Serchhip District Bawrhsap hovin Bank hnathawh dan thlirin Bank ten Loan an pekchhuah tur zat an pe phaklo

Serchhip District Bawrhsap, Sangchhin Chinzah hovin nimin khan kum 2016-2017 chhunga Serchhip District chhunga Bank hrang hrangte hnathawh dan thlirletna neiin kum thara hmalak dan tur sawihona neih a ni a. Serchhip District chhunga Bank hrang hrang ah hian cheng nuai 16696.74 dahluh niin Loan cheng nuai 9456.51 pekchhuah a ni thung.

Serchhip District Bawrhsap hova a Office Chamber-a Serchhip District Consultative Committee (DCC)/District Level Review Committee (DLRC)/District Level Security Committee (DLSC) \hutkhawm ah hian Bawrhsap, Sangchhin Chinzah chuan, Bank te tel lovin sorkarin hmasawnna hna a thawk thei lo tih sawiin, mimal sumdawng leh thil siamchhuahna neite pawhin Bank tel lovin hma an la tak tak thei lo tih a sawi a. Mi tam takin Bank nihphung leh hnathawh dan an hrethiam lo tih pawh sawiin, “An sum puk te rul \ha duh lovin harsatna an siam sak \hin a, chu chuan hmalam pan zelna kawng a tibuai \hin a ni. Bank te hi hlep neia sum puk chhuah tir \hin an nihna hrethiam chunga kan dawr a \ul a ni,” a ti a. Chutihlaiin sorkarin Bank te chu an hnathawh danah an tlin ngei tur target a siam sak ve bawk a, chung an target te chu Bank lam pawhin tlin ngei tumin theihtawp an chhuah ve bawk tur a ni, a ti bawk.

Serchhip District chhungah hian State Bank of India (SBI) Branch pahnih, Mizoram Co-Operative Apex Bank Branch pakhat, UBI Branch pakhat leh Mizoram Rural Bank Branch sawm (10) an awm a.Nimin-a Meeting ah hian heng Branch hrang hrangte aiawh bakah Lead Bank Chief Manager, R. Ralkhuma leh NABARD aiawh te leh District Officer pawimawh engemawzat an tel a ni.

He huna tarlan a nih danin kum kalta chhunga heng Bank hrang hranga sum Deposit (dahluh) zawng zawng hi cheng nuai 16696.74 a ni a, Loan chi hrang hrang semchhuah cheng nuai 9456.51 niin sum dahluh a\anga Loan an pek-chhuah, Credit Deposit Ratio (CD ratio) hi 56.64% a ni. Hetihlai hian CD Ratio bituk zat chu 60% tal a ni thung a. UBI chu CD Ratio sang ber niin 171.01% a ni a, a hniam ber chu SBI niin 42.86 a ni, CD Ratio hian nikum a phak lohna chu 2.13% a ni.

Annual Credit Plan hnuaiah Priority Sector bikah target chu cheng nuai 2315 a nih laiin nikum chhung khan cheng nuai 3198.88 pekchhuah a ni a, an pekchhuah hi 138.18 % lai a tling phak a. Hetihlai hian Priority Sector peng pathum (3) zingah Industry Sector hnuaia loan pek hi a tlem fal hle a, 65.03 % chauh tlin a ni a. Industry Sector a hniam chhan hi Industry-a hmalakna a tlem vang a nih thu sawi a ni. Agriculture Sector ah target hi cheng nuai 660 a ni a, a taka pekchhuah chu cheng nuai 616.72 a ni a, Service Sector cheng nuai 1000 target a ni a, a taka pekchhuah chu cheng nuai 2156.22 a ni. Priority Sector chhunga Loan pek tawh zawng zawng cheng nuai 1364.19 a\anga rulhna lut zat hi 75.16% a ni a, he Sector hnuaia loan la, ngaihsak zui miah loh (Non Performing Assete/ NPA) zat hi 8.95% niin a pawisa chuan cheng nuai 607.27 zet a tling a ni. 

Kum kalta chhung khan PMEGP ah Margin Money cheng nuai 146.61 District in a neih laiin a taka pekchhuak chu cheng nuai 58.74 chauh a ni a. Hetianga a tlakhniam chhan hi online sub-mission hman thar a nih vang te, Branch ten anmahnia Sanctioning power an neih tak loh vanga hun a duh rei tak vang te, documents submit kim loh vanga hun a duh rei vang te nia sawi a ni a. Kum kal mekah hi chuan Margin Money hi 100% achieve ngei tum nise tiin a rel a, kumin PMEGP target atan hian Margin Money ah cheng nuai 153.70 chu an pawm bawk.

Heng bakah hian Bank hlatna khuaa Business Correspondent dah belh dan tur te, Chhing-chhip Sainik School thara Bank Extension Counter dah thar dan tur leh thil pawimawh dang te pawh he hunah hian sawiho a ni bawk.