Mock Drill neih turah leimin a chhanchhuah dan zir rel

Kumthar January thla khian Serchhip District-ah chhiatrupna lo thlen thulha chhanchhuah leh chhawmdawlna hna thawh dan a tak anga zirhona neih leh a ni dawn a, tun tumah hian leimin avanga chhiatna thlenga chhanchhuahna hna thawh dan pawh zir tum a ni bawk.
    Serchhip District Disaster Management Authority (DDMA) chu nimin khan an Chairman leh Bawrhsap Paul L. Khuma hovin Serchhip DC Meeting Hall-ah thukhawmin kumthar January - March chhunga khuarel chhiatna leh rikrum thila inven dan tur zir lawkna, Mock Drill neih dan tur an sawiho a, February leh March thla chu naupang exam hunlai a nih thin avangin January 19-23, 2026 inkarah Mock Drill hi neih nise an ti a. Lirnghing leh Kangmei laka inven dan zir nan Serchhip DEO chuan Serchhip-a School pahnih bakah Thenzawl leh North Vanlaiphai-a School pakhat ve ve thlangin, a hun tur te ruat fel a ni anga. Hei bakah hian Govt. Serchhip College-ah February chawlhkar hmasa berah Fire Mock Drill neih a ni anga, March thla ah DIET Serchhip-ah neih leh tur a ni anga. North Vanlaiphai CHC-ah Fire and Emergency Services huaihawtin February-ah Fire Mock Drill neih a ni bawk ang. Serchhip khaw chhungin kumin ah leimin a tawrh nasat avangin Landslide Mock Drill pawh a remchan dan anga neih tha an ti a, ruahmanna siam tur a ni bawk ang.