Bana Kaih (Handholding) ah dilna lut 40,928 awm tawh

Mizoram sawrkar Flagship Programme Bana Kaih (Handholding) Scheme Phase-II ah Progress Partner ni tura dilna 40,928 a lut tawh.

Adviser to CM (Handholding) Dr. KC. Lalmalsawmzauva sawi danin, Bana Kaih Phase-II ah hian niminpiah December ni 11, 2025 thleng khan Progress Partner ni tura dilna 40,928 a lut tawh a, heng dilna te hi Loan Component hnuaia dilna 481 leh Chief Ministers Special Package hnuaia dilna 40,447 an ni. Bana Kaih Phase-II hnuaia Loan Component diltu 481 hi mimal anga dil 458 leh pawl anga dil 23 an ni a; CM Special Package diltu 40,447 zinga 40,435 hi mimal anga dil niin pawl anga dil 12 an awm bawk a ni.

Adviser to CM (Handholding) Dr. KC. Lalmalsawmzauva chuan Bana Kaih (Handholding) Scheme Phase-II hnuaia Loan dilna lut hi a concern department ten an endik mek avangin Bana Kaih Scheme-a thuneitu sang ber Apex Body-in Phase-II hnuaia Progress Partner dilna pawm an la neih rih loh thu a sawi a. Implementing Department ten recommend list an thehluh veleh a felfai leh pektlak ho chu Apex Body in ngaihtuahin a pawmpui dawn a, Implementing department atang hian recommend list 42 lut tawhin, Mizoram KVI Board atangin 22 leh Cooperation Department atangin 20 a lut tawh a ni. Heng hi document kim loh avang leh chhan dang avangin en that leh tura hriattir leh mek an ni a, a rang lama thlir that leh tum a ni.