Assembly Session zawhna leh chhanna

Nimin a Assembly Session-a zawhna leh chhanna huna tarlan thenkhat :

Land Revenue & Settlement Department Minister Pu R.Romawia chuan kum 2013-2014 chhugin Leiman/In hmun lo ram chhiah atangin Rs.5,8627,916 chhiah lak a nih thu a sawi. MNF Member Pu Lalruatkima zawhna chhangin Revenue Minister chuan Leiman/In hmun lo ram atangin sawrkarin 2010-2011 chhung khan Rs.5,30,80,888 lak a ni a,2011-2012 chhungin Rs.3,67,95,682,2012-2013 chhungin Rs.4,30,95,682 te chhiah lak a ni. Pu Ruatkima'n Leiman/In hmun lo ram chhiah tunhnai ah tih pun tum a ni em/ tia zawhna a zawh chu Revenue Minister chuan Lei man tih pun tum a nih thu house hrilh in, lei man hi tih pun tum ni mahse tum khatah sang taka tih pun aiin, tlem tlema tih pun zin deuh turin sorkarin ruahhmanna a siam thu a sawi. Leiman tih pun tumna chhan zawhna chu Revenue minister hian chhangin, Land Revenue & Settlement Department -in kum khat-a pawisa a hmuh theuih zat a tlem em avangin rate hi tih san tum a ni a ti a. Thil man pung zleah ram leilung hlutna a lo san ve zel avangin tih pun hi a hun tawh a ni tiin a sawi bawk. ============= 

Mizoram sorkar-in 2014-2015 chhunga leiba a neih zat tur a ruahhman chu vaibelchhe 5651.27 a ni tih Finance Minister Pu Lalsawta chuan a sawi. Mizoram State Legislative Assembly session ni thumna leh a tawp ni tur nimina neihah MNF Member Pu Lalruatkima chuan Sorkar leiba chungchang zawhna a zawt a. Ruatkima zawhna chhangin Finance minister chuan kum 2011-2012 chhung khan Mizoram sorkar-in vaibelchhe 4548.45 bat a nei a, 2012-2013 chhungin vaibelchhe 5114.20 ba in, 2013-2014 chhungin vaibelchhe 5334.81 lai a ba a ni. Pu Ruatkima'n sorkar-in leiba tihniam turin engtinnge hma a lak tia zawhna chu chhangin finance minister chuan sorkar-in a tul tawpah loh chuan loan lak loh a tum tih a sawi a. Tun hma lam atanga sorkar-in leiba a lo neih tawh chu a hun taka rulh tum a nih thu te sawiin, state-in kan thawhchhuah ve tur State's Own Tax leh Non-Tax revenue te a theih ang nga tihpun zel tum a nih thute a sawi a. Finance minister chuan, State-in sum hnar thar Additionbilisation(ARM) kan neih theih apiang zawn belh zel turin tan lak a ni ang a ti bawk. 

============ 

Chief Minister Pu Lal Thanhawla chuan, tun ministry-ah Minister leh Parliamentary Secrectry motor tha lo neite tan motor thar lei a ni a ti. Nimin Mizoram State Legislative Assembly session neihah MNF Member Pu Lalruatkima zawhna chhangin Pu Hawla chuan tun ministry-ah hian minister leh Parliamentary Secretary motor tha nei lo te tan Verna 1.6 VTVT SX 'O' leh Support Vehicle atan Bolero lei a nih thu a sawi a. Verna motor hi nuai 9.60 a lei a nih thu sawiin, Support Vehicle Bolero hi nuai 7.96-a lei a nih thu House a hrilh bawk a ni. Zawhbelhna chhangin Chief Minister chuan motor hlui chhawm tlak chu an chhawm thu kleh tunah motor hlui tawhte thlakna tur a tul angin kan lei zel dawn a ni, a ti a, Rulling member Pu Zothangliana chuan kum 2005-06 a MNF sorkarin Baleno Car engemawzat a lei laia Mizoram sorkar liability 108.9% chu tuna motor an lei hian 49.81% nia a hriat thu a sawi a. Zawhna neitu Pu Lalruatkima chuan MZ01C 5891 Baleno car chu a kawllo turin akum chanve lai a kawl tawh thu leh sawrkarin a rawih nawn hnuah verna leh gypsy te a kawl thu a sawi chu house leader chuan thil diklo chu tihdik tur a ni mai a, mi thil tithei fal hi an awm thin a, chutianga a kawl lo turin an kawl chu thil tenghneng tal a niion sawrkar tan hawisan mai chi anih loh thu a sawi a ni. 

 ---------------- 

Dr. K.Beichhua zawhna June ni 14, 2014 a Pu S.Beirakhu MR Skill-II labour hnathawhna hmuna current man vanga boral ta hnenah zangna dawmna pek anih leh nih loh te, a mawhphurtu chunga action lak a nih leh nih loh zawhna chu Power & Electricity changtu Chief Minister Pu Lal Thanhawla chuan zangnadawmna pek ala nih loh thu leh mawhphurtu chhui mek anih thu te, mawhphurtu chungah dan anga action lak anih thu tein a chhang a. Zawhna neitu in chhhim lama chhiatna hrang hrang thlenga sorkar atanga tanpuina pek an nih loh dan leh hmun danga thlengah pek an nia a sawi chhangin Current man hi department-in ral theihna a nei lo a, hetiang vanduaina tawkte ralna tur dan neih hi a tul a ni tih Pu Lal Thanhawla chuan a sawi a, Natural Calamity in a huam chinah dan anga hmuh theih a awm thu sawiin leimin leh chhiatna thenkhat thleng zawhna neituin a saiw takte chu natural calamity huam anih avanga pek an nih thu a sawi.

 ------------------ 

Eptu member Er. Lalrinawma zawhna Gas a pangaia a van viau lai hian Black a lei tur a awm reng hi sorkarin a hria em? engtia hmalak nge a tum tih leh zawhbelhna te chhangin Food, Civil Supply & Consumer Affairs Department changtu Minister Pu John Rotluangliana chuan sorkarin a hriat thu leh NGO te nen tang tlanga dapchhuah hna thawk tura Department in hmna a lak mek thu a sawi a. Zawhna neituin Gas hi a harsa mai nilovin a vang a ni a, LPG Control order anga black hi tibo tura tan lak a ngaih thu leh IOC hotute a kawmnaah Kawnpuiah black-na dawr a awm thu an sawi te tarlanginYMA ten an vei a, hma an la a, sorkar tan pawh a tlawm thlakin a lang thei hial em tih sawiin, tun aia chak zawka hmalak dan kawng zawm se tih a sawi chhangin FCS&CA Minister Pu John Rotluangliana chuan Sawrkar chu Central YMA leh Consumer Union te nen thawk hovin an nin Highway chang se tih anih thu a sawi a, hmun hrang hrangah an staff te leh YMA te nen tan an la mek tih a sawi a. Gas hi kan buaipui nasa a, Dealer leh Company te inkara ni a, sorkar engmah hriattir ani thin lo a, Agent ah company in an la a, consumer hnenah an hralh mai a, direct a sawrkar a involve loh avangin thiltih a har thu a sawi a, hetihlai hian eptu lamte chuan sorkar chu inthiar fihlim tum ringawt ah an lo puh a, House leader, Chief Minister Pu lal Thanhawla chuan Gas hi Irag atanga lakluh a ni a, ram, buai avangin Iran kaltlangin India in kan la lut a, gas alo harsatin state dangah sorkar an puh luai luai ngailo a, company lam ah puh thin thu House a hrilh a ni. 

------------------ 

MNF member Dr. K.Beichhua zawhna Civil Hospital saiha a Gynaecologist leh Paediatrician dah theih loh chhan leh Saiha dist a nausen kum khat hnuailam thihna tam lutuk tihniam tura sawrkar hmalakna a zawh chu chhangin Health Minister Pu lal Thanzara chuan Civil Hospital Saiha-ah hian Gyenaecologist leh Paediatrician dah an nih loh chhan chu doctor indaihloh nasat em vang a ni a, remchang hmasa berah Gynaecologist leh Paediatrician dah tuma hmalak mek anih thu a sawi a, Nausen tihna titlem turin Maternal care hnuaiah chihrang hranga hmalak a nih dan te a sawi. Zawhna neitu chuan khawvelah Somalia ah nausen thihna IMR hi tam berin Saiha chu 7 na a nih thu sawiin hetianga tihdan phunga hmalakna mai chu tawk a tih loh thu leh kumin April-June ah pawh 48 an thih leh tawh thu sawiin, 'lo thi mai mai rawh u' min ti dawn em ni tiin duh thawh takin a zawt a, Minister chuan theihtawpa hmalak anih dan te sawiin Saiha lama IMR tam chhan chu ramri lehlam ami kan hmui tel vang nia a hriat thu leh tunhnaia raicheha thi pawh a thi put tawh hnua damdawiin pan chauh nia a hriat thu a sawi a. House Leader Pu Lal Thanhawla lo ding ve lehin IMR hi Mizoram hmingchhiatna anih thu leh literacy rate ah sang tak si, IMR sang si chu thil awm lo tak anih thu sawiin damdawiina nau nei tur te, damdawiin a neih loh pawha ASHA te hmang tangkai ni se a that thu a sawi a, zuk leh hmuama insum a tul thu a sawi bawk. 

 ----------------- 

Eptu member Er Lalrinawma'n Food Security Mizoramah hman tumna a awm leh awm loh, hman ni ta se sum sen belh ngai turte a zawhna chhangin FCS&CA MInister Pu John Rotluangliana chuan hman theih dawn leh dawn loh ngaihtuah mek a nih thu a sawi a. Food Security Act hian Mizoram mipui zawng zawng zawng a huam thei dawn lova, tuna kan kal dan hi chuan mi zawng zawng a huma a ni a ti a. Tuna normal alocation bakah buhfai hi a man tlawma hmuh theih ang ang atangin quintal 80,000 vel thlatin lei belh a ni a, Govt. of India in additional allocation a pe dawn nge dawn lo, eng ang rate in nge a pek ang? Retailer charge, loadding, unloading charges leh inter-state transportation cost central sorkarin tih chian ala nih loh avanga sen belh tur chhut chhuah theih anih loh thuin a chhang a, zokhaw lamah mi 1 tan Kg 8 pek a ni a, Food Security Act hman chuan 5 Kg chauh a ni dawn a, Mizoramn tan food security act hi a chhenfakawm viau dawn lo a ni, a ti bawk.