House-ah The Mizoram Lokayukta Bill 2014 pawm a ni.

Mizoram Legislative Assembly Budget Session ni thumna, nimin Nov. 13, 2014-a chhunzawm ah eirukna dona tur Lokayukta Bill 2013 chu pass a ni.

Eirukna leh hlemhletna dona tur dan, ‘The Mizoram Lokayukta Bill 2014’ hi Law & Judicial Minister Pu Lalsawta chuan House-ah a pulut a, he dan hi pass pawh nise hmang tura sum mamawh chu Sorkarin a neih rihloh avangin 14th Finance Commission ah sum mamawh dil mek a ni tih a sawi. Pu Lalsawta chuan Central Sorkar ah Lok Pal leh Loayukta Act 2013 hman a nih tak avangin State Sorkar te pawhin nakum Jan. 16 a\anga kum khat ral hmain Lokayukta an neih a ngai tih a sawi a. Tuna Mizorama hman tura duan Lokayukta ah hian Chairman leh member 2 an awm anga, mahnia thu nei, tu mitmei mah ven ngai lo, Chief Minister pawh chhui theitu tur a ni, a ti a. Lokayukta hnuaiah hian eiruk thubuai chhuitu tur bik, 'Directorate of Enquiry, Investigation and Prosecution din a ni anga, hei hi hnathawk thei tura din a nih hma pawhin Anti-Corruption Bureau chu a hmang \angkai thei dawn a ni,’ a ti a, Lokayukta ah hian lehkhapuan pangngai mai pawhin complaint a thehluh theih thu leh complaint awmlo pawh chanchinbu-a thuziak leh titi leng vel behchhana hmang pawhin chhui \ul a tih te a chhui thei nghal dawn a ni, a ti a. Hrem ngaite chu Special Court in an chungchang a ngaihtuah ang, a ti bawk.
    Hei bakah hian Minister chuan ‘Mizoram Lokayukta chu Ha nei leh seh thei tura duan a ni,’ tih sawiin, hetihlai hian uangthuang tak emaw, chimawm tak emaw a tute emaw dawta hek an awma, hekna avanga sorkar hnathawk chuan man a tawh phah chuan, chutianga diklo taka he dan hmang sual luitu chu hrem theih a ni tih a sawi bawk a, hetihrual hian thil diklo awm sawichhuaktu, Whistle Blower tia sawi te himna tur pawh danah hian dah a ni tih sawiin, hemi atan hian Central in a lo pass tawh Lokpal dan hnuaia mi chu hman ve nghal mai tur a ni, a ti bawk. He dan sawihona ah hian rorellai pawlte chuan dan \ha tak leh Mizoram mamawh tak a ni tih an sawi laiin, Eptu lam aiawha thusawitute chuan dan chu duhthusamin a famkim tawk lo nia an hriat thu an sawi a, he dan hnuaia complaint thehluttute hrem let theihna awm chu hman sual theih nia an hriat thu an sawi bawk a ni.