LADC-ah sawrkar thar siam turin hmalak mek zel a ni

Lai Autonomous District Council (LADC) Inthlanpui neih zawh a nih hnuah Indian National Congress (INC) leh Zoram Peoples Movement (ZPM) ten Sawrkar intawm siam tumin hma an la mek.

LADC Inthlanpui vawi 12-na a Vote tla te tunkar Thawhlehni-a chhiar a nih hnuah Party mal-a sawrkar siam thei an awm loh avangin sawrkar thar siam tumin hmalak mek a ni a, niminpiah khan Lai District Congress Committee chuan MNF nen inthlan hma atanga thawhdunna an lo siam tawh chu chhu chatin, MNF chu Sawrkar siampui tura ZPM lam thurualpui tumah leh Congress Member thlemah an puh a, hei vang hian sawrkar thar siam tura rinkai ber te thawhdunna chu a tawp a ni.

Hetihlai hian Congress leh ZPM chuan sawrkar intawm siam tumin District Level-ah inbiakna thui tak an kalpui tawh nia hriat a ni a, tuna a lan dan chuan Congress Member C. Ngunlianchunga kaihhruaina hnuaiah LADC-ah Congress leh ZPM Sawrkar intawm a pian rin a ni a, District Level a inbiakna hi General Headquarters lama Party pahnihte pawmpuina nghah mek niin nimin khan ZPM hruaitute, Lawngtlai-a Sawrkar din dan tur buaipuia kalte chuan Lawngtlai chhuahsanin Aizawl an pan a, hun remchang hmasa ah ZPM hruaitute hian Chief Minister an hmu dawn nia hriat a ni a. Party pahnihte an inrem tluantling thei a nih chuan an hruaitu tur thlangin, Governor hnenah Sawrkarna an siam theih thu an thlen hnuah sawrkar thar a ding thei dawn a ni.

Seat 25 awmna LADC Inthlanpui neih zawh takah hian MNF Party chu Party mal-a Seat la tam ber niin MDC Bial 8-ah hnehna an chang a, INC hian MDC Seat 7-ah hnehna changin ZPM chuan Bial 6 an lak bakah BJP chuan Bial 2 an la a, Independent Candidate ten Bial 2 an la ve bawk a ni. Hetiang hi party hrang hrang leh Independent te Seat lak dan a nih avang hian Seat la tam Party pathum zinga thawkho thei an awm loh chuan sawrkar siam a harsa rih niin a lang.