Commerce & Industries Minister leh Australia Consul General ten Mizo dehchhuah tihral dan tur an sawidun

Commerce & Industries Minister, H. Rohluna leh Australia Consul General, B. Vanlalvawna IFS te chuan Mizo dehchhuah zau zawka hralhchhuah dan tur chungchang nimin khan an sawidun.

Commerce & Industries Minister Office Chamber-a he sawihona hunah hian Commerce & Industries Minister, H.Rohluna chuan Handloom lama Mizo puantah hmeichhe puanbih ang chi ringawt hi chu Mizoram chhungah pawh a hralhchhuahna a hnawng \ep tawh tih sawiin, hnamdangten an duh tur leh thawnchhuah theih tur ang zawnga kal a hun tawh tih a sawi a, Mizo dehchhuah ramdanga hralhchhuahna kawnga \an lak chu a hun hle tawha a hriat thu sawiin, New Delhi-a Trade fare neih \hinah pawh Mizoram Sall chu a lun thei hle a, Mizote hi kan mit a fing a, kan dehchhuah rawng hrang hranga cheimawi dan hnamdang pawhin an duh hle, \anho dan awm thei se, Handloom products chi hrang hrang zau zawka hralh chhuak tura thawhdun dan awm thei se a duh thu te a sawi bawk.

He hunah hian Sydney-a Consul General, B.Vanlalvawna chuan sumdawnna leh peipunna lamah Mizoram tan kawng a awm thu Minister hi a hrilh a. Puantahna hmanrua lamah te pawh inpuih theih dan kawng a awm thu sawiin, Australia hian handloom lamah an mamawh ang tawk an hmu thei lova, Mizo dehchhuah Australia-a hralh tura hmalak dan kawng a awm thu leh thiltih dan tur te Minister hi a sawipui a. Commerce & Industry-in dehchhuah a neih theih chuan a hralhna tur lam chu Sydney-ah a \ul dan ang anga an lo buaipui theih tur thu Minister hi a hrilh bawk.

He inkawmnaah hian Handloom lama dehchhuah nei \hate thlangchhuakin Australia lama heti lama sumdawngte nen Video Conferencing-a inkawm zui nise, thla hnih khat hnuah bawhzui nghal nise an ti bawk. Nimin a Australia Consul General nena an inkawmnaah hian Minister hi Commerce & Industries Commissioner, Zothankhuma leh Director, Hmingthanmawia ten an \awiawm a ni.