Tuichang lui-ah ‘Nghakuai Chiah Runpui’ neih a ni

Keitum leh Khawlailung inkar Tuichang lui-a ‘Nghakuai Chiah Runpui’ chu nimin khan neih tan niin Vawiin hian chhunzawma zawhfel a ni ang.
Mizoram sawrkar-a Fisheries Department, Keitum VC leh YMA bakah Tourism Department leh Mizoram Angling Association te tangho in an buatsaih ‘Nghakuai Chiah Runpui’ hi Bialtu MLA leh Adviser to Chief Minister Lalmuanpuia Punte chuan hawngin Nghakuai chiah chu ram changkang te pawhin an uar thu leh Sports events pakhat a ni tih sawiin, “Nungcha te hian dam hunchhung an neih vangin humhalh mawl tawp lova hetia Fisheries Department leh Keitum VC leh YMA ten Nghakuai chiah runpui an siam hi a thain a hlawkna tel zawnga Festival ni pahfawma tih hi a finthlak hle a ni,” a ti a. Khawtlang hruaitute leh Department hotute chauh nilovin mipuite pawhin thuawih taka dan an zawm avanga humhalh hi hlawhtling a nih thu sawiin, mipui chungah pawh lawmthu a sawi a. “Sangha chauh ni lovin nungcha dang te pawh humhalh pung ila, ram changkang ten sapel hun (hunting season) an siam anga tih ve theih khawpa nungcha humhalh uar deuh deuh turin Mizoram khawtin ka sawm che u a ni,” a ti bawk.

Tun tuma Nghakuai Chiah Runpui hi ni hnih (2) neih tura ruahman niin Mizoram hmun hrang hrang atangin mi thahnem tak an pungkhawm a, a tel duhte tan Rs. 500/- a inziahluh theih niin Sangha khaichhuak apiang ten an Sangha khaichhuah ang ang an neih theih bakah Sangha khaichhuak lian ber, Sangha Khaichhuak tam ber, Sangha Khaichhuak zinga upa ber leh naupang ber, Hmeichhe zinga Sangha khaichhuak lian ber leh Thlalak nalh ber te lawmman pawisa leh certificate pek tur a ni a. Vawiin tlai hian a kharna hun hmangin Concert nen hun hmang chhunzawm tura ruahman a ni.

Keitum khawtlang hian kum 2010 atang khan Keitum leh Khawlailung inkar Tuichang lui humhalh hna hi thawkin, luidung nungcha te nasa takin an humhalh a ni.