Digital creator-te 'Cultural Ambassador' an nih thu sawi

Mizoram Governor General (Dr) Vijay Kumar Singh chuan Digital Creator te chu Mizoram State mawi tak leh hnam ziarangte khawvel hmuh theiha pholanga auchhuahpuitu 'Cultural Ambassador' an nih thu a sawi.

Nizan hmasa khan 'Mizoram Creators' Fest 2025' kharna chu Aijal Club Park-ah neih niin he hun a hmanpuina ah Governor General (Dr) Vijay Kumar Singh chuan Mizoram Creators' Fest buatsaihtute hmalakna fakawm a tih thu sawiin, Mizoram thalaite tana an theihna phochhuahna hun tha, remhriatna leh digital lama thil thar pholanna siam sak chuan hmasawnna a thlen ngei a beisei thu a sawi a. Digital Creator kalkhawmte chu Mizoram State mawi tak leh hnam ziarangte khawvel hmuh theiha pholanga auchhuahpuitu 'Cultural Ambassador' an nih thu a sawi a. Khawvel thiamna leh hmasawnna inher danglam chak tak karah thil thar thiam zung zung duha insiamrem thin thalai, thil danglam bik ngaihtuah chhuaktute'n digital community ni thei tura rahbi pawimawh tak an siam chu lawmawm a tih thu a sawi bawk.

Governor chuan Social Media chu hmanraw chak tak a nih tawh thu leh mimal tinte'n an dinhmun leh thiamnate phochhuah nan zalên taka an hman mek thu sawiin, Digital Creator kalkhawmte chu midangte ngaihdan siam saktu, thalaite thununtu leh khawtlanga thil inlumlet dan chena thunun thei an nih avangin an thiamnate a tha lam hawia hmanga, dan zawm chung leh mawhphurhnate tha taka hlen chunga hmang turin a chah a. Social Media chu inpumkhatna, thu dik chauh thehdarhna, midangte rilru a tha lam hawia hruaina leh talent tihpun nana hman a tul thu a sawi a. Digital khawvel ah engpawh thleng thei a nih avangin chetsual loh nana fimkhur a tul thu leh a him thei ang bera Social Media hman a tul thu a sawi bawk.

Digital Creator-te chu Mizoram sum leh pai dinhmun thanlen zel nana kawng awmte dapa Tourism nasa zawka chawilar tura Larsap chuan chahin, Mizo thalaite chu Creator tam takin kawng hrang hranga sum thahnem tak an lakluh thin dante zira, kan ram mawina, hnam ziarang leh nunphung tha tak takte chu sum lakluh nana hmanga chhawr tangkai tum turin a fuih a. Tunhnaia Social Media platform hrang hrang kaltlanga Mizoram Tourism nasa taka chawilar a nih dante leh hemi avang hian khualzin tam takin Mizoram an rawn tlawh phah thu tarlangin, hmun dangah kal kher lo pawhin Mizoram atang ngei pawhin Digital Creator ni chunga eizawnna tha tak a neih theih thu a sawi bawk a ni.

Ni thum chhung awh 'Mizoram Creators' Fest 2025' kaltlang hian Mizorama digital creator naupang tak tak leh hmabak eng tak neite zawn chhuaha, hmasawn zel thei tura thiamna leh chakna pek bakah creative media industry-a eizawnna an hmuh theih nana tanpui tum niin Digital Creator thawhhlawk leh tithate hnenah lawmman sem a ni bawk.