KS. Thanga’n Office luah \an

Mizoram sorkar-a Minister of State atana tunhnaia lakluh thar, KS. Thanga chuan nimin khan New Secretariat, Khatla-a a Office thar tur a luahlut a, Pathian hnena Office thar hlanna hun hman a ni.
Minister of State atana lakluh tak, KS. Thanga’n a Office a luah luhna hun hi Home Minister, R. Lalzirliana chuan kaihruaiin Commissioner Lalzamlova, Territorial Commander, NE India Eastern Territory, Salvation Army in Pathian hnenah \awng\aiin hun a hmang a ni. He hunah hian KS. Thanga chuan thu sawiin, “Chief Minister zahawm tak duhsakna ka dawng a. Kei aia thiamna sang zawk ka \hiante MLA tam tak an awm laiin, phulo ka inti hle a. Chuti chunga Minister \hutthlenga \hu tura min duhsak tu kan Chief Minister chungah thinlung takin lawmthu ka sawi tak meuh meuh a ni,” a ti.
KS. Thanga chuan Dan siamtu, Legislator ten Dan an zah a ngai tih sawiin, “Ram tana thutlukna siam kawngah hian mawhphurhna sang tak kan nei tawh dawn a. Thuthlukna siam sual leh tihsual a pawi hle dawn a. Chung avang chuan thuthlukna kan siam sual loh nan Pathian hian min kalsan ka ring lova, senior zawkte leh kan hotute thurawn ka la zel dawn a. Ram tana \ha turah reng reng inthlahrung hauh lovin rawtna min pe \hin turin mipuite ka ngen cheu a. Min finchhuah zel turin ka sawm che u a ni,” a ti bawk.
He hunah hian Finance Minister, Lalsawta pawhin KS. Thanga lawmpuina thu sawiin KS. Thanga hian kum 8 leh a chanve zet Parliamentary Secretary niin sorkar document pawimawh tak tak Finance, Planning, Law & Judicial, Agriculture, Horticulture department te a khawih tawh tih a sawi a, Decision siam ngai tam tak a lo tih ve tawh thu leh Minister nih pawh a phu thu a sawi bawk. KS. Thanga hian Parliamentary Secretary ni \hin, H. Zothangliana’n Office hman \hin chu a luah dawn a ni.

Popular News