Mizo \halai hnathawk tura chhawr harsatna Chief Minister in House-ah a sawi.

Chief Minister, Pu Lal Thanhawla chuan Mizo \halaiten overtime leh holiday-a hna thawh ngai chi te an thawk peih meuhlo tih sawiin, Mizoram a inbun company leh contractor te chuan Sorkar leh mipui zah vang chauhin Mizo \halai an chhawr a ni, a ti.
Nimin a Assembly inkhawm ah he thu hi sawiin Chief Minister Pu Lal Thanhawla chuan Mizo \halai tam tak company leh contractor hnuaia thawk tura hnimluh an awm tawh tih sawiin, Driver a\anga Engineer thlengin rim taka hnathawh ngai chi chu Mizo \halaiten an peih rei ngai meuh lo a ni, a ti a. Lengpui-a thir sawngbawlna hmun Ispat-ah pawh Mizo \halai thawk duh an awm manglo a ni, a ti. Industries Minister Pu H. Rohluna chuan Industries leh Mizoram ISPAT Industry ten inremna an ziah angin ISPAT lam chuan Mizo hnathawktu casual labour 39 leh Regular 11 vel an chhawr mek tih a sawi a, hna tam zawk chu thiamna bik neih ngai leh Experience ngai a nih avangin tun dinhmunah chuan hnamdang rawih loh theih loh chin a awm a, zawi zawiin training te pea Mizo tam zawk an chhawr zel theih beisei a ni, a ti bawk.
    Nimin a Assembly inkhawm ah hian Chief Minsiter Pu Lal Thanhawla chuan Mizoram mau te man man zawka hralhchhuah a nih theihna turin Sorkar chuan \an a la mek tih a sawi a. Mizoram maute chu thingtlang mipuite eizawnna tling a nih theihna turin Sorkar chuan kawng a dap zel tih sawiin, Mautam leh ramkang avanga mau rem palh thei ven thawn thilah mau Mahal te pawh tihtawp a ni tih a sawi a, tunah pawh mau thawnchhuah kawngah khuahkhirhna la kalpui mek a nih thu sawiin, hlawk zawka mau thawnchhuak turin Bamboo Chipping Unit te pawh Sorkar chuan a theih anga dawmkan zel a tum a ni, a ti. Mizoram Bamboo Chipping Unit te harsatna tawh mek chungchang sawifiahin Industries Minister Pu H. Rohluna chuan an harsatna thlen chhan hi tunhnaiah mimal mau huan neite'n sawngbawl lohva mau an hralhchhuah vang a ni pakhat tih a sawi a, Chipping Unit 9 din tawh zingah Chuhvel leh Chhingchhip ami chiahin hna an thawh thu leh Chipping Unit ten an siam zawh sa Matric ton 100 chu Sorkar a inrawlh hnuah Cachar Paper Mill in a leisak dawn a ni, a ti bawk.

Popular News

Mizoram-ah Faina Hapta hman \an leh a ni

Retailer bukna diklo 3 man