Serchhip Bazar velah Volunteer Group an duty dawn

Serchhip Kawnpui South Branch YMA chuan Krismas leh Kumthar vuakvet a Serchhip Bazar leh a chhehvel a mitinte thlamuang taka an awm theih nana Duty turin Volunteer Group an din a, tun thlengin mi 36 zet inpe tawhin heng mite tan hian Inrinni khan Training an buatsaih bawk.
Serchhip Kawnpui VC Hall-a Volunteer Group Training buatsaih ah hian Serchhip Kawnpui South Branch YMA President C. Ramengmawia chuan Serchhip Bazar Area chu hmun hrang hrang atanga mi chi hrang hrang, inang lo tak takin an pankhawm thin a nih avangin Krismas leh Kumthar vuakvet ah pawh mitin te thlamuang taka an rawn Bazar-a an len vel theihnan YMA in tan lak an tum thu a sawi a. Ruihhlo leh a kaihhnawih vanga buaina siam te chu an dim dawn lo tih a sawi a. Volunteer Group Commander tur R.Lalduhsanga pawhin mipui himna atan Bazar leh a chhehvel Area a ruihhlo leh a kaihhnawih vanga buaina siam te chu an hmachhawn chat chat tur thu a sawi bawk.

He Training hi Serchhip Kawnpui South YMA Kumpuan Committee Chairman Kapliana Pachuau chuan kaihruaiin Excise & Narcotics Department Serchhip-a OC, R. Lalrinsanga leh Ramthianghlima, Advocate te chu Resource Person atan hman an ni a, Ruihhlo ti leh man kawngah dan in a phut ang te zawm thiam hram hram a pawimawh thu te, YMA in an mi man te Jail a rei tak an tan loh fo chhan chu an man dan fuh loh vang te, Withness mumal loh vang te a nih theih thu te tarlan niin, Duty te tana Dan zawm a pawimawh dan te an zirtir a ni.