MSPMC in Project thar thawh tur DPR-ah ‘Life Cycle Costing’ telh thin rawtna tha an ti

Mizoram State Project Monitoring Committee (MSPMC) chuan nimin khan General Body Meeting vawi 7-na neiin kumin chhunga Project an endik 40 te report an thlirho a, Project thar thawh tur DPR-ah ‘Life Cycle Costing’ chipchiar tak telh thin rawtna chu Pilot Project anga kalpui chhin an rel bawk.

Mizoram State Project Monitoring Committee (MSPMC) General Body Meeting vawi 7-na hi CM Conference Hall-ah neih niin he hun hmanpuitu Chief Minister Lalduhoma chuan Project thenkhat chu pumpelh theih loh harsatna engemaw avanga hna kalpui theih loh an awm ve lo thei lo tih sawiin, “Chuvang chuan, kan Project endik tur chanchin kimchang kan hriat lawk theih nan endik tura in thlante hi min rawn hriattir hmasa ta ula, in hnathawh a kal chak zawkin ka ring,” a ti a. Nikum-a an hnathawh report Bu cghu tha a tih thu sawiin, Mizoram-a MLA zawng zawngten an neih ve ngei a thaa a hriat thu a sawi bawk.

He hunah hian MSPMC Vice Chairman R. Lal Rinawma chuan an project endik tawhte atanga hlawhtlinna an hmuh langsar zualte tarlangin, Member Secretary Er. Lalthanzuala Ralte chuan Report a pe bawk a, Mizoram State Project Monitoring Committee hian nikum (2024) chhungin Project 47 an endik a, kumin April thla atanga tun thlengin Project 40 an endik tawh bawk a, Project an endik tawh zawng zawng hi a vaiin 87 a ni. Nimin-a thutkhawm ah hian kumina an endik bikte Report an thlirho a, kumin-a an endik Project 40 te hi Social Sector-ah Project 13, Education, Health leh Agriculture Sector-ah te project 5 theuh, Communication (Road & Bridges)-ah leh Industrial Sector-ah project 4 ve ve, Vety leh Public Health Sector-ah Project pakhat ve ve leh Energy Sector-ah Project 2 te an ni.

MSPMC General Body Meeting hian Project thar thawh tur DPR-ah Life Cycle Costing chipchiar tak telh thin rawtna chu an sawiho hnuah Project pakhatah Pilot anga kalpui chhin tha an ti a. Project thar thawh turah DPR siam dawnin a theih chin chin chu Project-in a hrut tel tur hote nena inhrilhhriatna leh inrawnkhawmna neih zel nise, Project Executing Department ten Project hna tan dawnah Nodal Department, Contractor leh Implementing Agency te chu Project Management Plan Quality Control chungchang inhrilhfiahna hun nei ngei thin se an ti bawk.

He hunah hian MSPMC Member te an tel tha hle a ni.