Lenkawl

Serchhip District Sports Committee (SD-SC) chu nimin khan an Chairman leh Bawrhsap David Lalthantluanga hova thukhawmin hmalakna tur hrang hrang an sawiho.

Serchhip-a AH&Vety Department hotute chuan tun dinhmunah Serchhip District-ah African Swine Fever (ASF) hri kai hmuhchhuah a la awm lo tih sawiin, Vawk vulhtute leh a sa zuartute chu fimkhur se an duh thu an sawi.

Nimin tlai khan ruahsur leh a kentel Rial leh thli tleh in Serchhip District a nuai a, hmun thenkhat ah In chhia a awm.

Nimin May 2, 2024 kha Mizoram Baptist Kohhran Hmeichhe Pawl (MBKHP) Day vawi 86-na a ni a, Mizoram chhunga MBKHP Unit hrang hrangte chuan ‘Tho la, I Pathian ko rawh’ tih thupui hmangin he ni hi an hmang a ni.

Nimin zing-a thli tleh leh rial thawk avangin Mamit District-a New West Phaileng khua ah chenna In 2 chhiain Pukzing khua ah In 20 a chhe bawk a, Saitual District-a Sihfa leh Tualbung khua ah In pakhat ve ve a chhe bawk.

Nimin zing dar 3:00 vel khan Mizoram Police te leh Central YMA Kumpuan Sub-Committee te chuan Seling daiah Myanmar atanga dan lova rawn lut ni a rin Kuhva ro Trip 8 leh Escort motor pahnih an man. Thudawn danin, Kuhva ro te hi Truck ke 10 nei Motor 8-ah phurh niin Truck vengtu, Escort Motor 2 man tel a ni a, lirthei leh a khalhtu mi 10 te chu manin Seling Police Outpost pek an ni a, heng Kuhva phur Motor te hi Champhai atanga rawn kalin Khawzawl Gate an rawn paltlang nia hriat a ni. Dan lova Kuhva ro a sumdawnna hi a rukin kalpui reng nia a lan avangin Central YMA leh Police te chuan theihtawp chhuahin hma an la zui mek zel a ni.

Chief Minister Lalduhoma hovin nimin khan Mizoram State Policy Coordination Committee chu CM Office-ah thukhawmin thlai thar pali thlan-chhuah te lei dan tur chungchang an rel a. He hunah hian Thlai thar leikhawmna tur Warehouse neih tawhsa cheithat dan tur te, thlai chin tamna hmun a zira a thar sak belh leh Warehouse behchhana Processing Unit din theih dan turte an sawi a. Scheme dang nena thawkdun (convergence) a Processing Plant kalpui theih te pawh tarlan niin, Warehouse te hi rang taka bawhzui nise an ti. Heng bakah hian Thlai thlan bik palite kumina mipuiten an chin zat zirchianna kalpui mek leh thlai hrisel tak an chin theih nana Department hmalakna te leh loneitute hmanraw mamawh awm thei te pawh an sawi bakah Crop Insurance lama hmalakna te pawh report a ni. Khaw tina thlai chingtu pawl (society) din dan chungchang sawi niin hemi thu ah hian Cooperation Department lamin a rang lamin thuchhuah lo siam se an ti bawk.

Vaihlo do kawnga National Health Mission hnuaia hmalatu National Tobacco Control Prog-ramme (NTCP), Mizoram-a thawktute chuan nimin khan an hmalakna thlirletna leh intuaitharna hun ATI, Aizawl-ah an nei a, he hun kaihruaitu NHM Mission Director, Dr. Eric Zomawia chuan inkaichhawntheihloh natna, Non Communicable Disease (NCD) hrang hrangte thlen theitu langsar ber chu vaihlo zuk leh hmuam hman a nih thu sawiin, Cancer natna zinga 30% leh NCD nei zinga 30% te chuan vaihlo an hman thin thu a sawi bawk.

Kar hmasa Thawhlehni, April 23, 2024 atanga chin hriatloh a bo Chhingpuii (72), Kolasib Tuitha Veng chu khawtlang huapa zawn a nih hnuah nimin chhun dar 12:30 vel khan  Kolasib tlaklam Mangkhawnglui ral mual kawr, Mau chhehrawp hnuai ah chau taka hmuh a ni a, a theih anga bawisawma enkawl a nih hnuah mi tlawmngai ten zawn hawin kawng lakah a boral zui ta a ni. Chhingpuii hi Alzheimer nei nia rin a ni a, chhungkhat laina leh an Veng ten an zawn hnuah khawtlang huapin ni 2 zawn hman a ni.

Lumding leh Badarpur inkar Rel kawng chhia a awm avanga IOCL POL Depot, Silchar atanga Petrol leh Diesel a thiar theih rih loh avangin Mizoram-a Petrol Pump hrang hrangah Motor-a thun theih bak bur hmanga tuialhthei dawh khap rih a ni a. Hei bakah hian lirthei chi hrang hranga pekchhuah theih zat pawh bituk nghal a ni bawk.

Doordarshan Kendra leh Mizoram Indigenous Games Association (MIGA) buatsaih, Mizo hnam infiamna hmanga inelna ni hnih awh tur ‘Mizoram Indigenous Games 2024 (Inter Branch Competition) Mamit District’ chu nimin khan Mamit-a Mangkhawngdai Field-ah neih tan a ni a, YMA Branch 10 atangin infiammi 191 an tel a, Insuknawr, Insaihruipawh, Inbuan leh a huhova inelna – Inkawibah leh Inkepir hmangin an inel dawn a ni. Mizoram Indigenous Games 2024 (Inter Branch Competition) hi Serchhip District-a bultan a nih hnuah District hrang hrang ah a taltawl a neih chhoh mek zel a ni.

ZPM Thalai chuan ‘Mizoram State chhunga Political Party zinga Budget pawh la pharh ngai lo’ tia diriamna dawng thin ZPM party in Pathian leh mipuite duhsakna zara Feb. 27, 2024-a Mizoram State Budget 2024-2025 Finance Minister leh Chief Minister Lalduhoma'n Assembly Budget Session-ah atum khat nan alo pharh ve thei ta chu lawmawm an tih thu an sawi a. Sawrkar kumthar (Financial year) atanga bultana a hun taka Sawrkar hnathawk hlawh pek chhuah a ni ta chu Sum enkawl thiam Finance Minister leh CM ni bawk Lalduhoma kaihhruai sawrkar an chhuang takzet tih an tarlang bawk.

Nimin khan Champhai-ah District Level Committee on Myanmar and Bangladesh Refugee chu an Chairman leh District Bawrhsap James Lalrinchhana hovin an thukhawm.

izoram Rural Bank (MRB), Champhai Branch hnuaia Loan la, rul tha duh lo mi 6 te ram dahkham chu Champhai District Magistrate James Lalrinchhana thupek angin nimin khan chhuhsak an ni.

Excise and Narcotics Department changtu Minister Lalnghinglova Hmar chuan Mizoram-a ruihhlo hluar zel do tura tan la turin tlawmngai pawl bakah Kohhran te nen thawhho a ngai tih sawiin, Central YMA President Lalhmachhuana pawhin Zu leh ruihhlo hluar zel chu mipuiin ngai-a an neih mai a hlauhawm tih a sawi.

Kum 2021-2022 atanga chhutin Serchhip District-ah kumtin dan zawm lo-a puipunna hmuna meizu man an tam chho zel a, kum liamta 2023-2024 chhung khan puipunna hmuna meizu mi 92 zet man niin kum 2 kalta chhunga pupunna hmuna meizu man aiin an tam zawk a ni.

Malaria laka invenna atana Dichloro-Diphenyl-Trichloroethane (DDT) hman thin chu kumin June thla atangin a aia him leh tha zawk nia sawi, Deltamethrin-a thlak a ni dawn.

Bilkhawthlir Kuhva Chingtu Pawl Duty-te leh North Chhimluang Branch YMA leh Village Council tangkawp  chuan nimin zing khan Phaisen leh North Chhimluang inkar ah dan loa Myanmar atanga kuhva lakluh ni ngei a hriat motor pasarih atangin an man a, a vaiin bags 130 a ni.

Lawngtlai District chhunga tlawmngai pawl lian ber, Young Lai Association (YLA) kum 50 tlin lawmna chu niminpiah chawhnu khan Lawngtlai-a Areopagy-ah a hawnna neih a ni a, Central YLA President HC. Vanlalruatpuia chuan kumin chhunga YLA Golden Jubilee lawmna tur hi  a hawng a ni. Young Lai Association (YLA) hi Sept. 23, 1974 khan din niin Golden Jubilee lawmna atan hian May thla-ah Inter-Branch Football Tournament neiin October-ah Branch Zaipawl leh Hnam Lam intihsiak a ni anga, Sept. 23-ah Branch hrang hrangah a lawmna neiin November-ah ni thum chhung Jubilee lawmna pui ber chu Lawngtlai-ah neih a ni ang. YLA hian hian Sub-Hqrs 7 leh Branch 116 neiin, member 55760 an awm mek a ni.

Mizoram State Planning Board chu nimin khan an Chairman leh Chief Minister Lalduhoma hovin CM Office-ah an thukhawm a, Planning Board in hma a lo lak tawh te leh ruahmanna a siam te an thlirho. He thutkhawm ah hian Chief Minister chuan, Planning Board chu Mizoram hmasawnna tur ruahmanna tha leh fel fai a awm theih nana ngaihtuahna sengtu a ni tih sawiin, “In zirchianna te, in thurawn te, in ruahmanna te leh in thahnemngaihna ten nasa takin kan ram hma-sawnna a tichak dawn a ni,” a ti. Nimin-a thut-khawm ah hian Planning Board Vice Chairman Dr. Kenneth Chawngliana chuan an hmalak tawh chin te sawi hawnna a nei a. Chumi hnuah Prof. H. Lalramnghinglova, Member chuan Zau Policy for Sustainable Agriculture (under Land Reform Policy) an duan chu a sawifiah bawk a ni.