Vawiin ah District 6-ah VC thlanna neih a ni dawn.

Serchhip District-ah inbuatsaihna a tluang.

Vawiin April 30, 2015 hian Mizoram District 6-ah Village Council leh Local Council inthlanna chu neih a ni dawn a, zing dar 7:00 a\anga vote thlak \anin zanin tlai hian vote tla te chhiar nghal a ni ang.

    Mizoram State Election Commission in ruahmanna a siam angin tukin zing dar 7:00 a\ang hian Mizoram District 6- Aizawl, Lunglei, Serchhip, Champhai, Mamit leh Kolasib District-ah Village Council leh Local Council inthlanna chu neih a ni dawn ta a, he inthlanna neih tur atan hian ruahmanna engkim peihfel ni tawhin tukin zing dar 7:00 a\ang hian vote thlak \an a ni anga, tlai dar 5:00 thlenga vote thlakna hun hi hawngin vote thlak zawhfel a nih veleh vote tla te hi chhiar nghal a ni ang. Village Council inthlanna hi Mizoram District 6-ah neih tura ruahman niin hetah hian seat 2282 a awm a, heng zinga 1682 hi General Seat niin a bak 600 hi hmeichhia te tana seat hauhsak a ni thung a. General Seat 1682 chuh tur hian Candidate 4427 awmin Hmeichhia te tana seat hauhsak 600 chuh tur hian Candidate 1465 an awm bawk a ni. VC inthlanna neih turah hian BJP chuan Candidate 201 neiin INC in Candidate 2124 an nei a. MNF in Candidate 1691, MPC in 87 leh ZNP in 598 an nei a, Independent Candidate 1191 an awm bawk a. Candidate zawng zawng hi 5892 an ni.
    Vawiin a Serchhip District-a VC inthlanna neih tura inbuatsaihna ah harsatna a awmloh thu Election Officer, Lalhmansanga, MCS chuan nimin khan LENKAWL a hrilh a. Inthlanna buaipuitu tur hi VC tinah ruat an nih thu leh heng mite bakah hian Vote chhiar turte chu RO ten a \ul an tih zat zel an bial ah an ruat thei dawn tih sawiin, Vote thlak leh chhiar hi tluang taka a kal chuan zan dar 11:00 velah chuan District pum result hriat theih beisei a nih thu pawh a sawi a. Bial tina Returning Officer te hi \ha taka training pek an nih avangin he inthlanna buaipui thu ah hian harsatna a awm a rinloh thu a sawi bawk. Tun \uma inthlanna neih turah hian sum ruahman a tlem thu pawh sawiin, venhimna hna thawktu tur Police te pawh a hrana DA siam lovin duty pangngai anga kaltir an nih dawn thu a sawi a, inthlan buaipuitute tan pawh a hrana Honorarium siam theih a nih dawnloh thu a sawi bawk.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai