ZMC&H-a PG (Specialist) zirna ah Seat sem dawn

Zoram Medical College & Hospital (ZMC& H)-a Post-Graduate (Specialist) zirna Seat 10 chu State quota leh All India quota in seat awm zatve ve ve-a insem a ni.

    ZMC&H-a Specialist zir theih turte hi Subject 5- Paediatrics (MD), General Surgery (MS), General Medicine (MD), Obstetrics & Gynaecology (MS) leh Anaesthe-siology (MD)-ah te Seat 2 theuh a ni dawn a, State quota leh All India quota chuan seat awm zatve ve ve hi an insem a, zaa 50 chu Mizoram quota niin a dang zaa 50 dang chu All India quota a ni dawn thung a ni. Akashvani Aizawl zawhna chhangin, ZMC&H Director Zoramthara Zadeng chuan Mizoram quota seat 5 zinga seat 2- Anaesthesiology (MD) leh General Medicine (MD) chu In-Service Category niin Mizoram-a Doctor tanglai te tan a ni a, Seat 3 dang-Paediatrics (MD), General Surgery (MS), Obstetrics leh Gynaecology (MS) chu Open Category a ni a, National Elegibility cum Entrance Test (NEET) PG Entrance exam a tittha Mizote’n an chang thung dawn tih a sawi a. Mizoram sawrkar Higher & Technical Department kaltlangin lak an ni dawn ti a sawi bawk.

 ZMC&H-a PG zir tum te hian kumthar January ni 15 atang khian an zawm tan theih a rin thu pawh sawiin, a bul tanna atan hian Department 5 chauh nimahse zawimuangin Department dang te pawh hawn belh zel tum a nih thu leh nakum lamah seat awmzat pawh tih belh tum a ni thu a sawi bawk.

Tarlan tawh angin Mizoram sawrkarin ZMC&H-a Post Graduate (Specialist) zir phalna a dil chu National Medical Commission-in subject 5-a seat 10-ah a phalsak a,  ZMC&H-a Post Graduate zirlai hmasa berte chuan nakum (2026) January thla atang khian an zirna bul an \an thei dawn niin a lang a ni.