PRRS avanga Serchhip District chhunga Vawk chan te hnenah sorkar a\anga ralna sum semchhuah a ni

Kum 2016 chhunga Porcine Reproductive and Respiratory Syndrome (PRRS) vanga Serchhip District chhunga Vawk chan chhungkaw 107 te tana Mizoram sorkarin a ralna sum a ruahman chu nimin khan a dawngtu turte hnenah semchhuah a ni.

Vawk hri leng, PRRS avanga Vawk chan Serchhip District chhung ami te hnena ralna sum hlanna hun hi Serchhip P&E Veng YMA Hall-ah neih a ni a, he hun hi Serchhip District Bawrhsap, Sangchhin Chinzah chuan khuallian nia hmanpuiin vanduaina tawk chhungkua te hnenah hian sorkar in a ruahman ang ralna sum hi a hlan a, he hunah hian Bawrhsap chuan PRRS vanga kum 2016 chhunga vawk thi, in report zawng zawngte ral nachang hria AH & Vety Department te an fakawma a hriat thu a sawi a. “Kan ranvulhte hi eng ran pawh nise chhungkaw member anga kan en \hin te an ni a, an thih leh an bo in kan rilru a na \hin a ni. Chung thil hrethiam sorkar, ranvulhtute hmakhaw ngaitu kan neih avangin kan vannei em em a; heti khawpa sorkarin min puih si chuan, nasa zawka intodelh zo ngei tura ran kan vulh sauh sauh a ngai a ni,” a ti. Bawrhsap hian, PRRS natna hi ramdang ran kan chawkluh a\anga kan neih a ni tih sawiin, ranvulh lama kan intodelh loh vanga kan tawrh natna a nih thu a sawi a. Hei vang hian ranvulhtute tan hmalakna tur tam tak, chona lian tak a awm reng a ni, a ti a. Vanduaina tawka ralna dawngtu chhungkaw 107 te a lawmpui thu a sawi bawk a ni. Bawrhsap hian a dawngtu mi sawm te hnenah ralna sum hi a hlan a, midangte chu AH & Vety, Serchhip a thawktuten an pe chhunzawm a ni.
He hunah hian Chief Vety Officer, Dr. R. Lalmakthanga chuan Vawk chan te tana ralna sum semchhuah dan sawilangin District chhung khaw pakua (9) a\anga kum 2016 chhunga PRRS natna avanga vawk chan chhungkaw 107 te vawk hloh zat chu 507 a nih thu a sawi a. An zinga 260 hi a note niin, 103 chu a \hanglai an ni a, a dang 144 chu a puitling sa tawh te an ni. A note leh a \hanglaite hi sorkar hian Rs. 500 \heuhva ralin, a puitling hi Rs. 1000 in a ral a. Serchhip District chhunga ralna a pek zawng zawng hi Rs. 3,25,500/- a ni.
Vawk chan avanga sorkar Ralna dawngtute aiawha thusawitu Vanlalruata chuan, kan ranvulhte an thih palh hian \henawm khawveng te tan chuan eng nilo mah se, a neitute chuan mittui nen an sun fo \hin tih a sawi a. Mi tam takin eizawn nan an hman avangin an tan chuan chhiatna a tlin thu sawiin chutiang dinhmuna ding an nih hriaa sorkar in ralna a pe chu mak an tih thu leh ropui an tih thu sawiin, thlamuan thlak an tih thu a sawi bawk.
He hunah hian Serchhip Joint VC President, PC. Siamliana leh Serchhip DIPRO, K. Saitluanga te pawhin thu an sawi bawk.
Nimin a Vawk chan te ralna inkhawm kaihruaitu Dr. Lalnghinglova, DVO Serchhip chuan Mizoram in PRRS kan tawrh dan tlangpui sawiin kum 2013-ah Mizoram-ah PRRS natna a lo lan thu leh, kum 2014 leh 2015 ah a reh deuh a, kum 2016-ah a rawn nasat tak viau thu sawiin, chhungkaw tam takin an Vawk an chan tih a sawi a, kum 2017-ah hi chuan Champhai District-ah sawi deuh awm mahse a nasa lutuk lo niin an hriat thu a sawi a. Tuna vawk thi sorkar in a ral te hi kum 2016 kum-a thi, an hnena report te an nih thu leh NLUP leh \anpuina dang a\anga vawk neitute chauh nilova PRRS avanga vawk thi hrim hrim te an nih thu a tarlang bawk.
Tarlan tawh angin Mizoram sorkar chuan PRRS avanga kum 2016-a Vawk chan te tan hian cheng nuai 30 a ruahman a, Mizoram-ah hian PRRS vang hian Vawk thi 5812 a awm nia chhinchhiah niin District hrang hrangah Vawk thi ralna hi semchhuah \an mek a ni.

Popular News