Sorkar chuan zirna lamah hma kan sawn theih nan hna a thawk nasa hle - DC, Serchhip


Serchhip District Bawrhsap, Dr. Lalrozama, IAS chuan, “Zirna leh thiamna hi hmasawnna lungphum pawimawh a nih avangin sorkar chuan zirna lama hma kan sawn theih nan hna a thawk nasa hle,” a ti.
Ningani kaltaa India Republic Day vawi 68-na Serchhip-a hmanna ah Khuallian, District Bawrhsap Dr. Lalrozama chuan he thu hi sawiin zirna leh thiamna kawnga sorkar hmalakna hrang hrangte a tarlang a. Bawrhsap chuan kum 2015-2016 chhung khan SSA a\angin zirlai naupang 5883 hnenah a thlawna zirlaibu pek an nih thu leh zirlai 4310 hnenah School Uniform Grant pek an nih thu a sawi a. Taksa hrisel nan leh Talent nei \hate zawnchhuah nan District chhung khaw 7- North Vanlaiphai, Khawlailung, Thenzawl, Serchhip Hmar Veng, New Serchhip, Chhiahtlang leh Chhing-chhip-ah te Grassroot Football Academy din a nih thu pawh a sawi a. Sorkar School, Middle School leh Primary School-a zirlaite chu Mid-Day Meal (Chhunchaw) pek vek an nih thu leh Naupang ten Chhunchaw thianghlim leh hrisel, hunbi dik thlapa an ei theih nan Mid-Day Meal Programme hnuaiah hian Mobile Application hmanga nitin leh thlatin report Online hmanga kalpui a nih thu a sawi bawk.

Bawrhsap chuan High School zirna lamah pawh hma kan sawn theih nan hmalak a nih thu hi sawiin, zirlai ten hriatna zau zawk an hmuh theih nan Study Tour te buatsaih sak an nih thu sawiin, Science leh Mathematics lama tuina leh thiamna nghet an neih theih nan Science leh Mathematics zirtirtute tan bik training pawh buatsaih a nih thu a sawi a. Zirlai naupang ten Science zirna lamah hma an sawn theih nan sorkar chuan ‘Science Fair’ te buatsaihin, Mathematics, Science leh English-ah zirlai chaklo bik te tan a bik taka zirtirna pekna tur ‘Remedial Teaching Programme’ te pawh buatsaih a nih thu leh Secondary School 20-a zirlai 139 te hnenah Special Class kalpui a nih thu a sawi bawk.
Hei bakah hian Bawrhsap chuan zirtirna lamah hma kan sawn theih nan leh tunlai thiamna thar ber ber hmang theia zirtirtute an insiamrem theih nan ‘In-Service Training’ te pawh buatsaih \hin a nih thu sawiin, kum 2016 June thla khan Serchhip DIET hnuaiah zirtirtu thawklai mi 132 ten training an zawh thu a sawi a. Tunah hian zirtirtu thawklai mi 41 te training leh mekin zirlai 50 ten Pre-Service Diploma Course an zir \an leh mek tih a sawi a. Cheng nuai 233 senga sak Serchhip DIET building chu tunhnai mai khan sak zawh a nih thu a sawi bawk.
College lamah pawh nasa takin hma kan sawn thu sawiin, Bawrhsap, Dr. Lalrozama chuan RUSA sum hmangin building leh room hrang hrangte sak leh tih changtlun hna thawh mek a nih thu a sawi a, College Campus chu Wi-Fi hman theih tura siam a nih tawh thu a sawi a. Kum telin zirlai Admission ti pawh an pun zel thu sawiin, thawktute pawh thiamna sang zawk nei tura intuaihriamna lamah hma an sawn zel thu a sawi a, heng hmasawnna hrang hrangte avang hian India rampum huapa College \hat dan Grade pe theitu, National Assessment and Accreditation Council (NAAC) chuan kum 2016 khan Govt. Serchhip College chu rawn endikin B+ Grade a pek hial thu a sawi bawk.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai