Orphanage Home Building sak thar luah turin hawng

Unity Orphanage Home Serchhip Building 2nd Floor sak thar chu Inrinni (Dec. 6, 2025) khan Unity Church General Hqrs. Executive Secretary Rev. B. Lalthlamuana chuan a hawng.
Serchhip Hmar Veng-a Orphanage Home Building 2nd Floor hawnna ah hian Rev. B. Lalthlamuana chuan fahrah, rethei leh chanhai te enkawl leh thian a siam chu an Kohhran din chhan pakhat leh an thil tum, an ngaih pawimawh a nih thu sawiin, hemi an tih hlawhtlinna pakhat chu Orphanage Home an din leh an kalpui mek hi a nih thu a sawi a. Tuna Building tha tak hawn theih an nei ta chu lawmawm a tih thu sawiin, he Home tana thawktu zawng zawngte chungah lawmthu a sawi bawk.

Unity Orphanage Home Building thar hawnna hun hi Unity Orphanage Home Managing Board Vice Chairman, Upa H. Sawihlira chuan kaihruaiin Unity Church Serchhip Bialtu, Pastor Rohlira chuan hunserh a hmang a, Managing Board Treasurer, Thangliani chuan report a pe a, District Child Protection Officer, Lalramdinmawii pawhin Kohhran Member tam tak pawh ni lovin hetianga naupangte enkawlna tha taka an kalpui thei chu lawmawm a tih thu sawiin, an thawhrimna leh inpekna fakawm a tih thu a sawi a. Sawrkar in kalphung a siam thar anga an insiamrem ve thei zel te pawh lawmawm a tih thu sawiin, tunah chuan he Home hi hmeichhia te chauh enkawlna atana hman a nih tawh thu a sawi bawk a. Ani bakah hian Serchhip Hmar Veng VC leh MHIP aiawhte pawhin thu an sawi bawk a ni.

Serchhip-a Unity Orphanage Home hi kum 2000 khan din niin tuna Building thar an hawn hi Rs. 34,35,440/- senga sak a ni a, kawngpui an hnuai chiah niin a Building hi la sak zawm zel theih tura ruahman a ni. He Home-ah hian hawn a nih atanga tun thlengin naupang enkawl lut leh chhuak mi 150 vel an awm tawh a, naupang enkawllai 7 awmin thawktu mi 10 an awm mek bawk a, an naupang enkawl ah hian mi pathum chu an boral tawh a ni.