UD&PA Minister in ‘Aizawl Sumtual’, ‘Multi-purpose Community Centre leh ‘Aizawl Dawh-Rem’ a hawng

Aizawl Smart City Ltd. (ASCL) hmalaknaa MINECO hmuna ‘Aizawl Sumtual’ siam chu Urban Development & Poverty Alleviation (UD&PA) Department changtu Minister K. Sapdanga chuan niminpiah khan a hawng a, nimin khan Aizawl Zonuam Veng-a ‘Multi-purpose Community Centre’ leh Zodin Square-a ‘Aizawl Dawh-Rem’ chu a hawng bawk.

Niminpiah-a ‘Aizawl Sumtual’ hawnna hunah hian UD&PA Minister K. Sapdanga chuan mipuite tana len thawvenna hmun nuam tak ‘Aizawl Sumtual’ sak zawh a ni chu lawmawm a tih thu leh hetiang hmun ngaihtuah chhuaka, a taka chantirtu ASCL-te thawhrimna chu fakawm a tih thu a sawi a ni. Aizawl Sumtual hi Rs. 10,12,65,060 senga sak niin, hna thawktu (Contractor) atan M/S Mizoram Development Agency rawih an ni a, September 5, 2023 khan thawk tanin November 30, 2025 khan zawhfel a ni. He hmun enkawlzui tur hian Open Tender chhang sang ber Mizoram Handloom Industry, Tanhril Vengpui thlan an ni a, thla tin Rs.3,55,555/- chu ASCL-ah an chhunglut dawn a. Mipui tan December 15, 2025 atangin tlawh theih a ni dawn a. Helai hmunah hian Children’s play area, Water fountain, Artificial waterfall, Open air theatre, Cafeteria - ‘Sumtual faisa’ leh a cheimawina thil chi hrang hrang a awm a ni.

Nimin-a UD&PA Minister in a hawn Multipurpose Community Centre hi State sawrkar sum, State Fund cheng nuai 500 senga sak a ni a, a satu (Contractor) atan ZT Powers, Chanmari te rawih niin, October 2021 atang khan sak tan a ni a, September 2025-ah sak zawh a ni. He Community Centre hi Chhawng thum niin kawngpui an (Ground Floor)-ah Car 20 leh Two Wheeler 20 vel dah theihna a ni a; chhawng khatna ah Govt. Primary School awmin chhawng hnihna ah Library, Meeting Room, Kirtchen/Pantry, Office leh Conference Hall mi 200 lenna awmin, mipa leh hmeichhe tan inthiarna room hran a awm bawk a; chhawng thumnaah Badminton hall leh inthlakna pindan awmin, Carpet tha chi Lining Company kutchhuak, 4.50mm a chhaha thuam a ni bawk.

Aizawl khawpuia mipui veivakte tana chawlh hahdamna tura ruahman, ‘Aizawl Dawh-Rem’ hi Vanapa Hall bul, Zodin Square-ah siam niin cheng nuai 145 senga LHM Infra, Khatla ten an sak a ni a, May 2023 khan sak tan niin October 2025-ah sak zawh a ni. Aizawl Dawh-Rem ah hian In hnuai kawngpui an-ah Two Wheeler Parking, Self Help Group Show Room leh Storeroom te a awm bakah, In chhawng laita chu Sanitation Site Office tur atan hawn thar a ni nghal bawk a; A enkawl zui tur hian Mizoram Florists Association-te nen inremna siam niin anni hian kum khat atan cheng nuai khatin an cheiin an enkawlzui dawn a ni.