Lenkawl

Kum 2021-2022 atanga chhutin Serchhip District-ah kumtin dan zawm lo-a puipunna hmuna meizu man an tam chho zel a, kum liamta 2023-2024 chhung khan puipunna hmuna meizu mi 92 zet man niin kum 2 kalta chhunga pupunna hmuna meizu man aiin an tam zawk a ni.

Malaria laka invenna atana Dichloro-Diphenyl-Trichloroethane (DDT) hman thin chu kumin June thla atangin a aia him leh tha zawk nia sawi, Deltamethrin-a thlak a ni dawn.

Bilkhawthlir Kuhva Chingtu Pawl Duty-te leh North Chhimluang Branch YMA leh Village Council tangkawp  chuan nimin zing khan Phaisen leh North Chhimluang inkar ah dan loa Myanmar atanga kuhva lakluh ni ngei a hriat motor pasarih atangin an man a, a vaiin bags 130 a ni.

Lawngtlai District chhunga tlawmngai pawl lian ber, Young Lai Association (YLA) kum 50 tlin lawmna chu niminpiah chawhnu khan Lawngtlai-a Areopagy-ah a hawnna neih a ni a, Central YLA President HC. Vanlalruatpuia chuan kumin chhunga YLA Golden Jubilee lawmna tur hi  a hawng a ni. Young Lai Association (YLA) hi Sept. 23, 1974 khan din niin Golden Jubilee lawmna atan hian May thla-ah Inter-Branch Football Tournament neiin October-ah Branch Zaipawl leh Hnam Lam intihsiak a ni anga, Sept. 23-ah Branch hrang hrangah a lawmna neiin November-ah ni thum chhung Jubilee lawmna pui ber chu Lawngtlai-ah neih a ni ang. YLA hian hian Sub-Hqrs 7 leh Branch 116 neiin, member 55760 an awm mek a ni.

Mizoram State Planning Board chu nimin khan an Chairman leh Chief Minister Lalduhoma hovin CM Office-ah an thukhawm a, Planning Board in hma a lo lak tawh te leh ruahmanna a siam te an thlirho. He thutkhawm ah hian Chief Minister chuan, Planning Board chu Mizoram hmasawnna tur ruahmanna tha leh fel fai a awm theih nana ngaihtuahna sengtu a ni tih sawiin, “In zirchianna te, in thurawn te, in ruahmanna te leh in thahnemngaihna ten nasa takin kan ram hma-sawnna a tichak dawn a ni,” a ti. Nimin-a thut-khawm ah hian Planning Board Vice Chairman Dr. Kenneth Chawngliana chuan an hmalak tawh chin te sawi hawnna a nei a. Chumi hnuah Prof. H. Lalramnghinglova, Member chuan Zau Policy for Sustainable Agriculture (under Land Reform Policy) an duan chu a sawifiah bawk a ni.

Lok Sabha Inthlanpui-a Vote tla te chhiar tura inbuatsaihna thlirin nimin khan Lunglei-ah District Bawrhsap Ramdinliani hovin Nodal Officer te leh Police Official te an thukahwm a, Lunglei District hnuaia Assembly Segment 6 a vote tla te chhiar nan hian Saikuti Hall Ground Floor-ah Counting Room 6 siam a ni a, Vote hi Round 4 a chhiar zawh tura ruahmanna siam niin inpuahchahna hrang hrang, Counting Official ruat te, Training buatsaih dan tur leh Randomization neih hun turte he hunah hian tarlan a ni bawk. Nimin-a thutkhawm ah hian Media Centre siam dan tur leh Result puan dan tur bakah thil tul pawimawh hrang hrang te sawiho a ni bawk.

Mizo hmeichhe pathum (3), Syria rama mi In-a hnathawk (domestic worker)-te chu Mizo-ram sawrkar in hruaihaw tumin hma a la mek a, hemi chungchanga Mizoram Police thuchhuah in a tarlan danin heng hmeichhia pathum te hian harsatna tawkin Mizorama haw an duh tih hriat a ni a. Mizoram sawrkar chuan rang taka hma lain, heng mi pathumte hruai haw an nih theihna turin Syria-a Indian Embassy pawh a dawr nghal a. Embassy chuan heng hmeichhiate thawnhaw tur hian a hranpaa pawisa an neih loh avangin an lo hawna senso chu Mizoram sawrkarin a tum dawn thu leh Embassy hotute nen inbe pawp rengin a rang thei ang bera hruai haw tura hmalak mek a nih thu an tarlang a ni.

Luidung leh a kam humhalh leh thenfai hna thawka mipui zirtirna kalpuitu pawl, Save the Riparian chuan Tlawng lui fintu thenfai hna an thawh mekah a thawh hnihna atan nimin khan Aizawl Tuikual lui chu Khatla North (Lalmalsawma Memorial School) bul luikawr atangin thenfai hna an thawk a, he hna hi ni 30 chhung thawh tura rua-hman niin PHE Department-a PMU Director, Duhkima chuan a vailiam a ni. Tuna ni 30 chhung thawh tur an ruahman hma hian March ni 26 atanga April ni 20, 2024 chhung khan 20 Days Project chu kalpuiin Model Veng leh Mission Vengthlang inrina Sakhisih lui, KM 2.3 an lo thian tawh a ni.

Champhai District Child Protection Unit-ah nikum chhung khan kum tlinglo pawngsual leh khuai-khem thubuai 17 chhinchhiah a ni.

BJP Mizoram chuan ZPM sawrkar kal mek chu Mizoram Liquor Prohibition (MLP) Act, 2019 an hmang nge he Act hnawl hian Zu zawrh tumin Zu an thlah zalen mek tih an zawt.

Kolasib District Consumers' Union (KODCU) chuan Kolasib District Transport Officer (DTO) hnenah kumin March ni 12-a State Transport Authority (STA) Secretary in thuchhuah a siam angin Kolasib District chhunga lirthei a sumdawng ten rate an hman theih nan hma la turin an ngen.

Mizoram sawrkar-a Home Commissioner H. Lalengmawia chuan Zokhawthar-a India leh Myanmar ramri khar leh hawn chungchang ah hriattirna an la dawng lo tih niminpiah khan thuthar thehdarhtu ten an kawmna ah a sawi a. May 1 atanga India leh Myanmar inkalpawhna Zokhawthar khar tura sawi a nih chungchanga Assam Rifles te hmalakna hi Mizoram sawrkara Home Department hotute’n April ni 29 khan Assam Rifles hotute chu Aizawl-ah kawmin ramri khar a nih tur thu chungchanga thupek an hmuhna an zawt a, Assam Rifles hotute hian MHA lehkha an dawn phawrh tur an nei lo a, hotu sang atanga thu an hmuh thu bakin an chhang thei lo niin a sawi a. Thuneitu sang te atanga thu an hmuh chu State sawrkar tello in bawhzui thei nghal an ni em tih te pawh zawtin, Home Department hriatpuina telloa thuthlukna siam a, hma lo la ve ngawt thei loh a nih thute na takin an hrilh tih an sawi bawk.

Supreme Court chuan Mizoram sawrkar leh National Highways & Infrastructure Development Corporation Limited (NHIDCL) hnenah Riverine Reserved Forest leh Road Side Reserved Forest of Mizoram huamchinah dan ang thlapa Forest Department atanga phalna an hmu a nih loh chuan hemi huamchhungah hmasawnna hna thawk rih lo turin a hriattir.

Assam State atanga Mizoram-a ruihhlo lo lut thin ni a sawi te enfiahin tunkar Thawhlehni khan Central YMA Kumpuan Committee te leh Cachar Young Muslim Association hruaitute an inkawm.

District Information & Public Relations Office-a hnathawh dan leh inrelbawl dan kalhmangte zirchiang turin, Mizoram Information Service 2024 Batch-te chuan nimin khan Kolasib an tlawh.

Lai Autonomous District Council (LADC)-ah thla thum (3) dawn sawrkar mumal a din loh hnuah Congress MDC pakhat leh MNF MDC 12 ten an din, United Legislature Party (ULP) chuan sawrkar an din theih thu Larsap hnenah an thlen.

Sawrkar kum liamta 2023-2024 chhung khan Mizoram-ah lirthei ziahluh thar sing thum chuang awmin Transport Department chuan Chhiah an hmuh tura bituk chu cheng vbc. 2 chuanga khumin Chhiah hi cheng vbc. 52 chuang an hmu a ni.

Serchhip Sub-Hqrs. YMA Rorel Inkhawm vawi 4-na chu nimin khan Serchhip Auditorium-ah neih a ni a, ramngaw, tuihna leh nungcha humhalh kawngah Sub-Hqrs. YMA Serchhip hian chak zawka hmalak relin, tuihna humhalh tha Branch te hnenah chawimawina lawmman pek thin nise an ti.

District Sainik Welfare & Resettlement Officer, Aizawl leh a thawhpuite chuan nimin khan Serchhip rawn tlawhin Serchhip District-a Sipai bang, Ex-Servicemen te nen an inkawm bawk.

Agricultural Technology Management Agency (ATMA) Serchhip District chuan nimin khan North Mualcheng khua ah Panhnah chin leh enkawl dan zirhona hun an buatsaih a, he hunah hian ATMA-a mithiam ten Panhnah chin dan leh a enkawl dan te, a chi tha thlan dan leh huan pal anga zam tir dan bakah Thingkung-a zam tir dan te an zirtir a, a hralhna a that thu leh Kuthnathawktute tan innghahna tlak a nihzia te pawh an tarlang bawk a ni. Nimin vek khan ATMA hmalakna hian Khawlailung khua ah Vaimin chin dan zirhona buatsaih a ni bawk a, Vaimim chi pawh semchhuah nghal a ni bawk.