Zofate inpumkhatna ngaipawimawh tur leh inpumkhatna fatu-a zel turin CM in HSA te a chah

Chief Minister Lalduhoma chuan Hmar Zirlaite chu Zofate inpumkhatna ngaipawimawh tur leh inpumkhatna fatu-ah lo tang zel tura chahin, “Hna kan lakna reng reng hi dik leh thianghlim takin kan kalpui zel a. Tu tan mah sawipuitu hran neih a ngai lo, an thiamna kha anmahni sawipuitu tha ber a ni,” a ti.

Nimin khan Saipum-a Rev Dr. HS Thanglung Hall-ah Hmar Students Association Inkhawmpui Lian vawi 60-na leh Sikpui Ruoi lawmna neih niin he hun a hmampuina ah Chief Minister Lalduhoma chuan Hmar Students Association chu Zofaten zirlai pawl kan neih zinga a upa pawl a nih thu leh kum 1939 a din a nih thu sawiin, “A din tirh ata vawiin thlengin Hmar thalai rualte, a bikin zirlaite tan hna a thawk tha a. Hnamzia humhalhna lamah te, inpumkhatna leh khawtlang hmasawnna kawngah te a thawhhlawk hle a ni,” a ti a. Hmar Hnam chu Zo hnahthlak hnamte zinga a lian ber pawl an nih thu sawiin, “Mizo hnam khaidingtu zinga mi in ni. Tunhma a Hmar mipuite sulhnu hi Mizoram laili velah hmuh tur a tam hle a. Sikpui Lungphun hlui pawh hi hmun engemaw zatah hmuh theihin a awm. A khaipa leh a lian ber pawl in nih ang ngeiin, u chan lo chang zel ula, Zofate inpumkhatna lo ngaipawimawh ula, inpumkhatna fatu-ah lo tang zel ang che u,” a ti a ni.

Zirlai naupangte chu an kalna kawng tur thlang fel a, chu kawnga mi hlawhtling ni tura taihmak chhuah turin Chief Minister chuan a fuih a, “Ram in resources a neih hlu ber chu a chhunga cheng mihringte hi kan ni a. Nang leh kei hi kan ram leh hnam hmasawn zelna atana mawhphurtu dik tak chu kan ni,” tiin Sawrkarin thalaite tana hma a lakna langsar zual a tarlang a, “Kum hnih chhung lekin hnaruak tam tak kan hnawhkhat a, hna thar kan siam a, MPSC Calendar hi a khat hle reng mai a ni. Hna kan lakna reng reng hi dik leh thianghlim takin kan kalpui zel a. Tu tan mah sawipuitu hran neih a ngai lo, an thiamna kha anmahni sawipuitu tha ber a ni,” a ti bawk.

Chief Minister chuan Zirna sang zawk lama hma kan sawn theih nan Mizoram Engineering College, Pukpui chu kumthar atanga class tantir an tum thu leh Mizoram State University din tura chak taka an kal thu sawiin, kum rei tak lo chawlhsan tawh NIT Mizoram Campus harsatna an chinfel sak thu a sawi a. Sawrkar hnathawh tum lo, mahni kea din tumte tan Bana Kaih Scheme an kalpui thu pawh sawiin, “He Scheme hmanga hmalak theih hi a tam hle. Duhsak bik nei lovin an project that dana tehin a pung awm lo loan kan pe a, an guarantor-ah sawrkar kan tang bawk. Lonei a eizawngte tan thlai thar panga-ah Support Price tha tak kan pe leh a. Kumin ah pawh khaw tam tak chuan Support Price zarah sum leh pai an lalut hnem em em a. A rate hresa in thlai kan ching thei ta a. Kan thawhchhuah tam leh kan hlawk a ni mai,” a ti a. “Chutianga kan ram hi a kal tak avangin thalai taima leh tumruhte tan hlawhtlin theihna remchang a tam em em ni,” a ti a. Ruihhlo laka fihlimn turin zirlaite chu a ngen bawk.

Nimin-a he hun hman ah hian Chief Minister hian Sikpui Lung chu hawngin Inkhawmpui Souvenir a tlangzarh bawk a, Mizoram Assembly Speaker Lalbiakzama leh Manipur MLA, Ngursanglur Sanate te pawhin thu an sawi bakah HSA President Lalrosang F. Tuollai chuan inlawmna thu a sawi a, Hnam lam leh zaite entir a nih bakah HSA Lifetime Achievement Award pawh sem nghal a ni bawk.

Hmar Students Association (HSA) hi kum 1939-a Imphal (Manipur)-ah din a ni a. HSA General Headquarters hi Tuithaphai (Manipur)-ah a awm a, State hrang hrangah Joint Headquarters 13 leh Branch paruk awmin Unit thahnem tak an nei a ni. Kumin-a an pawl inkhawmpui Lian hi December ni 3, 2025 zan atang khan hmangin nimin, a tawp ni khan Chief Minister hian a hmanpui a ni.