LADC Inthlanpui neih chungchangah lawmthu sawi

Lawngtlai District Election Officer (DEO) Donny Lalruatsanga chuan nimin khan a Pisa-ah thuthar thehdarhtute kawmin Lai Autonomous District Council (LADC)-a MDC thlanna tluang taka neih a nih chungchangah thawktute zawng zawng chungah lawmthu a sawi a, Model Code of Conduct (MCC) tha tak a kalpui a nih thu sawiin, Political Party ten thu an awih thu a sawi a. Thuthar thehdarhtuten theihtawp an chhuahna fakawm a tih thu tarlangin, chanchin thar thehdarh kawnga an inpekna ah lawmthu a sawi a. LADC mipuiten inthlanna ngaipawimawh a tha taka vote an thlakna ah lawmthu a sawi bawk.

DEO Donny Lalruatsanga chuan Hmawngbuchhuah-a Vote nei mi pakhat in Vote a thlak lo nia sawi chungchang sawiin, November ni 29 khan Nodal Officer Lalnunpuia leh Security-te kalin vote nei pakhat chu Postal Ballot hmanga vote thlak tir a nih thu a tarlang a. Vanduaithlak taka Polling Officer pakhatin nunna a chân chu pawi a tih thu pawh sawiin, Ex-Gratia pek a nih theih nan theihtawp chhuah a nih thu a sawi a ni.