FOOD SECURITY HMANG THEI LO KHAWPIN SORKAR ‘SUM’ DINHMUN A CHHIA-MPC
MPC chuan thuchhuah siamin Food Security hmang ve thei lo khawpin Mizoram Sawrkar sum dinhmun a chhia niin an tarlang.
Nimin a MPC thuchhuah chuan, Central sawrkar chuan mirethei ten buhfai Kg khat Rs.3, wheat Rs.2, cereal Re.1 leka an lei theihna dan tur Food Security Bill a duang chhuak ta a. Food Security hi India rama miretheite tan chuan chanchin lawmawm theih tawp a ni a. India mipui zaa 67 (%)–in he scheme hmang hian duhsakna an dawng thei dawn a ni. Hemi atan hian Sawrkar laipui pawhin Cheng Vaibelchhe 125,000 lai a seng dawn a. Khawvela Food Security ropui ber leh lian ber a ni dawn ta a ni MPC chuan an ti. He Scheme hi a that em avangin Congress rorelna state leh Opposition rorelna state tam berin an hman nghal tur thu an puang a. BJP sawrkarna state pahnih Chattisgarh leh Madhya Pradesh phei chuan buhfai man hi Kg khatah Rs.1 chauh an la a, AIDMK sawrkarna Tamil Nadu chuan Rs.2 bithliahin kum engemaw zat an lo kalpui tawh nghe nghe a. Amaherawhchu Mizoram sawrkar thung chuan buhfai man tlawma miretheite lei tir theihna Food Security Scheme chu an hman ve theih loh tur thu Chief Minister-in a puang ta tlat thung a. He thu hi Sap chanchinbu leh khawtual chanchinbu hrang hrangah te a lo lang ta chuaih chuaih nghe nghe a ni. India ram state tam berten an tih theih ti thei ve lo, Central-a an zawmpui UPA sawrkar thu chhuak ni lehnghal pawh zawm ve thei lo khawpa sum leh pai dinhmun chhiaa Mizoram sawr kar min dah theitu Congress Ministry kan nei hi Zoram mipui tan a vanduai thlak tak zet a. Kan Chief Minister hi a thu sawi apianga ‘Miretheite khai chhuah’ tih leh ‘miretheiten lei rem an rah vena tur’ tih tawng kam sawi ri tamtu ber a ni a. Amaherawhchu a tak taka lan chhuah tir theihna hun remchang a lo thlen erawh chuan a tlanchhe hmasa ber a ni ta hlauh thung a. Miretheite inhnangfak vena tur he Food Security Scheme a tih puitlin ve theih loh tur thu a sawi hi, a kal tlangpui tak tak a nih ngat chuan, kan Chief Minister hi miretheite hmusittu (anti-poor) ah Mizoram mipui chuan kan ngai dawn a ni MPC chuan a ti. “Eng Project lian tham nge Mizorama Congress sawrkar hian kum 4 kal ta chhung khan buaipui an neih a, heti tak maia pawisa tlachham ber state-a Mizoram kan awm tak bik mai hi le?” tih hi MPC party chuan kan zawt nghal bawk a ni an ti.

Popular News

Mizoram-ah Faina Hapta hman \an leh a ni

Retailer bukna diklo 3 man