl leh Diesel khawl hmangin an pump thin a, Electric khawl Pump Set hi August 26, 2022 atang khan hman theih loha a chhiat avangin Tui pump kawngah harsatna a thleng mek a, he khawl chhia hi kum 2011-a commissioned kha niin kum 11 vel hman a nih hnuah chhiain tunah hian Diesel khawl hmang chauhin Tui hi pump theih a ni a. Diesel khawl hi a chak avangin Tuikum lui pipeline hlui tawh, kum 25 vela upa hian a dawl meuh lo tih thawktute chuan sawiin, ni 5 vel zet chu Pipeline hi a chhiat tawh thu leh heng te hi theihtawp chhuaha siamthat hna thawk nghalin darkar 4 chhung vela an siamthat theih thin thu an sawi a, Diesel khawl chauh hmanga tui an pump theih hnu hian ni khat-ah darkar 10 chhung tui pump tura chhutin Oil dang tel lovin Diesel ringawt pawh litre sang khat chuang hman a nih tawh thu sawiin, hetianga tui pump kawnga harsatna a thlen avang hian Tui sem hna thawktute pawh nasa taka tangin mipui ten harsatna nasa zawk an tawh loh nan hma an lak reng thu an sawi a ni.

PHE Department hotute chuan he khawl chhia siamthatna tur atan hian a parts an mamawh te an Order tawh tih sawiin, amaherawh chu hei hi nei mah se a bun chhung nen a rei dawn avanga harsatna thlen zel dan tur hriat theih a ni lo tih an sawi a, mipuite chu tui renchem tur leh ruahtui tla te khawl hram hram turin an chah bawk a ni.