Larsap thar atan Dr. Kamla Beniwal lalut in Larsap hlui in Mizoram a chhuahsan.

Mizoram Governor thar atan Dr. Kamla Beniwal chu nimin July 9, 2014 tlai khan rinawmna thu tiam tira lakluh niin Mizoram Governor Pu Vakkom B.Purushothaman chuan nimin khan Aizawl a chhuahsan bawk.
Mizoram Governor thar, Dr. Kamla Beniwal hian nimin July 9, 2014 khan Gujarat a\anga Mizoram rawn thlengin Lengpui-ah Chief Minister, Pu Lal Thanhawla leh sorkar mi pawimawh ten an lo dawngsawng a. Hemi hnu hian Aizawl thlengin nimin tlai dar 6:00 khan Raj Bhavan-ah Gauhati High Court Judge, Justice B.K. Sharma chuan rinawmna thu tiam tirin Mizoram Governor 12-na atan a lalut a, he hunah hian Chief Minister Pu Lal Thanhawla leh Minister te bakah sorkar mi pawimawh sawmbik te an tel a ni. Dr. Kamla Beniwal hi Jan. 12, 1924-a piang niin Gujarat Congress hruaitu hlun a ni a, kum 27 mi a nihin Indian National Congress (INC) zawmin kum 1954 khan Rajasthan-ah Minister a ni tawh a, Deputy Chief Minister hna te pawh chelh tawhin 15th Oct.-26th Nov. 2009 chhung khan Tripura Governor niin 27th Nov. 2009 a\anga July ni 6, 2014 thleng khan Gujarat Governor hna a chelh leh bawk a ni.
    Hetihlai hian Mizoram Governor kalchhuak, Pu Vakkom B. Purushothaman chuan nimin vek khan Aizawl chhuahsanin Kerela a pan bawk a, Governor thlahna hun hi Mizoram sorkarin Lengpui Airport Tarmac (Apron) ah Ceremonial Farewell function buatsaih sakin 1st leh 3rd MAP ten Guard of Honour an pe a. Sorkar laipui in Nagaland leh Tripura State Governor hna chelh tura a ruatna chu a pawm dawn leh dawnloh Kerela a thlen hunah a tihchian tur thu sawiin, kal erawh a phur lemlo tih a sawi bawk.

Popular News