Mizoram University Students’ Council in MZU-a zirlai leh thawktute kal tur an dang

Mizoram University Students’ Council chuan an thilphut tih hlawhtlin a nih loh avangin nimin a\angkhan Mizoram University-a Zirtirtu leh Non-Teaching Staff-te Office kai rem ti lovin, hnathawktu Office kai tumte pawh an dang a. MZU Vice Chancellor chungchangah hian BJP Mizoram Pradesh chuan hma an la mek tih an sawi bawk.

Mizoram University Students’ Council chuan a hma lama an lo rel tawh ang leh Union Minister for Human Resource Development, Prakash Javadekar hnenah pawh September 5, 2017 thlenga Vice Chancellor nghet an la neih loh chuan Mizoram University-a Academic leh Non-Academic Activities zawng zawng chhunzawm an phal loh tur thu an lo sawi tawh angin nimin khan Mizoram University-a Zirlai ten Class an kal lova, Zirlai pungkhawm ten Zirtirtu leh Non-teaching Staff-te pawh an Office kai remti lovain hnathawk Office kai tumte pawh an dang a ni.
Mizoram University Students’ Council chuan vawi engemaw zat Central sorkarah Regular Vice Chancellor an mamawh thu an lo thlen tawh tih sawiin, Mizoram University Teachers’ Association pawhin Press Conference hial nei tawhin Central lam a\anga chhanna an hmu mai lo tih an sawi a. Hetianga Central sorkar a ngawi reng hi Mizoram University Zirlaite hmuhsitna-ah an ngaih thu leh September 6, 2017 hma ngeia Vice Chancellor nghet dahsak tura phutna hi August ni 28 khan an thlen leh bawk tih an sawi a. Chhanna engmah an dawn loh avangin MZUSC chuan Mizoram University-a Academic leh Non-Academic activities zawng zawng an dang chat ta tih an sawi.
Nimin a MZU zirlai nawrh huaihawtna-a kalkhawmte hmaah Mizoram University Students’ Council Vice President, Malsawmsanga chuan, “Mizoram-ah hian Central University a awm ve tih hi Central sorkar hian a theihnghlih em ni? Hei leh chen Vice Chancellor nghet kan nei lo hi Mizoram pum ang pawhin a zahthlak a, India-ah min ngai a nih chuan min ngaihven rawh se,” tiin Central lam thuneitute ngenna thu a sawi a. Zirlai kalkhawmte chuan lungrual takin “Mizo-ram University-in Vice Chancellor nghet a neih hma chu Academic and Non-Academic Activities zawng zawng dan chah ni rawh se,” tiin resolution an siam bawk.
Nimin zing a Mizoram University Students’ Council in MZU Office kai tur an danna ah hian MZU Vice Chancellor hna chelh mektu leh MZU Registrar te pawh Office kai tur pawh dan an ni a, amaherawh chu zirlaite ngenna chu zawmin harsatna awm lovin an kir leh a ni.
Hetihlai hian BJP Mizoram Pradesh chuan Mizoram University-in Vice Chancellor chungchang ah hian hma an lak mek thu nimin khan thuchhuah siamin an tarlang a. BJP Mizo-ram Pradesh in thuchhuah siama an tarlan danin Mizoram University Student’s Council (MZUSC) in Mizoram University-in Vice Chancellor nghet kumhnih dawn an neih tak loh avanga Vice Chancellor dah ngheh thuai phuta an hmalakna chu awm an tih thu leh New Delhi-a cham mek BJP Mizoram Pradesh President, Dr. JV. Hluna chuan zirlaite hmakhaw ngaiin he harsatna hi chinfel anih a, MZU-a zirna a pangngaia a kal leh thuai theihna turin niminpiah khan a changtu Minster leh Official te chu Vice Chancellor chungchang hi a sawipui tih an tarlang.
BJP Mizoram chuan Union Minister of Human Resource Development, Prakash Javadekar chuan BJP Mizoram Pradesh President thu thlen chu a ngaih pawimawh thu leh MZU-in Vice Chancellor nghet a neih thuai theihna tura hma a lak nghal thu a lo hrilh tih sawiin, niminpiah vek khan Vice Chancellor tur hi Ministry lam chuan tifelin, Prime Minister, Narendra Modi leh BJP National President, Amit Shah approval lak a nih hnuah President pawmpui tura Rashtrapati Bhavan-a thawn nghal a nih tur thu a lo hrilh niin an tarlang bawk.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai