Tourism Minister in an hmachhawp a puangchhuak

Tourism Minister Lalnghinglova Hmar chuan nimin khan thuthar thehdarhtute kawmin tunhnaia an hmachhawp hrang hrang leh nakum lama hmalakna tura an ruahman te a tarlang.

Nimin-a a Pisa-a thuthar thehdarhtute a kawmna ah hian Tourism Minister Lalnghinglova Hmar chuan tun thla ni 15 atanga December 23 thleng khian Aizawl Lammual-ah ‘Winter Festival 2025’ hman tur a nih thu sawiin, kumdang-a la awm ngai lo thil thar a awm dawn thu a sawi a. Kumin hian Krismas Theme a nih dawn thu leh December ni 23-ah Krismas hawi ‘Costume Parade’ leh ‘Carol’ a awm dawn thu sawiin, Charity Stall siamin, hetah hian mi chanhai zawkte hnena pekchhuah leh tur thawmhnaw leh thildangte thawh theih a nih dawn thu a sawi a. State pawn atangin Artist an lo kal tur thu a sawi bawk.

Hei bakah hian December ni 31 tlai-ah Sakawrhmuituai tlang atangin kumhlui thlahnan ni tla thlirliamna hun buatsaih a nih dawn thu pawh sawiin, “Sihphir Local Council leh YMA te bakah Sakawrhmuituai Development Committee te nen tangkawpin event hi buatsaih a ni ang a, tunlai zaithiam lar tak takte an zai dawn bakah Stall hrang hrang a awm dawn a ni,” a ti a, nakum-ah chuan State pawn atangin mi thahnem tak an rawn tel tawh an beisei thu a sawi.

Phuaibuang khuaa Tlaizawng (Cherry Blossom) par mawi tak behchhanin nakum January 6 leh 7-ah Tourism event huaihawt tum a nih thu Minister chuan sawi bawkin, “Concert nuam tak a awm dawn bakah January ni 6-ah Tuivai-ah a huhoa Nghakuai chiah a ni ang. Phuaibuang khaw bula Hriangmual Tlang-ah 'Adventure Hiking' a kal theih bawk ang. A duh tan puanin (tent) kaiha riahna awm tura ruahmanna siam a ni,” tiin Phuaibuang kaihhnawih thlai leh thildang lei tura awm dawn thu a sawi bawk a ni.

Tourism Minister chuan Tourism thang chho zelah Mizoram mipuite'n hlawkna tam zawk an neih theih nan 'The Mizoram Banakaih (Handholding) Scheme' hnuaiah Mizoram chhung khaw hrang hranga Homestay dinna tur dil mek a nih thu pawh a sawi a, “Tourism a hmasawn tur chuan tourist kan hip a ngai a, chumi tur chuan Mizoram nawm zia tarlan a, tlawh chakawm a kan phochhuah a tul a ni,” a ti a. “Kan hmunhma (tourist destination) mawi tak takte hi Mizorama awmte'n kan ngaihhlut thiam a, kan tlawh nasat poh leh State pawn atangin rawn tlawh ve an chak dawn a ni. Keimahni leh keimahni kan intlawhpawh tam hian pawisa virvel a titam a, local economy a chawikang bawk a ni,” a ti a. “Tourist hip turin hmunhma bakah an tana tlawh chakawm tur event buatsaih a ngai. Kan festival leh event dangte hi hun leh hmun nghet neia buatsaih a, 'Tourism Calendar' siam turin chak taka hma lak mek a ni,” a ti bawk.