‘Chief Minister’s NLUP Special Scheme’ hawnna Serchhip-ah Chief Minister hova neih a ni.

Mizoram sorkar Flagship Programme, NLUP-a Line Department  ten Trade an siam thlang ve theilote dawmkanna tura ruahman ‘Chief Minister’s NLUP Special Scheme’ chu nimin (27th Aug. 2013) khan Chief Minister, Pu Lal Thanhawla chuan hman \an turin a hawng.

    Chief Minister’s NLUP Special Scheme hawnna puala inkhawm Serchhip DC’s Conference Hall-a neih ah hian Chief Minister, Pu Lal Thanhawla chuan sorkar in NLUP a kalpui mekah NLUP Trade pangngai thlanga hna thawk theilo mi engemaw zat an awm thu leh amaherawh chu heng mite hi \anpuina dawn mamawh ber ber te an nih si avangin he rua-hmanna hi siam a nih thu a sawi a, Mizoram-ah mirethei leh hausa kar a zau zel avangin NLUP hmangin hei hi tizim tura hma lak a nih thu leh an beisei aia Pathian in mal a sawm thu sawiin, NLUP hlawhtlinna turin rinawmna, taimakna leh dikna a pawimawh tih a sawi a, sum dawn tam ringawt chu a hlawhtlinna a ni lo tih a sawi bawk. NLUP chu an sem rei tial tial hnuah zelthel leh inthlahdah an inzep zeuh zeuh tih an hriat thu pawh sawiin, hemi kawngah hian zirtirna uar lehzuala thawh a ni chu lawmawm a tih thu a sawi a, tun dinhmuna duh anga NLUP \anpuina an sem chak theihloh chhan chu sum awmloh vang leh remruatna awmloh vang ni lovin sorkar hnathawk an indaih ngangloh vang a nih thu a sawi bawk.
    Serchhip District Addl. DC, Pu Lalsangliana kaihhruai he hunah hian District Level NLUP Implementing Committee Chairman leh District Bawrhsap ni bawk, Pi Juhi Mukherjee chuan inlawmna thu sawiin Chief Minister’s NLUP Special Scheme kalpui a ni ta chu lawmawm a tih thu a sawi a, hetiang ruahmanna sorkar in a siam chu miharsa leh rethei ber berte pawh sorkar in a hre reng tih tilangtu a nih thu a sawi a, Pu PL. Thanga, Vice Chairman NLUP Implementing Board chuan Key Note Address sawiin Pu Lalramliana Sailo, Member, DLIC chuan lawmthu sawiin he hun hi a khar a ni. He hunah hian NLUP hmalakna hrang hrang tarlanna lehkhabu, “New Land Use Programme leh Kut Hnathawktute” tih lehkhabu chu Chief Minister hian a tlangzarh nghal bawk.