Lenkawl

Nimin khan Serchhip-ah District Cooperative Development Committee(DCDC) thutkhawm vawi 6-na neih niin Cooperation Department changtu Commissioner & Secretary Udit Prakash Rai leh Registrar of Cooperative Societies John LT. Sanga te chuan an rawn telpui a ni.

Mizoram Secondary School Games vawi 42-na chu nimin khan zawhfel niin Serchhip District pawhin infiamna hrang hrangah Medal an la.

Keitum leh Khawlailung inkar Tuichang lui-a ‘Nghakuai Chiah Runpui’ chu nimin khan neih tan niin Vawiin hian chhunzawma zawhfel a ni ang.

Nimin chawhma dar 10:00 vel khan Lalruatfela (12), Khawlailung Bunghmun chu Khawlailung leh Hmunzawl inkar-a Tuichang lui-ah chesualin tui-ah a tlahlum a, Vawiin hian vuiliam a ni ang. Khawlailung atanga LENKAWL in thu a dawn danin Lalruatfela hi MGNREGS hnuaia a pa te inhlawh tur zuiin Tuichang lui lamah hian a kal a, an hnathawk lai thla la tur (Mates) an nghah laiin Tuichang lui-ah hian kala chesualin a tla a, a bulhnai lo awm ten chhan tum mah se an chhan mai thei lo a, tuithiam te punin an lakchhuah chuan a lo boral hman tawh a ni. Lalruatfela ruang hi nimin khan an chenna In-ah lain lumen a nih hnuah Vawiin hian vuiliam a ni ang.

Serchhip Officers’ Club (SOC) te chuan niminpiah tlai khan Serchhip DIET-ah Advance Krismas hmangin kum 2026 chhunga an pawl hruaitu tur an thlang nghal a, President-ah Isaac Lalchhuanmawia (Sr. EE, PHE); Vice President-ah Dr. Malsawmtluanga Fanchun (PD DRDO); Secretary-ah Dr. Lalawmpuia (Lecturer, DIET); Secretsry i/c Sports-ah John Zoram-mawia (Lecturer, DIET); Secretary i/c Information-ah Stephen Auhmun (APO, DRDO); Treasurer-ah Lalnunmawii (DIPRO) leh Fin. Secretary-ah Dr. H. Vanlalrawna (DVO) te thlan an ni.

Govt. Higher Secondary School Serchhip a NSS Unit te chuan ‘Krismas Pual Thisen pek runpui’ kalpui mek denchhenin nimin khan District Hospital Serchhip Blood Bank-a dah turin thisen Unit 17 an pe a, thisen petute hi mipa 14 leh hmeichhia 3 niin Serchhip Blood Bank-ah kalin thisen hi an pe a ni.

Nimin khan Serchhip DC Meeting Hall-ah ‘Land Committee, Serchhip District Headquarters’ chu Vice Chairman leh Addl. DC Lalrinzuala kaihhruaiin an thukhawm a, kumin atana Serchhip Town Land Committee thutkhawm vawi thumna ah hian dilna lut chi hrang hrang 21 te ngaihtuah niin House Site dilna 16, Land Lease dilna 4 leh Periodic Patta dilna pakhat te chu ngaihtuah a nih hnuah Recommend vek a ni. He hunah hian Settlement Officer Gaston Vanlalhriatpuia bakah Line Department aiawh te leh Member dangte an tel a ni.

Chief Minister Lalduhoma chuan nimin khan Mizoram State Commission for Protection of Child Rights (MSCPCR) hotute kawmin, Mizoram-ah hursualna laka naupangte venhimna Dan, POCSO Act kaihhnawih thubuai a pung zel chu pawi a tih thu a sawi.

Chief Minister Lalduhoma chuan hmeichhia te chu an hamthatna leh humhalhna Dan hrang hrang hrechianga hmang tangkai turin a chah.

Mizoram Youth Commission (MYC) Chairman Malsawmzuala Ralte chuan ZPM sawrkar hnuaiah MYC kaltlangin thalai 400-in hna an hmuh tawh thu a sawi.

Champhai North Bialtu MLA Er H. Ginzalala chuan niminpiah khan Khawzawl District-a Neihdawn khawtlang mamawh, an Tomato chinna hmun atana hman tur Tui chhoh Luan Project (Solar Pump) a hawng. He Tuichhoh luan Project hi Neihdawn khawtlang, Tomato chingtuten an mamawh niin tui harsatna nasa tak an neih avanga harsatna an tawh thin chu Bialtu MLA hian hriain, an harsatna sutkian sak dan ngaihtuah ngaihtuah a nih hnuah he Project hi ruahman a ni. Neihdawn-ah hian In 80 velin Tomato an ching mek a, tuna hmalakna thar avang hian nakum atang chuan In 120 velin Tomato an chin theih beisei a ni a, Neihdawn-a Tomato chingtute te hian kum khat-ah cheng nuai 70 atanga nuai 100 lai an hmu thei tih sawiin, he hmalakna hi lawmawm an tih thu an sawi bawk.

BJP Mizoram chuan nimin khan Aizawl-a an Party Office-ah Advance Christmas leh kum 2025 atana Office kharna hun an hmang a, he hunah hian State Vice President Vanupa Zathang IPS (Retd) chuan thu sawiin, T. Lalhmachhuani (Mimi-i) chuan thuchah a sawi bawk a, kumthar January 12-ah Office hi an hawng leh ang.

Mizoram sawrkar Flagship Programme Bana Kaih (Handholding) Scheme Phase-II ah Progress Partner ni tura dilna 40,928 a lut tawh.

Directorate of Sports & Youth Services buatsaih ‘Annual Reports 2024-2025’ chu nimin khan Sports & Youth Services changtu Minister Lalnghinglova Hmar chuan Aizawl-a SYS Conference Hall-ah a tlangzarh a, Sports & Youth Services Department hmalakna hrang hrang tlangzarh theiha a awm chu a hlut thu sawiin, thalaite hmakhua ti eng tura hmalakna hrang hrangah theihtawp chhuaha tan la zel turin thawkte chu a fuih bawk. Annual Reports 2024-2025 tlangzarhna hi SYS Director H. Lalhmingthanga chuan kaihruaiin Deputy Director C. Lalmalsawma chuan Annual Reports hi a sawifiah bawk.

December 8 atanga 12, 2025 chhunga neih ‘State-Level Skill Competition 2025’ kharna chu nimin khan Aizawl-a LESDE Auditorium-ah neih niin LESDE Minister Lalnghinglova Hmar chuan a hmanpui a, he huna thalai kalkhawmte chu eizawnna tling thiamna neih tum tura chahin, thiamna engpawh, tunlai khawvel mila digitise theih zel a nih a pawimawh thu a sawi bawk. State-Level Competition-a telte hi November 18 atanga 20, 2025 chhunga District Level Skill Competition-a titha zual thlanchhuah te niin Bakery, Beauty Therapy, Cabinet-making, Carpentry leh Car-painting-a titha zual te hnenah lawmman semin Guwahati-a Regional Level intihsiakna ah an tel dawn a, an tithat chuan khawvel huap intihsiakna ah an tel thei dawn a ni.

Mizoram Legislative Assembly-a Committee on Petitions leh Kerala Legislative Assembly-a Committee on Petitions te chuan hnathawh dan leh kalphung hrang hrangte zirchiangin nimin khan inkawmhona an nei a, Mizoram Legislative Assembly Committee on Petitions atangin Chairman T. Lalhlimpuia bakah Member pahnih H. Lalzirliana leh Prova Chakma te an tel a, Kerala lam atangin Chairman Antony Raju bakah Member te telin Official te an tel bawk a ni. He hunah hian Committee on Petitions case hrang hrang te sawiho in, Procedure leh Proceedings inzir tawn sak bakah siam danglam an duhte sawiho a, Committee on Petitions chu mipui leh sawrkar inkara palai pawimawh tak a nih thute tarlangin, mipuite'n tangkai zawka an chhawr theih nana hmalak dan turte an sawiho bawk a ni.

Serchhip District chhunga Bawktlang leh North Vanlaiphai khua ah ‘Border Area Meet & Bharat ko Janno - a Chain Yatra Programme’ hman a ni.

Vawiin December 12, 2025 hi kumin (2025) a zirna In te an inhawn ni hnuhnung ber tur a ni ta a, karleh Thawhtanni atang chuan zirna In hrang hrangte hian ‘Winter Vacation’ an hmang tawh dawn a, ni 23 chhung chawlh hi hmangin kumthar January 7, 2026-ah zirna In te hi hawn tan leh tur a ni ang. Serchhip-a zirna In tam tak te chuan Vawiin hian ‘Advance Krismas’ hmangin intihhlimna hun an nei ang.

Chief Minister Lalduhoma chuan kumtin ramngaw vata Loneih (Jhum) chu Mizo hnam nunah thuk takin bet tlat mah se, leilung chereu zel leh sik leh sa inthlak danglam (climate change) avangin leh kan hmakhua a ngelngheh zawk nan technology changkang zawk hman a tul tawh thu a sawi.

Mizoram-a Halpuah leh halmawi khuahkhirhna Dan hman tura duan chu nakum lamah Assembly Session-ah putluh tum a ni.

Mizoram Governor General (Dr) Vijay Kumar Singh chuan Digital Creator te chu Mizoram State mawi tak leh hnam ziarangte khawvel hmuh theiha pholanga auchhuahpuitu 'Cultural Ambassador' an nih thu a sawi.

Kum 2025-2027 chhunga YMA Kumpuan ‘Ruihhlo Do’ hawnna chu nizan hmasa khan neih niin Central YMA President R. Lalngheta chuan ruihhlo zuartute chu eizawnna dang lo ngaihtuah turin a chah.

West Phaileng khua chuan nimin khan an kum 100 tlinna, Centenary lawmna chu West Phaileng-a GSA Playground-ah hmangin he hun hi Bialtu MLA, Dr. R. Lalthangliana chuan khuallian niin a hmanpui a, Centenary lungphun hawngin Souvenir a tlangzarh nghal bawk. West Phaileng Centenary lawmna hunah hian Dr. R. Lalthangliana chuan an Bial chhungah khaw upa leh hlun tak tak a awm nual tih sawiin, “Kan pipute leh hranghlui te sulhnu hlu leh ropui tak takte kan chhuichhuah a, kan vawnthat a tul a. Kan seilenna hmun hian kan nun leh kan hunah nghawng a nei thin a. Chuvangin, kan seilenna ngaihlu ila, hmasawn zel turin mawhphurhna kan nei tih i hrethar ang u,” tiin kalkhawmte a fuih bawk.

AH&Vety Minister C. Lalsawivunga chuan Kalphung thar sawrkar chu mi taima tan dinchhuahna tur sawrkar a ni dawn tih a sawi.

Tourism Minister Lalnghinglova Hmar chuan nimin khan thuthar thehdarhtute kawmin tunhnaia an hmachhawp hrang hrang leh nakum lama hmalakna tura an ruahman te a tarlang.

Aizawl Chawnpui Veng-a ‘Chawnpui Sports Centre’ sak thar chu nimin khan UD&PA Minister K. Sapdanga chuan a hawng.

Mizoram Larsap, General (Dr) Vijay Kumar Singh chuan Aizawl Lok Bhavan-a nimin khan Assam leh Nagaland State-te dinchamphaphak 'Foundation Day' lawmna hun a buatsaih.

Lai Autonomous District Council (LADC) Inthlanpui neih zawh a nih hnuah Indian National Congress (INC) leh Zoram Peoples Movement (ZPM) ten Sawrkar intawm siam tumin hma an la mek.

State Council of Educational Research and Training (SCERT) Mizoram buatsaihin nimin khan Aizawl-a SCERT Auditorium-ah ‘Poetry Festival’ hman a ni a, he Festival hi kum 2011 atang khan kumtin hman niin kumin hi a vawi 14-na a ni a, School 11 atangin zirlai 60-ten poetry inziah-siakna an nei a ni. He intihsiakna ah hian a pumpui ah William Lalchhanchhuaha, Class XII (Arts), Helen Lowry HSS chu pakhatna niin Linzy Malsawmkimi, Class XI (Science), Mount Carmel HSS chu pahnihna a ni a, Lalmawizuali, Class XI (Science), St. Paul’s HSS chu pathumna a ni bawk.

Nimin khan Champhai-ah District Level Narco Coordination Centre (NCORD) Committee chuAddl. DC James Lalnithanga hova thukhawmin an hmalakna an thlirlet bakah an hmalak zel dan turte an sawiho a. He huna tarlan a nih danin November 2025 chhung khan Cham-phai District-ah Police ten Heroin gram 0.933 manin thubuai 9 ziahluh a ni a, Excise & Narcotics Department ten Heroin gram 11.5 manin Methamphetamine kg. 25.209 an man bawk a, thubuai 5 an ziaklut bawk a. Heng thubuai kaih-hnawih ah hian mi 21 man an awm bawk.

IndiGo Airline chuan tun thla ni 3 leh ni 5 inkara thlawhna thlawh dan mumal loh avanga tuartute hnenah zangnadawmna Rs. 10,000/- theuh a pe dawn a, zangnadawmna hi Travel voucher anga siamin, thla 12 chhungin IndiGo thlawhna an chuan leh hunah an hmang thei ang.

Aizawl District Legal Services Authority (ADLSA) chuan niminpiah khan Aizawl District Court-a District Judge Meeting Room-ah pawikhawihna tuartu mi 12 hnenah zangnadawmna an hlan a. Crime Victim Compensation semna inkhawm tawi hi Gauhati High Court Judge leh High Court Legal Services Committee Chairman Justice Marli Vankung chuan hmanpuiin mi pawikhawihna avanga zangnadawmna inhlanna hun hman a ngai thin chu pawi a tih thu a sawi a. Zangnadawmna chu a dawngtute’n nunphung pangngai an zawh leh theih nan leh intun nun nana dik taka hmang turin a chah a ni. He hunah hian mi kut tawrh avanga thi leh kumtling lo pawngsual tawk mi 12 hnenah zangnadawmna Rs. 52,80,000/- semchhuah a ni.

Nimin khan 2nd India Reserve Battalion (2nd IR Bn.) in kum 25 an tlinna, Silver Jubilee lawmna chu Khawzawl-a an Battalion Hqrs. ah neih a ni a, he hun hi Director General of Police Sharad Agarwal IPS chuan khuallian nia hmanpuiin 2nd IR Bn. in kum 25 an tling chu a lawmpui thu a sawi a, an inpekna leh an taimakna avangin Khaw-zawl, Champhai leh Saitual District mipui te chu him takin an nungin an khawsa thei tih sawiin, a hmaa hna an lo thawh that angin Commandant leh a hnuaia awm zawng zawngte chu taima tak leh inpe takin hna thawk chhunzawm zel turin a fuih bawk. He hunah hian 2nd IR Bn. Commandant KL. Vulmawia chuan inlawmna thu a sawi bakah 2nd RO C. Lalremruata'n 2nd IR Bn. chungchang leh din a nih atanga an hnathawh dan te a sawi bawk a ni.

Serchhip Bazar atanga Serchhip Hmar Veng kaltlanga Kikawn thleng pawh tur kawng thar siam tur chu nimin khan laih tlang niin kawng thar erawh siamthat ngai neuh neuh ala awm thung.

Serchhip District Cricket Association (SEDCA) ten an hruaitu boral, HD. Lalhmachhuana leh V. Lalnuntluanga te hriatrengna atana Cricket Tournament an buatsaih chu Serchhip Sports Complex-ah khelh mek a ni a, he Tournamwnt-ah hian Team 6 telin Vawiin hian Semi Final khelh tum a ni a, zing dar 9:30-ah AO3C leh Bawngchawm CC inhmachhawnin chawhnu dar 1:00 ah Tuikhuah CC leh Thenzawl CC te an inhma-chhawn ve leh bawk ang.

Govt. Zemabawk Higher Secondary School chuan nimin khan an kum 25 tlinna, Silver Jubilee lawmin Bialtu MLA leh Minister Lalthansanga chuan a hmanpui a, \halaiten kan taksa leh rilru kan vawn uluk a pawimawh thu sawiin, ruihhlo mai bakah zuk leh hmuama fihlim turin a chah bawk. He hunah hian School Principal Lalrinpuii chuan thu a sawi bakah Report ngaihthlak niin thawktu boral tawh te sunna hun hman a ni bawk.

FCS&CA Minister B. Lalchhanzova chuan Mizoram-a LPG Home Delivery kalpui mekah Aizawl Municipal Area bakah District Hqrs. zingah Serchhip, Hnahthial, Khawzawl leh Mamit Town-a te zaa za kalpui a nih tawh thu a sawi a, PMUY hnuaiah a thlawna LPG Connection dilna kalpui leh mek a nih thu a sawi bawk.

Mizoram State Commission for Protection of Child Rights (MSCPCR) chuan Aizawl Municipal Corporation (AMC) huamchhunga MBSE Recognized High School te Ranking puanchhuahna hun nimin khan an buatsaih.

Nimin khan Aizawl-a Mizoram Assembly House Conference Hall-ah ‘Transformed Mizoram Vision 2047 Roadmap Workshop’ neih a ni a, he hunah hian Chief Minister Lalduhoma leh sawrkar mi pawimawh dangte an tel a ni.

Mizoram State Rural Livelihood Mission (MzSRLM) leh SELCO Foundation te thawhhona hnuaia hmalakna peng pakhat atan nimin khan Rural Development & Administration Minister Prof. Lalnilawma chuan Solar Sprayer a sem.

AH&Vety Minister C. Lalsawivunga chuan nimin khan Champhai District chhung Khuangleng khuaa Ar vulhtu hlawhtling chho mek John Lalrinchhana chu a hnathawhna, Khuangleng-ah tlawhin, Mizoram sawrkar Flagship Programme - Bana Kaih tihhlawhtlin tum leh intodelh tuma theihtawp a chhuahna chu lawmawm a tih thu sawiin, a department chan atanga tanpuina awm thei ang angte pek a tiam a, sawrkarin dawmkan a tum thu a sawi bawk. AH&Vety Minister chuan Intodelh chu an thupui leh innghahna a ni tih sawiin, “Chumi tihlawhtling tur chuan Handholding Policy leh kawng hrang hrangin sawrkar department tinin hma a la mek reng a ni. AH & Vety Department pawhin theihtawp kan chhuah a, Pu John Lalrinchhana'n intodelh mai ni lo, tam tak thawnchhuak thei hial tur khawpa a beihna hi a ropui ka ti. Helai hmun hi sawrkar chuan kan ngai pawimawh em em a, Ar vulh mai ni lovin a bul maiah hian Sawhthing sawngbawlna (Ginger Processing Plant) siam tura kalpui mek zel a ni a, kum 2026 January-ah chuan ...

Mizoram Rajya Sabha MP K. Vanlalvena chuan Mizo mipuite zinga Income Tax Certificate phutna thuchhuah awm thin chu dan lova Mizo mipuite tihbuaina a nih thu a sawi.

PC Party chuan kumin atan Aizawl-a an party Office chu nimin khan kharin nakum January 15-ah an hawng leh ang.

Lawngtlai District Election Officer (DEO) Donny Lalruatsanga chuan nimin khan a Pisa-ah thuthar thehdarhtute kawmin Lai Autonomous District Council (LADC)-a MDC thlanna tluang taka neih a nih chungchangah thawktute zawng zawng chungah lawmthu a sawi a, Model Code of Conduct (MCC) tha tak a kalpui a nih thu sawiin, Political Party ten thu an awih thu a sawi a. Thuthar thehdarhtuten theihtawp an chhuahna fakawm a tih thu tarlangin, chanchin thar thehdarh kawnga an inpekna ah lawmthu a sawi a. LADC mipuiten inthlanna ngaipawimawh a tha taka vote an thlakna ah lawmthu a sawi bawk.

Krismas leh Kumthar vuakvet lo thleng turah kum danga lo tih thin tawh angin Lirthei tlan phal lohna hun leh hmun, 'No Vehicle Zone' siam a ni leh dawn.

Lunglei District Police Cyber Cell te hmalaknaa CEIR Portal hmanga Mobile Phone bo/ruk an hmuhlet Mobile Phone 24 te chu niminpiah khan a neitute hnenah hlan let niin Rs. 3,53,174/- man zet a ni. Heng Mobile Phone hlanletna ah hian Lunglei Addl. SP K. Beihmotaosa chuan Mizoram chhung leh pawnah Mobile Phone bo leh ruk bo a tam tih sawiin, Lunglei Cyber Cell chuan Report an dawn tawh phawt chu CEIR Portal kaltlangin a tam thei ang ber chhuichhuah sak zel an tum tih a sawi a. Phone bo zawn chu thil hautak leh awlai lo tak a nih thu sawiin, a hlawhtlinna pawh CEIR Portal tangkai leh awmze nei taka hman thin vang leh Cyber Cell staff-te thawhrimna vang a nih thu a sawi a. Mobile phone hlui (secondhand) leitute pawh fimkhur a ngaih thu a sawi bawk. Lunglei Police Cyber Cell hian July ni 11, 2024-a din a nih atanga tun thlengin CEIR Portal kaltlangin mobile phone bo leh ruk bo 194 an hmuh letsak tawh a ni.

India rama sawrkar damdawi In tha bik tehna, National Quality Assurance Standards (NQAS)-ah Mizoram-a HWC-Primary Health Centre pathum – South Lungpher PHC, Bungtlang South PHC leh Tipa PHC te chu an tling thar a, South Lungpher PHC hian 86.10% hmuin Bungtlang South PHC hian 87.86% leh Tipa PHC in 90.90% an hmu a ni. Heti hian Mizoram chhunga HWC-PHC 57 target awm zinga 43-in National-Level NQAS Certificate an nei tawh a. Tun dinhmun ah Sawrkar damdawi In 57 te’n NQAS National-Level Certificate nei mekin sawrkar damdawi In 16 leh HWC Sub-Centre 31 ten National-Level Assessment an dil leh mek a ni.

Administrative Training Institute (ATI), Aizawl leh Mizoram State Legal Services Authority (MSLSA) tangkawp buatsaihin nimin khan Lunglei Convention Centre-ah awrkar hnathawkte tan dan hriatna lama intuai tharna, ‘Special Awareness Campaign on Legal Provisions & Matters for Government Officials of Mizoram’ buatsaih a ni a, sawrkar hnathawkte tana Dan hriatna lama intuaihriamna hun hi Mizoram District hrang hrangah buatsaih tum niin Sawrkar hnathawkte tan dan hriat leh dan zawm a tulzia inzirtir nan te, dan hriat loh leh zawm loh avanga harsatna thleng thin pumpelh nan te, dan hriat loh avanga sawrkar sum leh tha luangral thin ven nan leh sawrkar hnathawkte thinlung leh nungchanga dan zawm duhna a beh tlat theih nan he hun hi buatsaih a ni.

Lawngtlai District-a Chamdurtlang-I khua Village Council chuan kumin a Buh thar tam te chawimawina hun nimin khan buatsaihin Lawngtlai DAO Lalremmawia Colney chuan khuallian niin a hmanpui a, Buh thar tam chawi-mawi chu inelna thianghlim a nih bakah Intodelh tura midang zirtirna tha tak a nih thu a sawi bawk. He hunah hian buh Tin 600 thartu Liansailova, Tin 450 thartu Zorammawia leh Tin 350 thartu Lalvohbika te hnenah chawimawina hlan a ni.

Durtlang Leitan Branch YMA chuan nizan hmasa khan an kum 39 tlin lawmna hun hmangin he hun hi Aizawl North-I Bialtu MLA leh Minister Vanlalhlana chuan a hmanpui a, Durtlang Leitan Branch YMA in an din champhaphak vawi 39-na an thleng thei chu a lawmpui thu sawiin, YMA chu pawl ropui tak a nih thu a sawi a, Hlawhtlinna thuruk chu taimakna, beih hram hramna, hun vawn dik leh mahni fel taka invawn te a nih thu sawiin, kalkhawmte chu a fuih bawk a ni.

Kumthar January thla khian Serchhip District-ah chhiatrupna lo thlen thulha chhanchhuah leh chhawmdawlna hna thawh dan a tak anga zirhona neih leh a ni dawn a, tun tumah hian leimin avanga chhiatna thlenga chhanchhuahna hna thawh dan pawh zir tum a ni bawk.

Serchhip District Magistrate chuan Serchhip District chhung khawlai a Ui chhuah zalen khapna thupek a tihchhuak thar leh.

Serchhip District Pik-Up Owners’ Association te chuan nimin khan CMS Pincic Spot-ah General Assembly vawi 25-na an hmang a, an pawl inrelbawlna hrang hrang relin kum 2026-a an pawl President atan F. Laldawta (Dinthar Veng); Vice President-ah J. Lalthuamliana (Dinthar Veng); Secretary-ah K. Lalpekhlua (Dinthar Veng); Asst. Secretary-ah C. Lalneihkima (Field Road), Treasurer-ah K. Rodinga (New Serchhip) leh Fin. Secretary-ah Laltlanmawia (Bazar Veng) te thlan an ni.

Mizoram sawrkarin damlote chhawmdawlna atana Healthcare Scheme a duan, Mizoram Universal Healthcare Scheme (MUHCS) hmangin damlo 55,483 enkawlna senso pek a ni tawh a; MUHCS kalpuitu damdawi On hrang hrangte hnenah sawrkarin damlo an enkawlna bill atan cheng vbc. 86.65 a pe tawh a ni.

Mizoram sawrkarin khualkhuaa thite ruang phurh man a tum sakna, 'Assistance for Transportation of Bodies of Deceased Persons within Mizoram' kaltlangin ruang 1,613 phurhna man cheng nuai 167.81 pek a ni tawh.

Mizoram sawrkar Rural Development & Administration (RD&A) Department hnuaia Mizoram State Rural Livelihoods Mission (MzSRLM) huaihawtin nimin khan Lunglei Saikuti Hall-ah Regional SARAS (Sale of Articles of Rural Artisans Society) Fair vawi 12-na neih tan a ni a, RD&A Minister Prof. Lalnilawma chuan hawngin tualchhung thil tharchhuah leh siamchhuah te inhlutsak a pawimawh thu a sawi a, eizawnna insiamsakna leh inchawikan tawnna a nih avangin an mamawh zawng a nih chuan an thil zawrhte leisak zel turin mipuite chu a chah bawk a ni.

Public Health Engineering Department (PHED) Minister Prof. Lalnilawma chuan nimin khan Lunglei khawpui tuilakna, Greater Lunglei Water Supply Scheme (GLWSS) hmun Pialthleng leh Tlawng lui tlawhin Lunglei khawpuiin tui hnianghnar zawk a hmuh theih nana AMRUT 2.0 leh SASCI hnuaia GLWSS tihchangtlun hna thawh mek a enfiah a, PHE Minister chuan hna tha tak leh chak taka kalpui a nih theih nan Department lam pawhin theihtawp an chhuah thu leh Contractor-te pawh a tul anga an nawr reng thu a sawi bawk. Greater Lunglei Water Supply Scheme hi November ni 22, 1995-ah hman tan niin tunah hian kum 30-a upa a ni tawh a, SASCI hnuaiah hian cheng vbc. 55.7 sengin hmalakna kalpui mek a nih bakah AMRUT 2.0 hnuaiah cheng vbc. 9.9778 sengin hmalak mek a ni bawk.

Lai Autonomous District Council (LADC) Inthlanpui vawi 12-na a Vote tla te chu nimin khan tluang taka chhiar niin MDC Seat 25 awm-ah Party mal-a sawrkar siam thei khawpa chak an awm lo a, MNF Party chu Party mal-a Seat la tam ber an ni bawk.

Mizoram State Project Monitoring Committee (MSPMC) chuan nimin khan General Body Meeting vawi 7-na neiin kumin chhunga Project an endik 40 te report an thlirho a, Project thar thawh tur DPR-ah ‘Life Cycle Costing’ chipchiar tak telh thin rawtna chu Pilot Project anga kalpui chhin an rel bawk.

Aizawl Smart City Ltd. (ASCL) hmalaknaa MINECO hmuna ‘Aizawl Sumtual’ siam chu Urban Development & Poverty Alleviation (UD&PA) Department changtu Minister K. Sapdanga chuan niminpiah khan a hawng a, nimin khan Aizawl Zonuam Veng-a ‘Multi-purpose Community Centre’ leh Zodin Square-a ‘Aizawl Dawh-Rem’ chu a hawng bawk.

Art & Culture Minister C. Lalsawivunga chuan Mizote ngeiin Mizo history an zirchian-a an ziah ve tul an tih thu sawiin, Mizo tobul chhui tura hmalak mek a nih thu a sawi bawk.

Mizoram Presbyterian Kohhran-a Rorelna sang ber, Synod Inkhawmpui chu nimin khan neih tan niin Pathianni thleng khi a awh ang.

School Education Department buatsaih Mizoram Secondary School Games vawi 42-na chu nimin khan Aizawl khawpui chhung hmun hrang hrangah neih tan a ni a, tun tum Secondary School Games-ah hian Sports Discipline hrang hrang 6- Athletics, Football, Volleyball, Taekwondo, Inkawibah, Kalchhet leh Inhruipawh-ah te zirlaite an inel dawn a, discipline hrang hrang hi hmun  hrang hrangah nghah a ni a, District hrang hrang 11 atangin zirlai leh zirtirtu 1900 vel an tel a, ruahman lawk ang chuan tunkar Zirtawpni ah zawhfel tur a ni ang.

Mamit-a District Sericulture Office chuan nimin khan Samagra-2 hnuaia Augmentation of Muga Culture in Mizoram, Mamit Circle-a Pangang khawitu mi 13 te hnenah Portable Lighting System an semchhuak a, he hun hi District Sericulture Officer Lalbiakhlua Ralte chuan a kaihruai a, he hunah hian bungraw sem hmandan inzirtirna neih nghal a ni bawk.

Mizoram State Policy Coordination Committee chu nimin khan Planning & Programme Implementation Department Committee Room-ah Adviser to CM (Implementation of Handholding Policy) Dr. K.C. Lalmalsawmzauva kaihhruaiin an thukhawm a, Bana kaih hnuaia progress partner-te hmalaknate leh an hlawhtlinna success story phochhuahna tur siam leh thehdarh dan tur te, rang zawka progress partner-ten loan an hmuh theih nana Bank tam zawk nena thawhho dan tur te, Progress partner loan la hmu lo ten loan an hmuh loh chhan leh an hmuh vat theih dan turte, thil tharchhuah lei leh hralh chungchang te leh thil pawimawh dangte ngaihtuah ho a ni.

Chief Minister Lalduhoma chuan nimin khan a Pisa-ah Ministry of Finance hnuaia Department of Expenditure-a Secretary Vumlunmang Vualnam IAS chu kawmin thingpui a inpui a, Chief Minister hian tunhnaia Mizoram sawrkar in Central sawrkar-a SASCI Project thar a thehluh chungchang te, sawrkar sum leh pai enkawl chungchang te, Public Financial Management System (PFMS) chungchang te leh sawrkar sum leh pai chungchang thil pawi-mawh tak takte a sawipui a. Commissioner & Secretary to CM Vanlaldina Fanai chuan a tawiawm a ni.

Mizoram Legislative Assembly-a Committee on Petitions chuan New Delhi-a Lok Sabha Secretariat-ah nimin atang khan Committee hna thawh dan leh kalphung hrang hrangte zirchianna hun an hmang a, Vawiin hian chhunzawm leh a ni ang. He zirchianna hun hi Parliamentary Research and Training Institute for Democracies, Lok Sabha Secretariat buatsaih niin Committee on Petitions aiawhin Chairman T. Lalhlimpuia bakah Member pahnih H. Lalzirliana leh Prova Chakma-te an kal a, Mizoram Legislative Assembly Secretariat Officer leh staff ten an tawiawm bawk a ni.

Kum 2025 Krismas leh kumthar 2026 vuakvet-ah Serchhip District-ah halpuah leh halmawi khapna thupek chu tihchhuah a ni.

Sipai bang pawl, Ex-Servicemen League, Serchhip te chuan Inrinni, Sept. 6, 2025 khan Hmar Veng YMA Hall-ah General Assembly neiin hruaitu thlanna an nei a, President-ah Hony Capt. R Lalhmingthanga; Vice President-ah Nk. Lal-nunnema; Secretary-ah Nk. Chawnthanga; Asst. Secretary-ah Sepoy Anthony Lalnghilhlova; Treasurer-ah Hav. Lalhmuakliana leh Fin. Secretary-ah Hav. Lalhnuna te thlan an ni a. Rorelna hun an hman ah an pawl inkaihhruaina Dan te an ennawn bawk.

Kumin chhungin Mizoram-ah COVID-19 hri kai mi 40 hmuhchhuah ni tawhin hri kai hmuh te hi an vaiin enkawl dam an ni tawh a, kumin a COVID-19 hri kai hmuhchhuah hnuhnung ber chu September 16 khan hmuhchhuah niin September 22-ah enkawl dam a ni bawk. Kumin-a Mizoram-a COVID-19 hri kai hmuhchhuah te hi hri kai langchhuak lo vek an ni a, na taka damloh pui pawh an awm lem lo nia thudawn a ni.

Zoram Medical College & Hospital (ZMC& H)-a Post-Graduate (Specialist) zirna Seat 10 chu State quota leh All India quota in seat awm zatve ve ve-a insem a ni.

ZPM kaihhruai Mizoram sawrkar chuan nimin, December 8, 2025 khan kum hnih tlingin hemi denchhen hian I&PR Minister B. Lalchhanzova leh ZPM Media-a General Secretary KJ. Lalbiakngheta te chuan thuthar thehdarhtute kawmin an hmalakna hrang hrang an tarlang.

Chief Minister Lalduhoma chuan an sawrkar tirh phat atanga an hmalakna langsar zinga mi chu ruihhlo leh Kuhva tawlhruk titawp tura hmalak a ni tih sawiin, Mizoram sawrkar chuan Kuhva huan tihzauh zel a thlawp thu a sawi bawk.

Union Defence Minister Rajnath Singh chuan Pathianni khan Border Roads Organisation (BRO) hnuaia infrastructure Project 125 hawngin heng zingah hian Project Pushpak, Aizawl hnuaia hnathawh pathum a tel a ni.

Kumin April thla atanga hman, Mizoram Universal Health Care Scheme (MUHCS)-ah Mizoram-a mimal damdawi In tam zawkte chu tun thlengin an la tel lo a, an dinna ngaiah an la ding tih Non-Government Hospital Association, Mizoram (NGHAM) hruaitute chuan sawiin, tun dinhmunah chuan zawm leh zawm loh chung-changah thuthar an nei lo tih an sawi a, “MUHCS chungchanga rawtna kan neihte leh kan zawm theihna tur sawrkara kan thehluh chu tun thlengin sawrkar atangin a chhanna kan la dawng lo,” an ti.

Home Minister K. Sapdanga chuan leibaa innghah nasat lutukna atanga kan talchhuah theih dan tur te ngaihtuah a, sum hnâr tha zawk hmuchhuak thei tura ngaihtuahna seng turin MFAS Officer rual te a chah.

Chief Minister Lalduhoma chuan nimin khan Chuhvel Rubber chingtute Zau panna kawng hawngin, Land Resources, Soil & Water Conservation Department changtu Minister Lalthansanga leh sawrkar mi pawimawh dangte pawhin an hmanpui a ni.

Mizoram-a Bawng lakluhna lian ber, Cham-phai District-a Bawng vang chuan ziaawm lam a pan nia hriat a ni a, Hunpui laiin Bawng mamawh ang hmuh loh a hlauhthawnawm loh niin Bawng zuartute chuan an sawi.

MNF Party chuan nimin khan Aizawl Mizo Hnam Run chhung Inkhawm neiin he hunah hian MNF NCC Tawnluia chuan MNF leh India sawrkar ten Remna thuthlung bung leh chang duanna ah Lalduhoma a tel ve lo nia sawiin, “A tel zawk chu Mizoram Governor-a kum 3 lo awm tawh Pu Swaraj Kaushal (L) zawk a ni,” a ti a. “Mizoram Governor hlui Pu Swaraj Kaushal kha Pu Laldenga ngaisangtu tak niin, India sawrkar nen kan inbiaknaah dan (legal) anga nasa tak a min puitu leh Legal Adviser niin kum 1984 November thlaah inbiakna kan tan,” a ti bawk.

MPCC Spokesperson leh General Secretary Dr. Lallianchhunga kum 2028-a ZPM sawrkar thlak turin mipuiten MNF aiin Congress an duh zawk niin a sawi.

Mizoram State Cooperative Marketing & Consumers’ Federation Limited (MIZOFED) leh National Co-operative Exports Limited (NCEL) te chuan nimin khan Cooperation Minister PC. Vanlalruata Pisa-ah thawhdunna thuthlung an ziak a, he thawhdunna thuthlung ah hian MIZOFED aiawhin Managing Director Lalhruaitluanga leh NCEL aiawhin Managing Director Unupom Kausik te chuan an hming an ziak a ni. He thawhdunna hian thlai tharchhuah thawhchhuah kawnga hma-sawnna a thlen beisei a ni a, tualchhunga kutthemthiamte thil siamchhuah pawh a hralhna tur tha zawk siam sak an nih theih nan hmalak a ni ang. He thawhdunna kaltlang hian MIZOFED chuan tualchhunga kuthnathawktute tharchhuah leh siamchhuah chu an endik anga, NCEL hian ramchhung hmundanga thawnchhuah dan tur a ruahman thung dawn a ni.

Lunglei Police ten kumin chhunga Heroin No. 4 an man thenkhat chu Lunglei Judicial Magistrate First Class-I in phalna a pek angin nimin khan Lunglei AP Tlang-a Incinerator Centre-ah Lunglei District Disposal Committee (DCC) chuan an halral a, heng Heroin an halral tak te hi a vaiin gram 176.15 niin Rs. 5,28,810/- man a ni a, heng te hi Police ten tum thum-a an man leh thubuai an ziahluh te a ni.

Cooperation Department changtu Commissioner & Secretary Udit Prakash Rai chuan nimin khan Aizawl Dawrpui-a MSCU Conference Hall ah Apex Bank Micro-ATM chu Banking Correspondent mi 30 te hnenah a sem chhuak a. Heng Micro-ATM te hi Bank nena khawl inthlunzawm a ni a, Bank nei lo khua te tana pawisa dahluh leh lakchhuahna a nih bakah awlsamna thlentu tangkai tak anih a beisei thu Cooperation Commissioner chuan a sawi bawk.

Mizo Students’ Union (MSU) ten Mizoram chhunga Dan lo a khaw din te a hmunah kalin an enfiah dawn. RTI hmanga zawhna Local Administration Department (Directorate)-in an chhan danin tun dinhmunah Mizoram chhungah Dan lo a din khaw 11 a awm mek tih MSU te hian an thuchhuahah an tarlang a, Dan lo a khaw din awm mek te kumin chhung ngeia tihtawp a nih theih nan hma la turin Mizoram sawrkar a lo ngen tawh chu bawhzuiin heng khaw dinah te hian sawrkar hmalakna a awm em tih leh tute nge cheng tih enfiah turin nimin khan Aizawl an chhuahsan a, MSU President chuan heng mite hi vailiamin Lunglei a MSU hruaitu ten an lotawiawm dawn a ni.

Lai Autonomous District Council (LADC) Inthlanpui vawi 12-na neiha Vote tla te chu tukin dar 8:00 atang hian Govt. Lawngtlai College-a Counting Centre-ah chhiar a ni dawn ta a, Vote thla chhiar tur hian inbuatsaihna engkim peihfel ni tawhin Vote chhiarna atan hian Counting Hall pathum ruahman a ni a, Tuichhaklam Sangau RD Block huamchhunga MDC Bial 9 chu Pindan pakhat ah chhiarin, Lawngtlai leh a chhehvel Bial 8 chu Pindan hran-a Dawhkan 8-ah chhiar a ni anga, Tuithlanglam Bial 8 chu dawhkan 8 ah chhiar a ang. Ruahman lawk dan chuan tumkhat ah Pindan pathum-ah Bial 3 zel chhiar a ni dawn a, Bial pakhat vel hi vawi khat ah chhiar zawh tur niin Bial 25-ah inthlanna hi neih a ni.

Mizoram-a Vawk hri, African Swine Fever (ASF) leng thawh thumna (May 2024 – December 2024) a Vawk thi te neitute hnenah zangnadawmna pekchhuah kim ni tawhin Serchhip District-ah Vawk thi neitute hnenah pawh cheng nuai 113.08 pekchhuah a ni.

Serchhip Kawnpui South Branch YMA chuan Krismas leh Kumthar vuakvet a Serchhip Bazar leh a chhehvel a mitinte thlamuang taka an awm theih nana Duty turin Volunteer Group an din a, tun thlengin mi 36 zet inpe tawhin heng mite tan hian Inrinni khan Training an buatsaih bawk.

Unity Orphanage Home Serchhip Building 2nd Floor sak thar chu Inrinni (Dec. 6, 2025) khan Unity Church General Hqrs. Executive Secretary Rev. B. Lalthlamuana chuan a hawng.

Serchhip Bawrhsap Paul L. Khuma chuan NHIDCL hnuaia Contractor, Serchhip District chhunga hnathawk te chu kar kalta Zirtawpni khan kokhawmin an hnathawhna china kawng chhia thawmthat dan tur a sawipui.

Serchhip Traffic Police te chuan December 1, 2025 atanga No Tolerance Drive an kalpui atanga chawlhkar khat chhungin Dan zawm lo mi 81 zet man tawhin heng mite pawisa chawi pawh Rs. 2,18,000/- a tling tawh.

Salvation Army Youth (SAY) Serchhip Bial te chuan Inrinni khan Serchhip Blood Bank-a dah turin thisen Unit 7 an pe a, thisen petute hi mipa 6 leh hmeichhia pakhat an ni. Hetihlai hian  Association for Voluntary Blood Donation (AVBD) chuan Krismas puala Thisen pek runpui an kalpui chho leh mek a, Isua Krista piang lawm nana thisen pe tura mipuite chu sawmin, Mizoram-a Blood Bank hrang hrangah thisen hi pek theih a ni.

Serchhip North Zone Middle School Sports 2025 chu Zirtawpni khan Serchhip P&E Veng a Leisekawt Mual-ah zawhfel a ni a, School hrang hrang 7 tel zingah Little Flower Convent School chuan point 105 hmuin pakhatna an ni a, Presbyterian English School, Serchhip in point 49 hmuin pahnihna an nih bakah point 42 hmutu All Saints School, Serchhip chu pathumna an ni bawk.

Tunhnaia Indigo thlawhtheihna engemaw zat khaihlak avanga khualzin tam takin harsatna an tawh tihziaawm nan Northeast Frontier Railway (NFR) chuan Sairang leh Guwahati inkara tlan Rel-ah Coach pahnih a dah belh a, tunkar Ningani atangin Special Train pahnih a tlan tir bawk.

Art & Culture Department hnuaia Tribal Research Institute (TRI) chuan kum 1975 atanga kumin October thla thleng khan lehkhabu 98 an tichhuak tawh a, heng zinga 66 hi lei mai theihin an kawl bawk. TRI lehkhabu tihchhuah te hi Mizo hnam ziarang leh nihphung bakah Sakhaw lam zirbingna lehkhabu te a ni tlangpui a, Kumpinu rorelna hnuaia Mizoram awp thintu ten Mizo chanchin an ziah te pawh telin Mizo zinga mi hmingtha leh mi hmasate chanchin a tel bawk a. Heng lehkhabu te hi TRI Office, Art & Culture Department atangin Pisa kai hun chhungin lei theih a ni bawk.

Inrinni khan NGO Coordination Committee, Lawngtlai District chuan Lai Autonomous District Council (LADC)-a MDC inthlanpui neih zawh taka Candidate-te Lawngtlai-a Central YLA Office-ah kokhawmin LADC-ah rorelna dik leh zahawm, tlo leh rintlak a awm an duh thu an hrilh a. He hunah hian sawrkar indin dan emaw, sawrkar kal danah mipui mit tikham zawnga chetna a awm a nih chuan NGO Coordination Committee-in hma an lak tur thu sawilan niin, Candidate-te atangin thusawi ngaihthlak a ni bawk.

Centre for Environment & Social Justice (CESJ) chuanInrinni khan thuchhuah siamin 'No Tolerance Week' kalpui a nih avanga mipui phun-nawi leh lungawi lo an tam avangin sawrkar hnathawk motor kawl 37-te chu lirthei documents endikna VAHAN-ah an zirchian thu tarlangin, heng zinga lirthei 35-te chu documents fel lo an nih thu leh Insurance leh Pollution Certificate pawh thi tawh an nih thu an tarlang a, heng documents fel lo zingah hian dan siamtu pawl zinga mi, MLA 2, AMC Mayor leh thawktu dang motor 3 bakah Police hotu lian motor 2 leh Traffic Police lirthei ke 2 leh ke 4 nei an tam ber tih an tarlang a. Sawrkar motor-te chu boruak chhia an pekchhuah ve tho thin avangin Pollution Certificate leh documents dangte nei ve tura an phut thu an tarlang tel bawk.

Agriculture & Farmers' Welfare Department changtu Minister PC.Vanlalruata chuan ramdang-a dan lova Fertilizer (leitha) thawnchhuah thin titawp turin nasa takin hmalak mek a nih thu a sawi.

Aizawl West-I Bialtu MLA TBC. Lalvenchhunga chuan a Bial mipuite leh party tana hun tam zawk a hman theihna atana Adviser to Chief Minister a nihna atanga banna a thehluh hnuah a Bial mipuite ngenna avangin Adviser to Chief Minister hna a zawm leh dawn.

Chief Minister’s Office-a din Mizo Diaspora Cell (MDC) chu Zirtawpni khan thukhawmin an hmalakna hrang hrang an thlir bakah hma an lak zel dan turte an sawiho.

National Cadet Corps (NCC) GP HQ Aizawl Group Commander Brig. GS Arora chuan Mizoram sawrkarin NCC Academy changtlung tak dinna turin ram a ruahman fel tawh tih a sawi.

Central YMA hruaitute chuan Inrinni khan Vairengte leh Sairang inkar kawng siam mek leh Hlimen leh Lungleng inkar kawng siam mek te chu a hmunah tlawhin an enfiah.

KMMTTP Impact of the Study Group Committee Chairman T. Lalhlimpuia MLA chuan Inrinni, Dec. 6, 2025 khan Myanmar leh India inrina Zochachhuah leh Hmawngbuchhuah khua bakah a chhehvel khua te a tlawh.

Pune-a 2025-2026 Syed Mushtaq Ali Trophy (Plate Group) Final khelhah Mizoram chuan Sikkim hnehin an champion.

Tunhnaia Serchhip-a Vawksa man bithliah thar chu zawm lo an awm nia hriat a ni a, an chungthu chu Dan anga ngaihtuah tum a ni.

Kan hma lawka Krismas leh Kumthar hunpui lo thleng tur mipui ten him leh thlamuang taka an hman theih nan nimin khan Serchhip-a District Bawrhsap Paul L. Khuma hovin sawrkar thuneitute leh tlawmngai pawl aiawhte an thukhawm.

Nimin December 5, 2025 kha ‘World Soil Day’ niin KVK Serchhip District, North Vanlaiphai-ah he ni pual hian hun hman a ni.

Sub-Hqrs. YMA Serchhip chuan nimin khan Sub-Hqrs.YMA Executive Committee (SEC) thutkhawm neiin kan hmaa Krismas leh kumthar vuakvet lo thleng tur chu mipui ten hlim tak leh thlamuang  taka an hman theih nan Branch tin ten Duty insiam leh nise an ti a, halpuah leh halmawi lam chi te hal lo tura mipuite ngenin, Serchhip District-a Home leh Damdawi In leh Centre hrang hrangah Krismas thilpek hlan leh nise an ti bawk. Hei bakah hian kumin-a YMA Sub-Hqrs. Rorel Inkhawm in YMA Chhang te tan Mizo Hnam Lam leh Mizo Infiamna Kutpui nei tura a rel chu January 17, 2026-ah neih tum nise an ti a. Kumin atan Sub-Hqrs. YMA Office chu December 16, 2025 thleng hawngin kumthar, 2026 atan January 7, 2026-ah hawn leh tur a ni ang.

Serchhip Town Inter-Departmental Sports 2025 neih zawh taka Group No. 8 te chuan an sum leh pai thawhkhawm atanga an hmanbang Rs. 8710/- chu Serchhip District Hospital Poor Fund atan an hlan a, he Group-ah hian DRDO, BDO, Supply, Fisheries, MRB New Serchhip, Fire & Emergency Services, Govt. JM H/S, Govt. Chanmari M/S, Midland M/S leh Argiculture Complex P/S te an awm a ni.

Rural Development & Administration Department changtu Minister Prof. Lalnilawma chuan MGNREGS hnuaia mipui inhlawhna hlawh dawn har chungchangah sawrkar-in thiamlohna a neilo tih nimin-a Thingdawl RD Block-in kum 50 a tlinna, Golden Jubilee lawmna leh Pisa thar hawnna hun khuallian nia a hmanpuina ah a sawi a, Minister chuan MGNREGS hnuaia inhlawhna, thla 4 chhung hlawh la dawn loh chungchangah State sawrkar chuan a tih tur ang a ti zel a, State dang pawhin an tih tur ang an ti vek tih sawiin, December ni 2 khan Sanction Order tichhuah a ni a, Finance Department-in an tihfel hunah mimal account-a a luh mai tur thu a sawi bawk.

Sawrkar laipui hmalakna Pradhan Mantri Ujjwala Yojana (PMUY) hnuaiah Mizoram-a chhungkaw khawsak harsa hmeichhiate hnenah a thlawnin Gas connection 36,031 pekchhuah a ni tawh.

Chief Minister Lalduhoma chuan Hmar Zirlaite chu Zofate inpumkhatna ngaipawimawh tur leh inpumkhatna fatu-ah lo tang zel tura chahin, “Hna kan lakna reng reng hi dik leh thianghlim takin kan kalpui zel a. Tu tan mah sawipuitu hran neih a ngai lo, an thiamna kha anmahni sawipuitu tha ber a ni,” a ti.

Nimin khan Aijal Club-ah ‘Mizoram Buyer Seller Meet 2025’ chu neih niin Agriculture & Farmers' Welfare Department Minister PC. Vanlalruata chuan khuallian niin a hmanpui a ni.

Mizoram Cricket Team chuan Syed Mushtaq Ali Trophy Plate-ah Final lutin Vawiin hian Final an khel dawn. Pune (Maharashtra)-a MCA Cricket Stadium-a Syed Mushtaq Ali Trophy Plate Group inelna neih mekah hian Mizoram hian an match hnuhnung berah Meghalaya chu hnehin Final an lut a, vawiin tlai tlar 4:30-ah Final khelin Sikkim an hmachhawn dawn a ni.

Mizoram Sawrkar Rural Development & Administration Department chuan mipuite tana hna tha zawka thawh a nih theih nan leh Rural Development Schemes hrang hrangte hlawhtling taka kalpui zel a nih theih nan Rural Development & Administration Department hnuaia District Level-a RD Officer te chu ‘Quarterly Review Meeting’ nei thin turin a hriattir.

School Education Department buatsaiha neih Mizoram Higher Secondary School Games vawi 22-na chu zawhfel niin nimin khan Aizawl a Dawrpui Multipurpose Centre-ah a kharna neih a ni a, tun tum School Games-ah hian Sports Discipline hrang hrang - Athletics, Football, Volleyball, Taekwondo, Inkawibah, Inhruipawh leh Kalchhet kal-ah te inelna neih niin Govt. Mizo Higher Secondary School, Aizawl chuan Gold 8, Silver 7 leh Bronze 3, a vaiin Medal 18 lain pakhatna an ni a, Gold 4, Silver 1 leh Bronze 8, a vaiin Medal 13 lain Govt. GM Higher Secondary School, Champhai chu pahnihna an ni a, Govt. Mamawii Higher Secondary School, Aizawl chuan Gold 4, Silver 1 leh Bronze 1, a vaiin Medal 6 lain pathumna an ni bawk.

Kum 1949 atanga India rama kumtin December 7-a hman thin ‘Armed Forces Flag Day’ chu kumin hian Pathianni a nih avangin nimin khan Directorate of Sainik Welfare & Resettlement, Aizawl bultumin Mizoram-a Sainik Welfare Office awmna District pali-ah te hman a ni a, ‘Armed Forces Flag Day’ hi indonaa nunna chan ta Sipai nupui fanaute, hliamtuar a ramtuileilo-a awm te, Ex-Servicemen leh hmeithai harsa zualte tanpui nan mi tlawmngaite leh mi thilphalte hnen atangin tanpuina khawn thin a ni a. Nimin khan Governor Secretariat, CMO Office, Deputy Speaker, Minister, Chief Secretary leh Department hrang hrang Secretary-te hnen atangin tanpuina khawn niin Rs. 41,310/- hmuh a ni.

Serchhip Traffic Police ten tun thla ni 1 a\anga Serchhip khawpui chhunga ‘No Tolerance Drive’ neia lirthei enfiah hna an thawh chu nimn khan chhunzawm leh a ni a, nimin khan New Serchhip lamah Duty insiamin lirthei te enfiah leh a ni a, he hunah hian Dan zawm lo mi 11 man leh niin heng mite pawisa chawi tlingkhawm chu Rs. 31,500 a tling a ni. Serchhip Traffic Police te chuan lirthei enfiah hna hi ngawrh taka kalpui zui zel an tum thu an sawi bawk.

MZI leh LPS Vision tangkawp buatsaih Rimawi Award - (Gospel) chu December ni 4, 2025 zan khan LPS Arena-ah sem chhuah a ni a. H. Vanlalhlana hnenah Lifetime Achievement Award hlan niin, Esther Hnamte hnenah Special Award hlan a ni bawk.