Sorkar laka lungawilo CSS Hindi Teacher ten nimin atangin School an kai duhlo

Mizoram-a CSS Hindi Teachers te chuan thla 10 zet hlawh an lak tawhloh avanga an lungawilohna lantir nan nimin a\ang khan School an kallo.
Hemi chungchanga CSS Hinti Teachers in thuchhuah an siam dan chuan thla 10 zet hlawh an lak tawhloh avang hian harsatna nasa tak an tawk mek tih an sawi a, hemi avang hian School kal chhunzawm zel thei an nih tawhloh thu leh zirlai, zirlai nu leh pa leh School-a thawk te hriatthiamna an ngen thu an tarlang a. Nimin a\ang khan thu leh awm hma loh chuan School an kal dawnlo tih an tarlang a ni. He an thuchhuah ah hian an hmalakna ngai pawimawh lova School leh Office a thawk te kal lui kan awm a nih chuan an chungah action lak a nih pawhin engmah sawibuai theih a ni lovang tih an tarlang bawk. Tarlan tawh angin CSS Hindi Teachers te hian thla 10 zet hlawh an lak tawhloh hnuah an hruaitu te hmalakna chu duhkhawp lovin kar kalta khan an pawl hruaitute chu bang tura an tih angin an bang a, hemi hnu, kar kalta Nilaini a\anga Zirtawpni thleng khan Pen down strike neiin School kal siin hna an thawk duh lova, he an hmalakna hian awmzia a neihloh avangin nimin a\ang khan a huhovin School hi an kai duhlo leh a ni.
Hetihlai hian Education Minister, H. Rohluna chuan CSS Hindi Teacher te chungchangah hian Central in min ngaihthah thu sawiin, “CSS Hindi Teacher te hi tun February 2017 thla tawp hian an tawp dawn a. Hei hi hriain Education Department ka chantirh (February 2014, UPA sorkar lai) a\ang khan ka nawr a. Lok Sabha inthlanah UPA an chak lo zui ta a. Tuna an kalphung tharah pawh hian nasa takin kan nawr reng a, awmzia a awm mawh hle” a ti a. CSS Hindi Teacher hi India ramah Nagaland nen chauh Mizoram hi pek kan nih thu sawiin, Nagaland pawh an buai ve khawp mai. Anni phei chuan keini aiin zirtirtu an la ngah zawk a. Mizoram hian 1305 post a neih laiin Nagaland chuan 1379 an nei a ni” a ti a. “Central sorkar hian CSS Hindi Teacher min pek hi kan hlawkpui leh pui loh zirchianna ‘Evaluation’ neih te te an tum a. Hemi atan hian midang (third party) Lucknow-a pawl pakhat an hmang dawn a, thla thum chhunga zawh turin an ti a, hemi hnuah hian pek zui chi kan nih leh nih loh an tichiang dawn a ni,” tiin Minister, H. Rohluna chuan a sawi a. Hindi Teacher te hi State sorkar tan chuan rawih chhunzawm an harsat dan sawiin, Minister chuan, “An thla khat hlawh ringawt pawh hi cheng nuai 300 dawn lai anih avangin kan state sum a\ang chuan chuti maia rawih chhunzawm thei kan ni lo” a ti bawk.

Popular News

Mizoram-ah Faina Hapta hman \an leh a ni

Retailer bukna diklo 3 man