Chief Minister-in Mizoram-a POCSO case a pung zel pawi a tih thu a sawi

Chief Minister Lalduhoma chuan nimin khan Mizoram State Commission for Protection of Child Rights (MSCPCR) hotute kawmin, Mizoram-ah hursualna laka naupangte venhimna Dan, POCSO Act kaihhnawih thubuai a pung zel chu pawi a tih thu a sawi.

Chief Minister Lalduhoma hian nimin khan a Pisa-ah Mizoram State Commission for Protection of Child Rights (MSCPCR) Chairman leh Member-te kawmin MSCPCR chungchang leh an hmalakna te a sawipui a, he hunah hian MSCPCR Official-te chuan Chief Minister chu Commission chungchang sawipuiin, naupangte aw ni tura sawrkar laipuiin Commission chu a din a nih angin, chak zawka naupangte dikna chanvo (rights) an humhalh theihna tura hmalak dan turte an sawiho a ni. He hunah hian Chief Minister Lalduhoma chuan Mizoram-a Protection of Children from Sexual Offences (POCSO) Act kaihhnawih case a pung zel chu pawi a tih thu sawiin, naupangte laka pawikhawihtute chungthu rang taka relfel leh naupangte dikna leh chanvo humhalhna dante tha taka kenkawh chu a ngaih pawimawh thu a sawi a ni.

He inkawmna ah hian MSCPCR Chairman Jimmy Laltlanmawia leh Member Secretary Lalengvari bakah member dangte an tel a, MSCPCR hi Parliament dan siam ‘The Commission for Protection of Child Rights Act, 2005’ hnuaia din a ni a. Parliament dan siam hnuaiah hian Mizoram Sawrkar chuan a taka kalpui thei turin ‘The Mizoram State Commission for Protection of Child Rights Rules, 2017’ a siam a, hemi hmang hian MSCPCR chu February, 2018 khan din a ni.

MSCPCR hmalakna in School Education Department-ah Routine School Inspection neih thin a ni a, Safety of School Research-a an hmuhchhuah te atangin Recommendation an siam a. Kum 2023 khan Aizawl District Court-ah ‘Child Welfare Officer Room leh Children’s Room’ siamtir a ni a, hmang tangkaitu naupang 814 awm tawhin heng zinga 113 te chu POCSO case avanga Court-a kal an ni.