PAN CARD an tih teh fo hi - Laldinpuia

Tunlai hian PAN CARD hi a lar hle a, a awmzia hria tam tak kan awm laiin a awmzia hre mumal mang lova neih a \ha an tih vanga siamtir ve ta ngawt lah tam tak an awm. A bik takin Taxation Department lam ten dawrkai te tan siam ngei ngei tur tiha thuchhuah an siam tak atang phei hi chuan he thil hi engemaw a awmzia le tih hi kan khawlai ti ti a ni ta fo mai. Chuvang chuan a kalphung leh a awmzia hi theih ang angin hrilhfiah i lo tum dawn teh ang.

Enge ni PAN card chu?

PAN CARD kan tih hi a lampum chu 'Permanent Account Number' tihna a ni a, he thil hi Income Tax Department ten Central Board for Direct Tax (CBDT) kaihhruaina hnuaia an hnuaia Tax petu te tana an card siam a ni a, tunah chuan ram puma document pawimawh ber a ni chho mek tawh a ni. PAN Card ah hian number leh alphabet inkawpin code a awm a, hei hi a card neitu nihna leh dinhmun kimchang tarlanna a ni. PAN Card hi hmun hrang hrangah an dinhmun hriatfiahna (ID Proof) atan hman \hin a ni.

PAN Card ah hian alphabet leh number inpawlhin code a awm a, heng code te hian entirna hrang hrang a nei a ni: Entir nan PAN Card number pakhat chu AHEPL9164H hi Pan Card number lo ni ta se a awmzia chu hetiang hi a ni ang –

A hmasa a alphabetic number pathum awm ‘AHE’ hi alphabet hawrawp hrang hrang AAA atanga ZZZ inkar ami a ni a, a hawrawp palina a ‘P’ hi a card neitu dinhmun tarlangtu a ni. ‘P’ chu individual (mimal) tihna a ni a, ‘F’ anih chuan firm, ‘C’ anih chuan company, ‘H’ anih chuan HUF, ‘A’ anih chuan AOP, ‘T’ anih chuan trust tihna te a ni. A hawrawp panganaa ‘L’ khian PAN Card neitu hming bul hawrawp a entir (L anih chuan a card neitu hming bulah emaw a hnam hming bulah emaw L a awm tihna). A dawt leha number 9164 awm khi number 0001 a\anga 9999 inkara code hrang hrang a Pan card neitu details hriat hran theihna tura an siam a ni a. A tawp bera alphabet awm ‘H’ hi chu PAN Card check-na number a ni thung.

Enge a pawimawhna? :

Income Tax petu te tan PAN Card hi neih ngei ngei tur a ni a, kum 2005 a\ang phei kha chuan Income Tax Department kaltlanga Challan siamah reng reng PAN card number hi tarlan tawh tur a ni. Tin, hemi bakah hian immovable property transaction chi reng reng, Inhmun leh ram leina te, motor leina ang chi reng rengah PAN Card hi hman zel tawh tur a ni a, tin, Rs. 25,000/- chin chunglam hmanna Hotel leh Restaurant-ah te leh ramdang a zin dawnah te PAN Card hi neih ngei ngei tur a ni.

Tin hemi bakah hian Telephone leh Mobile Sim Card book dawn te, Bank emaw Post Office emaw a Rs. 50,000/- chin chunglam deposit dawn te leh Mutual Fund a Rs. 50,000/- chin chunglam investment tih dawn te hian PAN Card hi neih a ngai a ni.

Engtianga dil tur nge?/Tunge dilsak thei? :

PAN dilna hi Form 49A hmangin dil tur a ni a, dilna form hi Income Tax department website a\angin download theih a ni. Tin, hei bakah hian agent te hnen a\angin dilna form hi lak theih a ni bawk.

PAN Card hi a dilna hmun tur bik leh ruat bik a awm chuang lova Income Tax Department hnuaia in register company/firm kaltlangin online in a duh apiang tan dil mai theih a ni. Mahni In lam a\ang pawhin Internet Connection neih chuan awlsam takin a dil theih bawk. https://www.utiitsl.com -ah te; https://www.applypanindia.in -ah te leh https://tin.tin.nsdl.com -ah te hian awlsam takin mahniin dil mai theih a ni.

Tin PAN Card dil tur hian Voters ID emaw, Driving License emaw, Aadhar Card emaw a ngai a, Date of Birth ID a a lanloh chuan a tichiang turin Birth Certificate a ngai tel bawk. Online a a dil hian India khua leh tui tan Rs. 107/- Income Tax ah a dilna fee a ngai a, Foreign Citizen tan chuan Rs. 994 a ngai thung. Agent kaltlanga dilte chuan hemi bakah hian pawisa tlem azawng an chawi belh \hin bawk.