VAIHLO LEH NU HRISELNA

VAIHLO LEH NU HRISELNA

- Tobacco Cessation Clinic
JN Hospital, Serchhip

Vaihlo hi kan ven theih leh dan theih reng ni si, natna leh thihna thlentu zinga langsar ber a ni a. Vaihlo hman avanga natna tam tak hi hman loh a pumpelh theih a ni. Mizote hi kan pi leh pu te hunlai a\anga zuk leh hmuam hmang nasa kan nih avangin Vawiin thleng pawhin kan khawtlang ah ala zalen em em a, tih dan phung pangngai ah ngaiin, awmkhawmna hmunah te induhsak takin kan la in\heh fo \hin. Khawvel a lo changkang zel a, thiamna te alo sang a, zuk leh hmuam \hatlohna te kan lo hre ta zel. Amaherawh chu, hriselna atan a hlauhawm tih kan hriat reng pawhin nghei thei chu tlem te chauh kan ni.
Zuk leh hmuam chungchang ah hian sawi tur tam tak a awm thei a, hriselna a khawih pawi dan leh a \hatloh zia pawh kan hre tam tawh khawp mai. A pawi ber mai chu nausen, nu Chhul chhunga insiam mek ama tihsual awm miah si lo, a nu in emaw, a pa in emaw mei an zuk avanga naute lo insiam mek leh \hang chho tur a tichhe tel hi a ni.
Nau hriselna chu a pumchhunga a awmlai daihin a in\an a, chuvang in nau hrisel hring tur chuan nu hrisel a ngai phawt a. Nu hrisel pawhin nau a pai chuan a bik taka amah leh a naupai chu enkawl a ngai \hin.
Nu Chhul chhunga naute hian puitling ang bawkin boruak thianghlim leh chaw \ha nu thisen a\angin a mamawh a, naute hian nu thisen a\angin Chhul kaltlangin a mamawh zawng zawng dawngin, boruak thianghlim leh thisen thianghlim te a dawng vek a ni. Nu leh naute inzawmna ah hian nu a\anga natna hrik chi hrang hrang leh taksa a\anga kaichhawn theih te lo thlifimtu a awm a. He lo thlifimtu hian vaihlo zuk leh hmuam a tur awm tam tak zinga pakhat Nicotine chu a thlifim ve thei lova, nu thisen a\ang chuan a ngial a nganin vaihlo-a Nicotine chu naute in a lo dawng ta \hin a ni. Hei hian naute ah nghawng nasa tak neiin naute hriselna a khawih pawi bakah naute tan thihna hial a lo thlen thei \hin a ni. Nu naupai in mei a zuk emaw, vaihlo zuk leh hmuam chi te a hman \hin chuan a naupaiin a tuar nasa em em a, nauchhiat te, naute zang lutuk te a thlen thei a. Tin, an puitlin thlengin natna hrang hrang an tuar hma bik hle.
Nu naupawm leh naupai laia Vaihlo leh a kaihhnawih hmang nasa ah an faten harsatna danglam tak, rualbanlohna a thlen tam hle tih hriat chhoh zel a ni a, nausen hrisel lo tak, an sen tet lai a\anga hrisel lohna chi hrang hrangin a tlakbuak te hi an nuten an pai lai leh an sen laia zuk leh hmuam hmang nasa an ni duh hle tih hriat belh zel a ni.  Nu in nau a pai laiin a bik takin thlakhat a\anga thlathum a upa a nih laia nu in mei zuk nasat emaw, mei zu mi bula a khawsak tam a, mei khu a lo hip luh ve nasat chuan naute a pum chhunga mi chuan boruak \ha tam tawk a hmuh theih loh avangin a insiam leh \han chhoh danah harsatna nasa tak a thlen thei a, naute thluakin boruak thianghlim a dawn \hat tawkloh avangin rualbanlohna te a thlen thei \hin a ni.
Nu te hian naute an pai lai hian mahni lam an invawn fimkhur loh leh insum loh avangin an naute chungah vanduaina leh tawrhna an thlen tir \hin a. Naute, nu in a pai laia meizial emaw, vaihlo hmuam chi emaw a alo hrai reng chuan a lo pian chhuahin vaihlo tur ngai sa in a lo piang chhuak nghal \hin a. A taksa in nicotine chu a lo ngai chhunzawm ve in, kaih ang te in a lo awm nghal thei a. An \ahbelh duhin an \hin a chhe duh hle a, nu tan buaina leh harsatna nasa tak a thlen thei a ni. Hetiang anga nu in a pai lai a\anga tura a hrai reng naupang chu an \hiante aiin an rilru a chak lovin an hriselna a tlahniam hle a, tlang hrileng an man hma bikin Awmna phei chu an vei duh bik hle. Tin, meizial zu mi fa chuan a lo \hanlen hnuah mei zuk chakna an nei hma bik a, an taksa insiam \an tirh a\anga vaihlo tura bual an nih tlat avangin vaihlo leh a kaihhnawih chi lam reng reng hi an ngai hma bik khawp mai.
Nu, zuk leh hmuam ti nasa lutuk hian nau, a hun hmaa tui bawm keh a thlen thei a. Chutiang a nih chuan nu tan ai mahin naute tan a hlauhawm a, naute, a nu pum chhunga awm siin pawn lam boruak khan a chimbuai thei tawh tihna a ni a. Natna hrik eng pawh a kai awl a, chu chuan nasa takin naute a nih tur ang a nih tir lovin rualbanlohna a thlen awlsam ta \hin a ni. Nu in a pai lai a vaihlo  a a ur naute chu an te in an vun te pawh hi sawng deuh leh hrisel lo hmelin an langa, an sawngnawiin an \han a muang a, Thawhah an nei duh a, an pian rualpui te an phaklo duh hle \hin. An lo len hnu ah pawh zirna lamah te an hnufum bik thei hle.
Hetiang taka naute tana thil \halo thlen thei a nih avang hian nu in nau a pai laiin vaihlo zuk leh hmuam a sim ngei ngei hi a tih makmawh a ni a, a hmangaih a fa tina tu a nih loh a, fa hrisel leh \hang \ha, rilru chak leh pian \ha nei turin vaihlo leh a kaihhnawih lakah a inthiamfihlim \hat a ngai a ni. Zuk leh hmuam avanga natna tam tak hi ven theih a ni a, nu leh pa ten kan fate zuk leh hmuam \hat lohzia hrilh nasa ila, zuk leh hmuam lakah inthiarfihlimin entawn taka awm tum \heuh ila, zuk leh hmuam avanga natna leh harsatna te hi a lo bo thei dawn a ni. Tu leh fa ruihhlo laka fihlim nei tur chuan naupai lai a\anga \an lak hi a ngai takzet a ni.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai