Vawiin ah vote thlak \ha leh dawn

Lawngtlai District chhunga 38-Lawngtlai East huam chhunga Polling Station Number 30-Tialdawngilung ah Vawiin hian inthlan\hatna neih a ni dawn.
He inthlanna neih tur atan hian Lawngtlai District Election Officer, 38-Lawngtlai East Assembly Returning Officer ni bawk Pu J. Hmingthanmawia chuan Election Commission of India in thuneihna a pek angin nizan hmasa khan hriattirna a tichhuak a, hriattirna tihchhuah ang chuan zing dar 7:00 AM a\anga chawhnu dar 4:00 pm thleng vote thlak a ni anga, vote tlate hi naktuk ni 12.12.2013 (Ningani) zing dar 8:00 am a\anga chhiar nghal tur a ni bawk. Tarlan tawh angin 38-Lawngtlai East A/C ah hian Polling Station 34 a awm a, heng zinga Polling Station 33 a vote tla te hi chhiar theih niin chhiar theih chinah hian INC Candidate Pu H. Zothangliana chuan vote 83 in hma a hruaia, Polling Station pakhat Tialdawngilung a vote thlakna khawl chu chhiar theih a nih ve tak loh avang leh he Polling Station a vote tlate hi vote 210 lai ni a record a nih bawk si avangin inlehthal theih a la ni bawk si a, Election Commission chuan hetiang hian ruahmanna a siam ta a ni. He inthlanna neih tur atan hian inbuatsaihna pawh kalpui nghal niin Polling Party te pawhin nimin khan an duty-na tur hi an pan nghal a, District Election Office a\angin Pu Vanlal-\anpuia, MCS, Master Trainer ni bawk chuan he inthlan thatna hi a hmunah a \hutchil nghal a ni. He Polling Station hi Lawngtlai a\anga khawchhak lam km 147 vela hla a awm niin, Phawngpui tlang chhimchhak lam Burma ram dep a awm a ni.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai