Mizote ngeiin Mizo history ziah ve tul an tih thu sawi

Art & Culture Minister C. Lalsawivunga chuan Mizote ngeiin Mizo history an zirchian-a an ziah ve tul an tih thu sawiin, Mizo tobul chhui tura hmalak mek a nih thu a sawi bawk.

Mizoram University-a Department of History & Ethnography buatsaih ni thum chhung awh tur ‘International Seminar on Beyond Borders and Texts: Reframing the History and Polity of Highlanders in the Eastern Himalayan Borderlands’ hawnna nimin-a MMTTC Lecture Hall, Mizoram University-a neih a hmanpuina ah Art & Culture Minister C. Lalsawivunga chuan Mizo history zirchianna kawngah Mizoram sawrkar a inhawn thu leh kawng hrang hranga hma lak mek a nih thu sawiin, Mizote ngeiin Mizo history an zirchian a, an ziah ve a tul a tih thu a sawi a. Archaelogy leh zirna peng dangte pawh Mizo history zirchian nana hman tul a tih thu leh a enkawl lai Art & Culture Department chuan hemi kawngah hma a la ve mek a, tunhnaia ruhro hmuh-chhuah thar thenkhat chu a upat dan hre turin Carbon Dating tih a nih thu a sawi bawk.

Art & Culture Minister chuan Mizoram sawrkar chuan Mizo history zirchian tul a tih avangin Art & Culture Department hnuaia Tribal Research Institute bultumin Mizo tobul chhui tura hmalak a nih thu sawiin, zirna peng hrang hranga mithiamte he Mizo history chhuinaah hian teltir an ni tih a sawi a. He Seminar hian hriatna a tihhausak belh mai bakah Eastern Himalaya ramri hrula tlangmite chanchin zirchianna dik zawk leh awmze ril zawk a hrinchhuah a beisei thu a sawi bawk a ni.

He Seminar hian ni thum chhung, December ni 9 atanga ni 11, 2025 a awh dawn a, nimin-a a hawnna hun hi Prof Kishor Gaikwad, Head, Department of History & Ethnography chuan kaihruaiin Prof. K. Robin, Convener, Department of History & Ethnography chuan Seminar sawi-hawnna a nei a, Prof. David C. Williams, School of Law, Indiana University chu thupui sawihawngin North East India chungchang zirtu historian lar Prof. Sajal Nag, Department of History, Royal Global University, Guwahati pawhin thu a sawi bawk a ni.