Mimal damdawi In tam zawkin MUHCS la zawm lo

Kumin April thla atanga hman, Mizoram Universal Health Care Scheme (MUHCS)-ah Mizoram-a mimal damdawi In tam zawkte chu tun thlengin an la tel lo a, an dinna ngaiah an la ding tih Non-Government Hospital Association, Mizoram (NGHAM) hruaitute chuan sawiin, tun dinhmunah chuan zawm leh zawm loh chung-changah thuthar an nei lo tih an sawi a, “MUHCS chungchanga rawtna kan neihte leh kan zawm theihna tur sawrkara kan thehluh chu tun thlengin sawrkar atangin a chhanna kan la dawng lo,” an ti.

MUHCS hnuaiah hian AB PM-JAY, Mizoram State Health Care Scheme leh sawrkar MR-te chu chhunfin an ni a, Civil pensioner leh Provisional Employee-te pawh pawh he Scheme hnuaiah hian hamthatna siamsak an ni a. MUHCS-te hi sawrkar damdawi In leh Empanelled Hospital-te-ah hman theih a ni. Mizoram-ah MUHCS Empanelled Private Hospital 13 leh Empanelled Private Day Care Centre pathum a awm bakah Mizoram chhunga sawrkar damdawi In zawng zawngah hman a ni a. Mizoram pawnah Empanelled Hospital 25 leh Deemed Empanelled Hospital 13 a awm mek bawk.