Vety Minister in Ar vulhtu hlawhtling mek a tlawh

AH&Vety Minister C. Lalsawivunga chuan nimin khan Champhai District chhung Khuangleng khuaa Ar vulhtu hlawhtling chho mek John Lalrinchhana chu a hnathawhna, Khuangleng-ah tlawhin, Mizoram sawrkar Flagship Programme - Bana Kaih tihhlawhtlin tum leh intodelh tuma theihtawp a chhuahna chu lawmawm a tih thu sawiin, a department chan atanga tanpuina awm thei ang angte pek a tiam a, sawrkarin dawmkan a tum thu a sawi bawk. AH&Vety Minister chuan Intodelh chu an thupui leh innghahna a ni tih sawiin, “Chumi tihlawhtling tur chuan Handholding Policy leh kawng hrang hrangin sawrkar department tinin hma a la mek reng a ni. AH & Vety Department pawhin theihtawp kan chhuah a, Pu John Lalrinchhana'n intodelh mai ni lo, tam tak thawnchhuak thei hial tur khawpa a beihna hi a ropui ka ti. Helai hmun hi sawrkar chuan kan ngai pawimawh em em a, Ar vulh mai ni lovin a bul maiah hian Sawhthing sawngbawlna (Ginger Processing Plant) siam tura kalpui mek zel a ni a, kum 2026 January-ah chuan zawhfel theih kan beisei,” a ti bawk.

Minister C. Lalsawivunga hian Sawhthing sawngbawlna tur hmun hi tlawh nghalin a panna kawng meter 270-a thui siam hna leh zauh hna thawh mek chu a en a, helai hnunah hian tui litre nuai 10 dahkhawlna tur siam hna leh khawl chi hrang hrang chawmzo tur Transformer khawl bun hnate chak taka kalpui mek a ni bawk.