Zu khuahkhirhna tura Dan tesep peih felin Assembly Session neih mekah pharh a ni.

Mizoram-a Zu khuahkhirhna tur Dan thar, The Mizoram Liquor (Prohibition and Control) Rules-2014 Dan tesep duan te chu peihfel a nih hnuah nimin khan Assembly House-ah pharh a ni ta.
Mizoram-a MLPC Act hnuaia Dan tesep te hi nimin a Mizoram Legislative Assembly Budget Session-ah Excise Minister Pu R. Lalzirliana chuan a pharh a, sorkar in Official Gazzette hmangin Rules hman \an hun tur hi a la ruat leh dawn a, Rules hnuaia Provision hrang hrangte chu a ruala hmang nghal vek kher lovin a hman chin tur Sorkar chuan a bithliah thei bawk ang. MLPC Rules hnuaiah hian Excise Commissioner chuan sapzu tia sawi, Indian Made Foreign Liquor (IMFL) Mizorama chawkluh theihna License chu mimal emaw, Corporation hnenah emaw a pechhuak thei anga, a zuarchhuak tur, Vendour, Club leh Sipai leh Police Canteen ah te License hi pek theih niin Mizoram chhunga zu sakna hmun, Distellery, Brewery, Bottling Plant leh a dangte din theih dan tur pawh MLPC Rules-ah hian tarlan a ni.
    Hetihlai hian Zu fak mawina lam chi Advertisement chu dan hian a khap tlat thung a, mi tupawh, dan kalha zu lo zuar tawh tih loh, kum 21 tling chin chuan zu lei phalna, kawl phalna leh In phalna hi Excise Superintendent te hnenah an dil thei anga, mi pakhatin thla khat ah zu um puitling 750ml paruk (6) aia tam a lei phal a ni lo a, Beer leh Wine te erawh um 10 thleng lei theih a ni thung. Zu zawrhna dawrah te pawh pawnlam a\anga lang theiin zu um phochhuah khap a ni dawn a, zu hralhchhuah reng reng pawh \ha taka tuama ip langtlang thei lo chi a thun zel tur a nih bakah Kohhran hmun pawimawh leh zirna In hnaih lutuka zu zawrhna dawr hawn khap a ni bawk. Hei bakah hian mi tu pawh vantlang hmuna zu in leh vantlang tana harsatna siam zawnga khawsa te chu vantlang rawngbawlna hna thawh tira hrem theih an ni dawn a, an hnathawh tur hi vantlang hmun pawi-mawh phiah fai tir emaw, bazar leh vantlang inthiarna hmun tihfai tir emaw, damdawi In chhehvel tihfai tir leh Court chhehvel tihfai tir te, tuihawk luankawr thenfai tir te, hnuchham In leh tar chawmna In-a a \ul ang apiang thawh tir te a huam dawn a ni.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai