Tunhnaia ruahsur nasa avangin Mizoram-ah Chenna In chhia 220 awmin mi 12 in nunna an chan

Tunhnaia Mizoram puma ruahsur nasa avanga chhiatna thlengah Disaster Mangement & Rehabilitation Department in an chhinchhiah chinah chenna In chhia 220 awmin, mitthi 12 an awm tawh a. Hmun hrang hrangah inkal-pawhna kawng chhia leh kawng ping a awm bawk a ni.

Disaster Mangement & Rehabilitation Department Director, N. Chakhai sawi danin tunhnai ruahsur nasa avang hian Zoram pumah leimin, kawngpui chhia leh tuilian te a thleng a, Aizawl District bikah hian June ni 9 a\anga ni 14 thlenga chhinchiah dan ah chuan In a puma chhia 18 awmin tlem azawng chhia 65 a awma, chhiatna thleng avang hian mi 1 in nunna chanin mi 2 in hliam an tuar a ni. Hmun 6-ah leimin vangin kawng a ping a ni. Lunglei District-ah chuan Tuilian leh leimin vangin In a vaia chhia 165 awmin In \henkhat chhia 299 a awm a, chhiatna thleng avanga nunna chan mi 10 awmin mi 4 in hliam an tuar a, Chawngte-ah ni 15 a\anga chin hriat loha bo pakhat awmin, ani hi Tuilian in a la nia rin a ni. Heng bakah hian Lunglei District-ah hian Sorkar builing pahnih a chhe bawk a, Kawngpui hmun 5 ah leimin in a tichhia a, Lei 2 a chhe bawk.
Lawngtlai District-ah leimin leh leikhi avangin In 51 chu luahtlak lohin a chhe vek a, In 280 te chu hmun \henkhat lai chhia anga chhinchhiah a ni a,Sorkar building 3 a chhe bawk a, leimin vangin kawngpui hmun 15-ah a chhe bawk a ni.
A tlangpuiin Siaha, Champhai, Kolasib, Serchhip leh Mamit District-ah te ruahsur nasa vanga chhiatna a ziaawm deuh a, heng District 5-ah te hian In chhe vek 6 awmin \henkhat lai chhia 23 a awm a, tunhnaiah Serchhip District Khumtung daia kawngchhak leimin in ahnawl lirthei-a chuang pakhat thi a awm bawk a ni.
Zoram puma ruahsur nasa vanga chhiatna kaihnawih avanga harsatna tawk chhungkua 651 an awma, thlai chinna hmun ram hectare 137 a zau a chhiat bakah Sangha Dil 62 ruahsur nasa vang hian a chhe bawk a ni. DM&R Director chuan chhiatna thlen dan kimchang hriat zung zung a harsa a inkalpawhna leh inbiakpawhna te duh anga a \hat tawk loh avangin report dawn a harsat avangin hei aia chiatna thleng report hi ala tam thei niin a sawi bawk.

Popular News

Mizoram-ah Faina Hapta hman \an leh a ni

Retailer bukna diklo 3 man